കൊവിഡ് വാക്‌സിൻ സ്വകാര്യ ആശുപത്രികൾക്ക് വിറ്റു; പഞ്ചാബ് സർക്കാരിനെതിരെ മായാവതി

പഞ്ചാബ് സർക്കാരിന് 400 രൂപ നിരക്കിൽ കേന്ദ്ര സർക്കാർ നൽകിയ 1.40 ലക്ഷം ഡോസ് കൊവാക്‌സിൻ സ്വകാര്യ ആശുപത്രികൾക്ക് നൽകിയ നടപടിക്കെതിരെ കടുത്ത വിമർശനമാണ് ഉയർന്നത്.

ലഖ്‌നൗ:കൊവിഡ് വാക്‌സിൻ വിതരണത്തിൽ പഞ്ചാബ്‌ സർക്കാരിനെതിരെ ആരോപണവുമായി ബിഎസ്‌പി നേതാവ് മായാവതി. സംസ്ഥാന സർക്കാരിന് ലഭിക്കുന്ന കൊവിഡ് വാക്‌സിനുകളിൽ സ്വകാര്യ ആശുപത്രികൾക്ക് നൽകുകയാണെന്നും കൊവിഡ് രൂക്ഷമായ സാഹചര്യത്തിലെ ഈ നടപടി മനുഷത്വ രഹിതമാണെന്നും മായാവതി ആരോപിച്ചു. പഞ്ചാബ് സർക്കാർ സ്വകാര്യ ആശുപത്രികളിൽ നിന്ന് 18-44 പ്രായപരിധിയിലുള്ളവർക്ക് നൽകിയ എല്ലാ വാക്സിൻ സ്റ്റോക്കുകളും തിരികെ ആവശ്യപ്പെട്ട നടപടിക്ക് ശേഷമായിരുന്നു മായാവതിയുടെ പ്രതികരണം.

കേന്ദ്ര സർക്കാരിൽ നിന്ന് 400 രൂപക്ക് നൽകുന്ന വാക്‌സിൻ 1060 രൂപക്കാണ് പഞ്ചാബ് സർക്കാർ സ്വകാര്യ ആശുപത്രികൾക്ക് നൽകുന്നത്. ഗൗരവകരമല്ലാത്ത നിലപാടാണ് കോൺഗ്രസ് സ്വീകരിക്കുന്നതെന്നും കേന്ദ്ര സർക്കാർ ഈ നിലപാട് മനസിലാക്കണമെന്നും ബിഎസ്പി ആവശ്യപ്പെട്ടു.

പഞ്ചാബ് സർക്കാരിന് 1.40 ലക്ഷം ഡോസ് കൊവാക്‌സിനാണ് ലഭിച്ചതെന്നും 1000 രൂപക്ക് 20 സ്വകാര്യ ആശുപത്രികൾക്ക് വിതരണം ചെയ്തെന്നും കേന്ദ്രമന്ത്രി പ്രകാശ്‌ ജാവദേക്കർ പറഞ്ഞിരുന്നു. ഇത് ഗൗരവകരമായ നടപടിയാണെന്നും അദ്ദേഹം കൂട്ടിച്ചേർത്തു. വിഷയത്തിൽ കേന്ദ്ര സർക്കാർ സംസ്ഥാന സർക്കാരിനോട് വിശദീകരണം തേടിയിട്ടുണ്ട്.