താനെ:2024ലെ തെരഞ്ഞെടുപ്പിനെ കുറിച്ച് ആശങ്കപ്പെടാതെ പ്രതിപക്ഷം 2029ലെ ലോക്‌സഭ തെരഞ്ഞെടുപ്പിനെ കുറിച്ച് ചിന്തിക്കണമെന്ന് മുന്‍ കേന്ദ്രമന്ത്രിയും മുതിർന്ന ബിജെപി നേതാവുമായ പ്രകാശ് ജാവദേക്കർ. പ്രധാനമന്ത്രി നരേന്ദ്ര മോദിയുടെ വ്യക്തിത്വവും ജനങ്ങൾക്ക് വേണ്ടി അദ്ദേഹം ചെയ്യുന്ന പ്രവർത്തനങ്ങളും പ്രതിപക്ഷം മനസിലാക്കണമെന്നും അദ്ദേഹം പറഞ്ഞു. ഭരണത്തിലേറിയ മോദിയുടെ 20 വർഷങ്ങൾ-ഗുജറാത്ത് മുഖ്യമന്ത്രിയായി 12 വർഷവും പ്രധാനമന്ത്രിയായി 8 വർഷവും എന്നതിനെ കുറിച്ചുള്ള പുസ്‌തകത്തിന്‍റെ പ്രകാശനത്തിനായി താനെ സിറ്റിയിൽ ബിജെപി സംഘടിപ്പിച്ച ചടങ്ങിൽ സംസാരിക്കുകയായിരുന്നു രാജ്യസഭാംഗമായ പ്രകാശ് ജാവദേക്കർ.
2014ൽ മോദി പ്രധാനമന്ത്രിയായതിന് ശേഷം രാജ്യത്തെ അന്തരീക്ഷം നല്ല രീതിയിൽ മാറി. വ്യത്യസ്‌ത ചിന്തകളും പരിപാടികളും കൊണ്ട് ജനങ്ങളുമായി നേരിട്ട് ആശയവിനിമയം നടത്തുകയും ഭരണത്തിൽ സുതാര്യത കൊണ്ടുവരികയും ചെയ്‌തു. മോദിയുടെ പ്രവൃത്തി ജനങ്ങൾക്ക് ഇഷ്‌ടമായത് കൊണ്ട് മാത്രമാണ് തുടർച്ചയായ തെരഞ്ഞെടുപ്പ് വിജയം ലഭിക്കുന്നതെന്നും, പ്രതിപക്ഷം ആദ്യം പ്രധാനമന്ത്രി നരേന്ദ്ര മോദിയുടെ പ്രവര്‍ത്തി മനസിലാക്കണമെന്നും അദ്ദേഹം പറഞ്ഞു.
കഴിഞ്ഞ 20 വർഷമായി ഒരിക്കൽ പോലും അസുഖമോ മറ്റ് ഒഴിവുകഴിവുകളോ പറയാതെ പ്രവർത്തിക്കുകയാണ് അദ്ദേഹം. വിവിധ പരിപാടികളും പ്രവർത്തനങ്ങളും സ്‌കീമുകളും മോദി ഏറ്റെടുത്തു. 'ഹർ ഘർ തിരംഗ' കാമ്പയിനിലൂടെ രാജ്യത്തുടനീളം ദേശസ്‌നേഹ അന്തരീക്ഷം സൃഷ്‌ടിച്ചു. 2014ൽ എൽഇഡി ബൾബിന് 200 രൂപ വിലയുണ്ടായിരുന്നെങ്കിൽ ഇപ്പോൾ അത് 70 രൂപയ്‌ക്ക്‌ ലഭ്യമാണ്. പ്രധാനമന്ത്രിയുടെ ജനപ്രീതി കാരണം ബിജെപിയിൽ ഇപ്പോൾ 11 കോടി അംഗങ്ങളുണ്ടെന്നും ലോകത്തെ ഏറ്റവും വലിയ രാഷ്‌ട്രീയ സംഘടനയായി ബിജെപി മാറുന്നുവെന്നും ജാവദേക്കർ പറഞ്ഞു.