സുനാമി ദുരന്തത്തിന്‍റെ സ്മരണ പുതുക്കി തമിഴ്നാട്

തമിഴ്നാട്ടിലെ കടലൂരില്‍ മാത്രം 617 പേര്‍ക്കാണ് ജീവന്‍ നഷ്മായത്

ചെന്നൈ:ഭീമന്‍ സുനാമി തിരമാലകള്‍ കടലൂരിനെ വിഴുങ്ങയിട്ട് ഇന്നേക്ക് 15ആണ്ട്. 2004 ഡിസംബര്‍ 26നാണ് തമിഴ്നാട്ടിലെ 13 ജില്ലകളിലെ തീരദേശങ്ങളെ കണ്ണീരിലാഴ്ത്തി സുനാമി തിരകളെത്തിയത്. ആയിരക്കണക്കിന് ജീവനുകളാണ് അന്ന് പൊലിഞ്ഞത്. ശ്രീലങ്ക, ഇന്തോനേഷ്യ തുടങ്ങിയ രാജ്യങ്ങളിലും സുനാമിയെത്തി. തമിഴ്നാട്ടിലെ കടലൂരില്‍ മാത്രം 617 പേര്‍ക്കാണ് ജീവന്‍ നഷ്മായത്.നല്‍പതിലേറെ പേരെ കാണാതായി. തീരദേശത്തെ പലഗ്രാമങ്ങളും ഇല്ലാതായി. കടലൂരില്‍ മാത്രം 45 ഗ്രാമങ്ങളെയാണ് സുനാമി തിരകള്‍ കവര്‍ന്നത്.

15ാം വാര്‍ഷിക ദിനമായ വ്യാഴാഴ്ച നിരവധിയാളുകളാണ് ഉറ്റവരുടെ ഓര്‍മകള്‍ക്ക് മുന്‍പില്‍ ആദരാഞ്ജലികളര്‍പ്പിക്കാന്‍ തീരത്ത് എത്തിയത്. ബോട്ടുകള്‍ മത്സ്യബന്ധനത്തിന് പോയില്ല. തൊഴിലാളികള്‍ മരിച്ചവരോടുള്ള ആദര സുചകമായി ബോട്ടുകള്‍ക്ക് മുകളില്‍ കറുത്ത കൊടികെട്ടി. വിവിധ രാഷ്ട്രീയ പാര്‍ട്ടികളുടെ നേതൃത്വത്തിലും തീരത്ത് അനുശോചന യോഗങ്ങള്‍ നടന്നു. തീരത്ത് എത്തിയവര്‍ കടലില്‍ പാലും പൂവും സമര്‍പ്പിച്ചു. കന്യാകുമാരിയില്‍ 33 ഗ്രാമങ്ങളില്‍ സുനാമി തിരകള്‍ നാശം വിതച്ചു.