പൗരത്വ ഭേതഗതി നിയമം; വിദ്യാര്‍ഥികളോട് പിന്തുണ തേടിയ സ്കൂളിനെതിരെ കോണ്‍ഗ്രസ്
പൗരത്വ ഭേദഗതി നിയമത്തിനെതിരെയും പ്രധാനമന്ത്രി നരേന്ദ്രമോദിക്കെതിരെയും നാടകം അവതരിപ്പിച്ച കര്‍ണാടക ബിദാറിലെ ഷഹീന്‍ സ്കൂളിനെതിരെ രാജ്യദ്രോഹകുറ്റം ചുമത്തിവര്‍ എന്തുകൊണ്ട് മുംബൈയിലെ സ്കൂളിനെതിരെ നടപടിയെടുക്കുന്നില്ലെന്ന് കോണ്‍ഗ്രസ്
മുംബൈ:പൗരത്വ ഭേതഗതി നിയമത്തെ പിന്തുണക്കാന്‍ വിദ്യാര്‍ഥികളെ പ്രേരിപ്പിച്ചതില്‍ മുംബൈയിലെ മാനേജ്മെന്‍റ് സ്കൂളിനെതിരെ രാജ്യദ്രോഹകുറ്റം ചുമത്തണമെന്ന് കോണ്‍ഗ്രസ്. പൗരത്വ ഭേദഗതി നിയമത്തിനെതിരെയും പ്രധാനമന്ത്രി നരേന്ദ്രമോദിക്കെതിരെയും നാടകം അവതരിപ്പിച്ച കര്‍ണാടക ബിദാറിലെ ഷഹീന്‍ സ്കൂളിനെതിരെ രാജ്യദ്രോഹകുറ്റം ചുമത്തിയിരുന്നു. നാല്, അഞ്ച്, ആറ് ക്ലാസുകളിലെ വിദ്യാര്‍ഥികള്‍ അവതരിപ്പിച്ച നാടകത്തിനെതിരെയാണ് രാജ്യദ്രോഹകുറ്റം ചുമത്തിയത്. ജനുവരി 21നായിരുന്നു കുട്ടികളുടെ നാടകം. ഈ സംഭവത്തില്‍ സ്കൂള്‍ പ്രധാനാധ്യാപികക്കും നാടകം അവതരിപ്പിച്ച വിദ്യാര്‍ഥിയുടെ അമ്മക്കുമെതിരെ രാജ്യദ്രോഹകുറ്റം ചുമത്തി അറസ്റ്റ് ചെയ്തു. അങ്ങനെയെങ്കില്‍ എന്തുകൊണ്ട് മുംബൈയിലെ സ്കൂളിനെതിരെ നടപടിയെടുക്കുന്നില്ലെന്ന് മഹാരാഷ്ട്ര കോൺഗ്രസ് വക്താവ് സച്ചിൻ സാവന്ത് ചോദിച്ചു.