ന്യൂഡൽഹി: ഡൽഹിയിൽ കൊവിഡ് രോഗികളുടെ എണ്ണം കുറയുകയാണെന്ന് മുഖ്യമന്ത്രി അരവിന്ദ് കെജ്‌രിവാൾ. രോഗികളുടെ എണ്ണം ദിനംപ്രതി കുറയുകയാണെന്നും കൊവിഡ് രോഗികൾക്കുള്ള 9,900 കിടക്കകൾ ഒഴിഞ്ഞെന്നും മുഖ്യമന്ത്രി പറഞ്ഞു. ഡൽഹിയിൽ ആശുപത്രിയിൽ പ്രവേശിപ്പിക്കേണ്ടി വരുന്നവരുടെ എണ്ണം കുറയുകയാണ്, കൂടുതൽ പേർക്ക് വീട്ടിൽവച്ച് തന്നെ രോഗം ഭേദമാകുന്നുണ്ട്. കഴിഞ്ഞ ആഴ്‌ചയിൽ ദിനംപ്രതി 2,300ഓളം പേർക്ക് രോഗം സ്ഥിരീകരിച്ചെങ്കിലും ആശുപത്രികളിൽ കഴിയുന്ന രോഗികളുടെ എണ്ണം 6,200 ൽ നിന്ന് 5,300 ആയി കുറഞ്ഞുവെന്നും മുഖ്യമന്ത്രി ട്വിറ്ററിലൂടെ അറിയിച്ചു. ഡൽഹിയിലെ കൊവിഡ് രോഗികളുടെ എണ്ണം 94,695 ആണ്. 26,148 പേർ ചികിത്സയിൽ തുടരുമ്പോൾ 65,624 പേർ രോഗമുക്തി നേടി. 2,923 പേർ മരിച്ചു.