പുല്‍വാമ ആക്രമണ സമയത്ത് പ്രധാനമന്ത്രി ഫിലിം ഷൂട്ടിംഗില്‍; രൂക്ഷവിമര്‍ശനവുമായി കോണ്‍ഗ്രസ്

ആക്രമണത്തില്‍ കൊല്ലപ്പെട്ട ജവാന്‍ വസന്തകുമാറിന്‍റെ ഭൗതിക ശരീരത്തിന് സമീപത്ത് നിന്നുള്ള അൽഫോണ്‍സ് കണ്ണന്താനത്തിന്‍റെ ഫോട്ടോയും കേന്ദ്ര സർക്കാരിനു നേരെയുള്ള ആയുധമാക്കിയിരിക്കുകയാണ് കോണ്‍ഗ്രസ്.

പുല്‍വാമ ഭീകരാക്രമണ സമയത്ത് പ്രധാനമന്ത്രി നരേന്ദ്രമോദി ഫിലിം ഷൂട്ടിംഗില്‍ ആയിരുന്നുവെന്ന ആരോപണവുമായി കോണ്‍ഗ്രസ് രംഗത്ത്. കോർബറ്റ് നാഷണൽ പാർക്കിൽ തെരഞ്ഞെടുപ്പ് പ്രചാരണത്തിന് വേണ്ടിയുള്ള ചിത്രീകരണത്തിലായിരുന്നു അദ്ദേഹം. വിവരം അറിഞ്ഞിട്ടും നാലു മണിക്കൂറോളം ചിത്രീകരണം തുടർന്നെന്നും കോണ്‍ഗ്രസ് വക്താവ് രൺദീപ് സിങ് സുർജേവാല ആഞ്ഞടിച്ചു.

കപട ദേശീയ വാദിയാണ് പ്രധാനമന്ത്രി നരേന്ദ്രമോദി. 40 ജവാൻമാർ മരിച്ചു കിടക്കുമ്പോൾ എങ്ങനെയാണ് മോദിയുടെ തൊണ്ടയിൽ നിന്ന് ഭക്ഷണം ഇറങ്ങിയതെന്ന് കോൺഗ്രസ് ചോദിച്ചു. ജവാൻമാരുടെ ജീവത്യാഗം കൊണ്ടുപോലും രാഷ്ട്രീയം കളിക്കുകയാണ് പ്രധാനമന്ത്രി. കനത്ത സുരക്ഷയുള്ള ദേശീയ പാതയിൽ ബോംബ് നിറച്ച വാഹനത്തിന് എത്താനായത് എങ്ങനെയെന്നും അവര്‍ ചോദിച്ചു. തിരിച്ചടിക്ക് പിന്തുണ കൊടുക്കുമ്പോഴും കേന്ദ്ര സർക്കാരിന്‍റെയും മോദിയുടെയും വീഴ്ചകൾ ദേശീയ വാദികളായ തങ്ങൾക്ക് ചോദ്യം ചെയ്യാമെന്നും രൺദീപ് സിങ് സുർജേവാല വ്യക്തമാക്കി.