തുണി സഞ്ചി നിര്‍മാണത്തില്‍ വിപ്ലവം സൃഷ്‌ടിച്ച് ഭോപ്പാല്‍

പഴയ വസ്‌ത്രങ്ങൾ തുണി സഞ്ചികളാക്കി മാറ്റുന്ന കിയോസ്‌കുകളിലൂടെ ശുചിത്വ സന്ദേശം നല്‍കി മധ്യപ്രദേശിന്‍റെ തലസ്ഥാന നഗരമായ ഭോപ്പാല്‍

ഭോപ്പാല്‍: പ്ലാസ്റ്റിക് മുക്ത നഗരത്തിനായി തുണി സഞ്ചി നിര്‍മാണത്തിലൂടെ വിപ്ലവം സൃഷ്‌ടിച്ച് മധ്യപ്രദേശിലെ ഭോപ്പാല്‍ മുനിസിപ്പല്‍ കോര്‍പ്പറേഷന്‍. ഇതിന്‍റെ ഭാഗമായി ഭോപ്പാലിലെ നിരവധിയിടങ്ങളിലാണ് തുണി സഞ്ചി നിര്‍മാണ കിയോസ്‌കുകൾ സ്ഥാപിച്ചിരിക്കുന്നത്. ഇത്തരം കിയോസ്‌കുകളിലൂടെ പഴയ വസ്‌ത്രങ്ങൾ തുണി സഞ്ചികളാക്കി മാറ്റിയെടുക്കും. അഞ്ച് രൂപയ്‌ക്കാണ് ഈ തുണി സഞ്ചികൾ വിതരണം ചെയ്യുന്നത്. പഴയ തുണികളുമായി ചെന്നാല്‍ തുണി സഞ്ചികൾ സൗജന്യമായി ലഭിക്കും. മികച്ച പ്രതികരണങ്ങൾ ലഭിക്കുമ്പോഴും ജനങ്ങൾ തുണി സഞ്ചികൾ വാങ്ങാന്‍ വിമുഖത കാട്ടുന്നുവെന്നതും യാഥാര്‍ഥ്യമാണെന്ന് കിയോസ്‌കിലെ തൊഴിലാളികൾ പറയുന്നു.

തുണി സഞ്ചിയുടെ ഉപയോഗം നഗരത്തിലെ പ്ലാസ്റ്റിക് മാലിന്യം കുറയ്‌ക്കാന്‍ സഹായിച്ചിട്ടുണ്ടെന്നാണ് അധികൃതരുടെ വിലയിരുത്തല്‍. കേന്ദ്ര സര്‍ക്കാരിന്‍റെ ശുചിത്വ സര്‍വേയില്‍ കഴിഞ്ഞ വര്‍ഷം രാജ്യത്തെ ഏറ്റവും വൃത്തിയുള്ള തലസ്ഥാന നഗരമായി തെരഞ്ഞെടുത്തത് ഭോപ്പാലിനെയായിരുന്നു. മധ്യപ്രദേശിലെ തന്നെ ഇന്‍ഡോറിനെ തുടര്‍ച്ചയായ മൂന്നാം വര്‍ഷവും ഇന്ത്യയിലെ ഏറ്റവും വൃത്തിയുള്ള നഗരമായും തെരഞ്ഞെടുത്തു.