അധ്യാപക നിയമനത്തിലെ ക്രമക്കേട്; ഉത്തർ പ്രദേശ് സർക്കാരിനെതിരെ പ്രിയങ്കാ ഗാന്ധി

പരീക്ഷാ ചോദ്യവുമായി ബന്ധപ്പെട്ട് എതിർപ്പുകൾ ഉയർന്നതിനെത്തുടർന്ന് അലഹബാദ് ഹൈക്കോടതി സംസ്ഥാനത്തെ 69,000 അധ്യാപകരുടെ നിയമനം സ്റ്റേ ചെയ്‌തിരുന്നു.

ന്യൂഡൽഹി: സംസ്ഥാനത്തെ അധ്യാപക നിയമനത്തിലുണ്ടായ ക്രമക്കേടില്‍ പ്രതിഷേധമറിയിച്ച് കോൺഗ്രസ് നേതാവ് പ്രിയങ്കാ ഗാന്ധി. അധ്യാപക നിയമനത്തിലെ ക്രമക്കേട് ഞെട്ടിക്കുന്നതാണെന്നും ഉത്തർ പ്രദേശിലെ യുവാക്കളുടെ ഭാവി സർക്കാർ നശിപ്പിക്കുകയാണെന്നും പ്രിയങ്കാ ഗാന്ധി പറഞ്ഞു. ട്വിറ്ററിലൂടെയായിരുന്നു പ്രിയങ്കാ ഗാന്ധിയുടെ പ്രതികരണം.

പരീക്ഷാ ചോദ്യവുമായി ബന്ധപ്പെട്ട് എതിർപ്പുകൾ ഉയർന്നതിനെത്തുടർന്ന് അലഹബാദ് ഹൈക്കോടതി സംസ്ഥാനത്തെ 69,000 അധ്യാപകരുടെ നിയമനം സ്റ്റേ ചെയ്‌തിരുന്നു. ഇതിനെ തുടർന്നാണ് പ്രതികരണവുമായി പ്രിയങ്കാ ഗാന്ധി രംഗത്തെത്തിയത്.