ഭോപ്പാല്‍:ഹിന്ദു മഹാസഭാ നേതാവ് വി ഡി സവര്‍ക്കര്‍, മഹാത്മ ഗാന്ധിയുടെ ഘാതകനായ നാഥുറാം ഗോഡ്‌സെയുമായി സ്വവര്‍ഗ ലൈംഗികബന്ധത്തിലായിരുന്നുവെന്ന മധ്യപ്രദേശ് കോണ്‍ഗ്രസിന്‍റെ ബുക്ക് ലെറ്റിനെതിരെ മുൻ കേന്ദ്രമന്ത്രി ഉമാ ഭാരതി. ലഘുലേഖയിലെ മുഴുവന്‍ കാര്യങ്ങളും അടിസ്ഥാനരഹിതമാണ്. എന്തുകൊണ്ടാണ് ഉദ്ധവ് താക്കറെ ഈ വിഷയത്തില്‍ മിണ്ടാതിരിക്കുന്നത്. അധികാരമാണോ സവര്‍ക്കറോടുള്ള ബഹുമാനമാണോ വലുതെന്നും ഉമാ ഭാരതി ചോദിച്ചു.
'വീർ സവർക്കർ എത്രമാത്രം ധൈര്യശാലിയായിരുന്നു' (വീര്‍ സവര്‍ക്കര്‍ കിതനാ വീര്‍) എന്ന തലക്കെട്ടോടുകൂടിയാണ് ലഘുലേഖ പുറത്തിറക്കിയത്. മധ്യപ്രദേശിലെ ഭോപ്പാലിൽ നടന്ന ആള്‍ ഇന്ത്യ കോണ്‍ഗ്രസ് സേവാ ദളിന്‍റെ ട്രെയിനിംഗ് ക്യാമ്പ് ഉദ്ഘാടന ചടങ്ങിലാണ് പതിനാല് പേജുള്ള ലഘുലേഖ വിതരണം ചെയ്തത്.