വോട്ടിങ് യന്ത്രത്തിലെ തകരാർ: ആശങ്കയുമായി പ്രതിപക്ഷ പാർട്ടികൾ

18 സംസ്ഥാനങ്ങളിലെയും രണ്ട് കേന്ദ്രഭരണ പ്രദേശങ്ങളിലെയും 117 മണ്ഡലങ്ങളിലായി ഇന്നലെ നടന്ന വോട്ടെടുപ്പിൽ പലയിടങ്ങളിലും വോട്ടിങ് യന്ത്രങ്ങൾ തകരാറിലായി. ഇതുമൂലം കേരളത്തിലടക്കം നിരവധി മണ്ഡലങ്ങളിൽ വളരെ വൈകിയാണ് വോട്ടിങ് പൂർത്തിയായത്.

ന്യൂഡല്‍ഹി: മൂന്നാം ഘട്ട തെരഞ്ഞെടുപ്പ് പൂർത്തിയാകുമ്പോൾ ഇലക്‌ട്രോണിക് വോട്ടിങ് യന്ത്രങ്ങളെക്കുറിച്ച് വ്യാപക പരാതിയാണ് പ്രതിപക്ഷ പാർട്ടികളില്‍ നിന്ന് ഉയരുന്നത്.

യന്ത്രങ്ങളില്‍ ഉണ്ടായിരുന്ന ക്രമക്കേടുകൾ പരിഹരിച്ചാണ് പലയിടങ്ങളിലും വോട്ടിങ് പുനരാരംഭിച്ചത്. ഇതിനാൽ നിശ്ചിത സമയം കഴിഞ്ഞും പോളിങ് നീണ്ടുപോയി. എല്ലാ ബൂത്തുകളിലും വിവി പാറ്റ് യന്ത്രങ്ങൾ ഉപയോഗിച്ചതും കൂടുതൽ കാലതാമസമുണ്ടാക്കി. കേരളത്തില്‍ തിരുവനന്തപുരം, ആലപ്പുഴ ലോക്സഭാ മണ്ഡലങ്ങളിലെ ചില ബൂത്തുകളില്‍ കൈപ്പത്തിക്ക് വോട്ട് ചെയ്യുമ്പോൾ താമര തെളിയുന്നതായി ആരോപണം ഉയർന്നിരുന്നു. ആരോപണം അടിസ്ഥാന രഹിതമാണെന്നും സാങ്കേതിക തകരാർ മാത്രമായിരുന്നു എന്നും തെരഞ്ഞെടുപ്പ് കമ്മിഷൻ വിശദീകരിച്ചിരുന്നു. ഇത് സംബന്ധിച്ച് പരാതി നല്‍കിയവരെ തെരഞ്ഞെടുപ്പ് കമ്മിഷന്‍റെ നിർദ്ദേശ പ്രകാരം പൊലീസ് കസ്റ്റഡിയില്‍ എടുത്ത ശേഷം വിട്ടയച്ചു.

വോട്ടിങ് യന്ത്രത്തിന്‍റെ തകരാറില്‍ തെരഞ്ഞെടുപ്പ് കമ്മിഷന് വിമർശനവുമായി മുഖ്യമന്ത്രി പിണറായി വിജയനും രംഗത്തെത്തിയിരുന്നു. അദ്ദേഹം വോട്ട് ചെയ്യാനെത്തിയ ബൂത്തിലെ വോട്ടിങ് യന്ത്രം പണിമുടക്കിയിരുന്നു. ഉത്തർപ്രദേശിലെ രാംപുരിൽ 300 ബൂത്തുകളിലെ യന്ത്രങ്ങൾ തകരാറിലായി എന്നാണ് എസ്.പി.യുടെ ആരോപണം.

വോട്ടിങ് യന്ത്രങ്ങളുടെ തകരാറുകളും ക്രമക്കേടും ഗൗരവമായി കാണണമെന്ന് പ്രതിപക്ഷ നേതാക്കളായ ശരദ് പവാറും ചന്ദ്രബാബു നായിഡുവും വാർത്താസമ്മേളനത്തിൽ ആവശ്യപ്പെട്ടു. വോട്ടിങ് യന്ത്രത്തിൽ രേഖപ്പെടുത്തുന്ന വോട്ടുകൾക്കൊപ്പം 50 ശതമാനം വിവി പാറ്റ് യന്ത്രങ്ങളിലെ സ്ലിപ്പുകൾ എണ്ണണമെന്ന ആവശ്യം പവാറും നായിഡുവും ആവർത്തിച്ചു. തെരഞ്ഞെടുപ്പിന് മുൻപ് ഉയർത്തിക്കൊണ്ട് വന്ന ‘വോട്ടിങ് യന്ത്രത്തിലെ ക്രമക്കേട്’ വോട്ടെടുപ്പിന്‍റെ ഇനിയുള്ള ഘട്ടങ്ങളിൽ സജീവമായി നിലനിർത്തുകയാണ് പ്രതിപക്ഷത്തിന്‍റെ ലക്ഷ്യം.