'യതി'യുടെ കാൽപ്പാടുകൾ കണ്ടെത്തിയെന്ന് ഇന്ത്യൻ സൈന്യം

നേപ്പാളിലെ മകാളു ബേസ് ക്യാമ്പിന് സമീപമാണ് യതിയുടേതെന്ന് കരുതുന്ന ഭീമൻ കാൽപ്പാടുകൾ സൈന്യം കണ്ടത്.

ന്യൂഡൽഹി: മഞ്ഞ് മനുഷ്യൻ എന്നറിയപ്പെടുന്ന യതിയുടെ കാല്‍പ്പാടുകള്‍ കണ്ടതായി ഇന്ത്യന്‍ സൈന്യം. നേപ്പാളിലെ മകാളു ബേസ് ക്യാമ്പിന് സമീപമാണ് യതിയുടേതെന്നു കരുതുന്ന ഭീമൻ കാൽപ്പാടുകൾ കാണപ്പെട്ടത്. സൈന്യത്തിന്‍റെ ഔദ്യോഗിക ട്വിറ്റർ അക്കൗണ്ടിലൂടെയാണ് യതിയുടേതെന്ന് പറയുന്ന കാൽപ്പാടുകളുടെ ചിത്രം പങ്കുവച്ചിരിക്കുന്നത്. സൈന്യത്തിന്‍റെ പർവതാരോഹക സംഘമാണ് ഈ കാൽപ്പാട് കണ്ടതെന്നും ട്വിറ്റര്‍ കുറിപ്പില്‍ പറയുന്നു.

32 ഇഞ്ച് നീളവും 15 ഇഞ്ച് വീതിയുമുള്ള കാൽപ്പാടിന്‍റെ ചിത്രമാണ് സൈന്യം പങ്കുവച്ചിരിക്കുന്നത്. ഏപ്രിൽ ഒമ്പതിനാണ് യതിയുടെ കാൽപ്പാടുകൾ കണ്ടതെന്നും ഇതിനു മുമ്പ് യതിയെ കണ്ടിട്ടുള്ളത് മക്കാലു-ബാരുൺ നാഷണല്‍ പാര്‍ക്കിന് സമീപം മാത്രമാണെന്നും ട്വിറ്ററില്‍ പറയുന്നു. നേപ്പാള്‍, ടിബറ്റ് എന്നിവിടങ്ങളിലെ ഹിമാലയൻ പ്രദേശങ്ങളിൽ ജീവിക്കുന്നുവെന്ന് പറയപ്പെടുന്ന മനുഷ്യക്കുരങ്ങ് പോലെയുള്ള ഒരു ജീവിയാണ് യതി. യതിയുടെ നിലനിൽപ്പ് ഇതുവരെ ശാസ്ത്രീയമായി തെളിയിക്കപ്പെട്ടിട്ടില്ല.