ന്യൂഡൽഹി: പൊതു-സ്വകാര്യ സഹകരണത്തോടെ ഏറ്റവും സുതാര്യമായ രീതിയിലാണ് ആരോഗ്യ സേതു ആപ്ലിക്കേഷൻ വികസിപ്പിച്ചതെന്ന് ഐടി മന്ത്രാലയം. ആപ്ലിക്കേഷൻ ആരാണ് വികസിപ്പിച്ചതെന്ന ചോദ്യങ്ങൾ ഉയർന്നതിനെ തുടർന്നാണ് സർക്കാർ വിശദീകരണവുമായെത്തിയത്.
ആരോഗ്യ സേതുവിനെക്കുറിച്ചുള്ള വിവരങ്ങൾ മറച്ചുവയ്ക്കുന്നതിനെതിരെ കേന്ദ്ര ഇൻഫർമേഷൻ കമ്മീഷൻ (സിഐസി) ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം (എംഇഇടി), നാഷണൽ ഇൻഫോർമാറ്റിക്സ് സെന്റർ, നാഷണൽ ഇ-ഗവേണൻസ് ഡിവിഷൻ എന്നിവയുടെ കേന്ദ്ര പബ്ലിക് ഇൻഫർമേഷൻ ഓഫീസർമാർക്ക് (സിപിഒ) കാരണം കാണിക്കൽ നോട്ടീസ് നൽകിയിരുന്നു. അധികാരികൾ വിവരങ്ങൾ പങ്കിടാത്തത് അംഗീകരിക്കാൻ കഴിയില്ലെന്ന് വിവരാവകാശ സമിതി നോട്ടീസിൽ അറിയിച്ചു. നവംബർ 24ന് ഹാജരാകാൻ ബന്ധപ്പെട്ട വകുപ്പുകളോട് ആവശ്യപ്പെട്ടിട്ടുണ്ട്.