2 ജി സ്പെക്ട്രം അഴിമതി; എ.രാജയെ കുറ്റവിമുക്തനാക്കിയതിനെതിരായ അപ്പീൽ ഇന്ന് പരിഗണിക്കും
2 ജി സ്പെക്ട്രം അഴിമതിയുമായി ബന്ധപ്പെട്ട സിബിഐ, ഇഡി കേസുകളിൽ രാജ, ഡിഎംകെ എംപി കനിമൊഴി എന്നിവരെയും 2017 ഡിസംബർ 21 ന് പ്രത്യേക കോടതി കുറ്റവിമുക്തരാക്കിയിരുന്നു
ന്യൂഡല്‍ഹി: 2 ജി സ്പെക്ട്രം അഴിമതി കേസിൽ മുൻ ടെലികോം മന്ത്രി എ രാജയെയും മറ്റുള്ളവരെയും കുറ്റവിമുക്തരാക്കുന്നതിനെ ചോദ്യം ചെയ്ത് സമര്‍പ്പിച്ച അപ്പീൽ ദില്ലി ഹൈക്കോടതി ഇന്ന് പരിഗണിക്കും. ജസ്റ്റിസ് ബ്രിജേഷ് സേതിയുടെ ബെഞ്ച് ആണ് ഹര്‍ജിയില്‍ വാദം കേള്‍ക്കുന്നത്. ഒക്ടോബർ 12 ന് ‘അപ്പീൽ നൽകാനുള്ള അവധി’ അപേക്ഷയിൽ നേരത്തെ വാദം കേൾക്കാൻ സെപ്റ്റംബറിൽ ഹൈക്കോടതി അനുവദിക്കുകയും ഒക്ടോബർ 5 ന് വാദങ്ങൾ കേള്‍ക്കാനായി പട്ടികപ്പെടുത്തുകയും ചെയ്തു. 2019 ഒക്ടോബർ 24 മുതൽ 2020 ജനുവരി 15 വരെ സിബിഐ കോടതി വിപുലമായി വാദം കേട്ടിട്ടുണ്ട്. അതേസമയം കോവിഡ് -19 കാരണം മാർച്ച് മുതൽ ഹിയറിംഗുകൾ തുടരാനായില്ല. അഴിമതിയുമായി ബന്ധപ്പെട്ട സിബിഐ, ഇഡി കേസുകളിൽ രാജ, ഡിഎംകെ എംപി കനിമൊഴി എന്നിവരെയും 2017 ഡിസംബർ 21 ന് പ്രത്യേക കോടതി കുറ്റവിമുക്തരാക്കിയിരുന്നു. എസാർ ഗ്രൂപ്പ് പ്രമോട്ടർമാരായ രവി കാന്ത് റുയ, അൻഷുമാൻ റുയ, ലൂപ്പ് ടെലികോം പ്രമോട്ടർമാരായ ഐ പി ഖൈതാൻ, കിരൺ ഖൈതൻ എന്നിവരെയും 2 ജി അഴിമതി അന്വേഷണത്തിൽ നിന്ന് പ്രത്യേക കോടതി കുറ്റവിമുക്തരാക്കിയിരുന്നു. പ്രതികളെ മുഴുവൻ കുറ്റവിമുക്തരാക്കിയ പ്രത്യേക കോടതിയുടെ ഉത്തരവിനെ ചോദ്യം ചെയ്ത് 2018 മാർച്ചിൽ ഇഡിയും സിബിഐയും ഹൈക്കോടതിയെ സമീപിച്ചിരുന്നു.