ഉത്തരാഖണ്ഡിലെ ഹിമപാതത്തിന്‍റെ ദൃശ്യങ്ങള്‍
ഡെറാഡൂണ്‍:ഉത്തരാഖണ്ഡിലെ ചമോലിയില്‍ ഹിമപാതം. ജോഷിമഠിലെ മലരി ഗ്രാമത്തിലാണ് ഇന്ന് ഹിമപാതമുണ്ടായത്. ഹിമാലയത്തില്‍ തുടരുന്ന കനത്ത മഴയെ തുടര്‍ന്നാണ് ഹിമാപാതം. ഹിമാലയത്തിന്‍റെ മുകളില്‍ നിന്ന് വലിയ മഞ്ഞ് പാളി താഴേക്ക് പതിച്ചു. ആളപായമോ വസ്‌തുവകകളുടെ നാശനഷ്‌ടമോ റിപ്പോര്‍ട്ട് ചെയ്‌തിട്ടില്ല.
ചമോലിയില്‍ കഴിഞ്ഞ കുറച്ച് ദിവസമായി പ്രതികൂല കാലാവസ്ഥയാണ്. ഉയര്‍ന്ന മേഖലയില്‍ കനത്ത മഞ്ഞ് വീഴ്‌ചയാണ് ഉണ്ടാകുന്നത്. ജില്ലയിലെ ബദരീനാഥ് ധാം, ഹേമകുണ്ഡ് സാഹിബ്, ഔലി, ദിവാലിഖല്‍ മണ്ഡല്‍ എന്നീ പ്രദേശങ്ങളില്‍ മഞ്ഞ് വീഴ്‌ച ആരംഭിച്ചിട്ടുണ്ടെന്നാണ് റിപ്പോര്‍ട്ട്. മേഖലയിലെ പ്രതികൂല കാലാവസ്ഥയെ തുടര്‍ന്ന് ജനജീവിതം ദുസഹമായി. ജനങ്ങള്‍ വീടുകളില്‍ തന്നെ തുടരുകയാണ്.