ബറേലി (യുപി): കർണാടകയിൽ നടക്കുന്ന ഹിജാബ് വിവാദത്തിൽ പ്രധാനമന്ത്രി നരേന്ദ്ര മോദിയുടെ മൗനത്തെ ചോദ്യം ചെയ്‌ത് എഐഎംഐഎം അധ്യക്ഷനും എംപിയുമായ അസദുദ്ദീന്‍ ഒവൈസി. ഉത്തർപ്രദേശിലെ ബറേലിയിൽ നടന്ന തെരഞ്ഞെടുപ്പ് പ്രചാരണത്തിനിടെയായിരുന്നു ഒവൈസിയുടെ വിമര്‍ശനം.
'ഭരണഘടന എല്ലാ പൗരന്മാർക്കും മതപരമായ അവകാശങ്ങൾ ഉറപ്പുനൽകുന്നു. വിഷയത്തില്‍ എന്തുകൊണ്ടാണ് പ്രധാനമന്ത്രി പ്രതികരിക്കാതിരുന്നത്,' ഒവൈസി ചോദിച്ചു. എഐഎംഐഎം ഒഴികെ മറ്റൊരു പാർട്ടിയും വിഷയത്തില്‍ പ്രതികരിച്ചില്ലെന്നും എഐഎംഐഎം അധ്യക്ഷന്‍ കുറ്റപ്പെടുത്തി.
എസ്‌പിയും ബിഎസ്‌പിയും മുസ്‌ലിങ്ങളോട് നീതി പുലർത്തിയില്ലെന്നും ഉവൈസി ആരോപിച്ചു. 'ബിജെപിയോടുള്ള ഭയം പ്രകടിപ്പിച്ച് മുസ്‌ലിം വോട്ടുകൾ നേടാനാണ് അഖിലേഷ് യാദവിന്‍റെ ആഗ്രഹമെങ്കിലും മുസ്‌ലീം യുവജനങ്ങള്‍ക്ക് ഭയമില്ല. പോസ്റ്റർ ഒട്ടിക്കുന്ന ജോലി ഇനി അവർ ചെയ്യില്ല. പകരം, അവരുടെ ഭാഗം അവര്‍ തന്നെ ചെയ്യും,' ഒവൈസി പറഞ്ഞു.