ഹൈദരാബാദ്: ഉത്തരാഖണ്ഡ് സന്ദർശിച്ച് ദിവസങ്ങൾ പിന്നിടുമ്പോള്‍ ബോളിവുഡ് സൂപ്പര്‍താരം അക്ഷയ് കുമാര്‍ ഡല്‍ഹിയില്‍ എത്തിയിരിക്കുകയാണ്. തന്‍റെ വരാനിരിക്കുന്ന പുതിയ സിനിമയുടെ ചിത്രീകരണവുമായി ബന്ധപ്പെട്ടാണ് താരം ഇപ്പോള്‍ ഡല്‍ഹിയില്‍ എത്തിയിരിക്കുന്നത്.
തിങ്കളാഴ്‌ചയാണ് ജമാ മസ്‌ജിദിന് സമീപം നില്‍ക്കുന്ന അക്ഷയ് കുമാറിന്‍റെ വീഡിയോ സോഷ്യല്‍ മീഡിയയില്‍ പ്രത്യക്ഷപ്പെട്ടത്. കടും ചാര നിറമുള്ള ഷര്‍ട്ടും നേവി ബ്ലൂ നിറമുള്ള പാന്‍റ്‌സുമാണ് അക്ഷയ് കുമാര്‍ ധരിച്ചിരിക്കുന്നത്. കറുത്ത കൂളിംഗ് ഗ്ലാസും താരം ധരിച്ചിട്ടുണ്ട്.
ജമാ മസ്‌ജിദിനുള്ളില്‍ നിന്നും പുറത്തേയ്‌ക്ക് ഇറങ്ങി വരുന്ന അക്ഷയ് കുമാറിനെ കാണുമ്പോള്‍ ആരാധകര്‍ ആര്‍പ്പുവിളിക്കുന്നതാണ് വീഡിയോയില്‍ കാണാനാവുക. പ്രിയ താരത്തെ ഒരു നോക്ക് കാണാന്‍ മസ്‌ജിദിന് സമീപം ആരാധകര്‍ തടിച്ചു കൂടിയിരുന്നു. അക്ഷയ് കുമാറിനെ കാണുന്നതും ആരാധകര്‍ ഉച്ചത്തില്‍ ആര്‍പ്പുവിളിക്കുകയും വിസിലുകള്‍ മുഴക്കുകയും കയ്യടിക്കുകയും ചെയ്യുന്നതാണ് വീഡിയോയില്‍ കാണാനാവുക.
മസ്‌ജിദിന് പുറത്തേയ്‌ക്ക് ഇറങ്ങിവരുന്ന താരം ആരാധകരെ അഭിവാദ്യം ചെയ്യുന്നതും വീഡിയോയില്‍ കാണാം. ആദ്യം താരം ആരാധകര്‍ക്ക് നേരെ കൈവീശി. പിന്നീട്, തന്‍റെ കാറിനടുത്തേക്ക് നടക്കുമ്പോൾ, അക്ഷയ് കുമാര്‍ ഒരിക്കല്‍ കൂടി ആരാധകര്‍ക്ക് നേരെ കൈവീശുകയും കൈ കൂപ്പുകയും ചെയ്യുന്നു. ഏറ്റവും ഒടുവില്‍ താരം ആരാധകരെ അഭിവാദ്യം ചെയ്‌തു മടങ്ങി. അക്ഷയ്‌ക്കൊപ്പം സുരക്ഷാ ജീവനക്കാരും ഉണ്ടായിരുന്നു.
റിപ്പോര്‍ട്ടുകള്‍ പ്രകാരം 'ശങ്കര' എന്ന സിനിമയുടെ ചിത്രീകരണ തിരക്കിലാണിപ്പോള്‍ അക്ഷയ് കുമാര്‍. സിനിമയുടെ ചിത്രീകരണവുമായി ബന്ധപ്പെട്ട് താരം ഉത്തരാഖണ്ഡിലേക്ക് യാത്ര പോയിരുന്നു. മെയ് 28ന് അക്ഷയ് കുമാര്‍ ഉത്തരാഖണ്ഡിലെ അൽമോറ ജില്ലയിലെ ഹിന്ദു തീര്‍ത്ഥാടന കേന്ദ്രമായ ജഗേശ്വർ ഡാം സന്ദര്‍ശിച്ച് പ്രാര്‍ഥനകള്‍ നടത്തിയിരുന്നു. കർശന സുരക്ഷയ്‌ക്കിടയിലായിരുന്നു താരത്തിന്‍റെ ഈ ജഗേശ്വര്‍ ഡാം സന്ദര്‍ശനം. കേദാർനാഥ് ക്ഷേത്ര സന്ദർശനം കഴിഞ്ഞ് ദിവസങ്ങള്‍ക്ക് ശേഷമാണ് താരം ജഗേശ്വര ക്ഷേത്രം സന്ദര്‍ശിച്ച് അനുഗ്രഹം തേടിയത്.
കേദാർനാഥ് ക്ഷേത്ര സന്ദര്‍ശനം കഴിഞ്ഞ് അക്ഷയ് കുമാര്‍ ഉത്തരാഖണ്ഡ് മുഖ്യമന്ത്രി പുഷ്‌കർ സിംഗ് ധാമിയെ സന്ദർശിച്ചു. സന്ദര്‍ശന വേളയില്‍ മുഖ്യമന്ത്രി ധാമി, താരത്തിന് ഒരു പരമ്പരാഗത ഷാളും മൊമന്‍റോയും സമ്മാനിച്ചിരുന്നു. കൂടിക്കാഴ്‌ചയില്‍, ഉത്തരാഖണ്ഡിനെ പുതിയ സിനിമ വ്യവസായ കേന്ദ്രമായി ഉയർത്തുന്നതിനെ കുറിച്ച് മുഖ്യമന്ത്രിയും അക്ഷയ് കുമാറും ചർച്ച ചെയ്‌തു.