ಶಿರಸಿಯಲ್ಲಿ ಅಭಿಮಾನಿಗಳೊಂದಿಗೆ 'ಭೈರತಿ ರಣಗಲ್' ವೀಕ್ಷಿಸಿದ ಶಿವರಾಜ್​ಕುಮಾರ್

ಶಿರಸಿಯ ನಟರಾಜ ಚಿತ್ರಮಂದಿರದಲ್ಲಿ ನಟ ಶಿವರಾಜ್​ಕುಮಾರ್ ಅಭಿಮಾನಿಗಳೊಂದಿಗೆ 'ಭೈರತಿ ರಣಗಲ್' ಸಿನಿಮಾ ವೀಕ್ಷಿಸಿದರು.

ಶಿರಸಿ (ಉತ್ತರ ಕನ್ನಡ): ಕರುನಾಡ ಚಕ್ರವರ್ತಿ, ನಟ ಡಾ. ಶಿವರಾಜ್​ ಕುಮಾರ್​ ಭಾನುವಾರ ಶಿರಸಿಯ ನಟರಾಜ ಚಿತ್ರಮಂದಿರದಲ್ಲಿ ಅಭಿಮಾನಿಗಳ ಜೊತೆ ಭೈರತಿ ರಣಗಲ್ ಚಿತ್ರ ವೀಕ್ಷಿಸಿದರು.

ಸೋಮವಾರ ತಮ್ಮ ಸಂಬಂಧಿಕರ ಮದುವೆಯ ಹಿನ್ನೆಲೆಯಲ್ಲಿ ಶಿವರಾಜ್ ಕುಮಾರ್ ಶಿರಸಿಗೆ ಆಗಮಿಸಿದ್ದಾರೆ. ಅಭಿಮಾನಿಗಳ ಒತ್ತಾಯದ ಮೇರೆಗೆ ತಮ್ಮದೇ ಸೂಪರ್ ಹಿಟ್ ಚಿತ್ರವನ್ನು ಸಚಿವ ಮಧು ಬಂಗಾರಪ್ಪ, ಶಾಸಕ ಭೀಮಣ್ಣ ನಾಯ್ಕ, ಗೀತಾ ಶಿವರಾಜ್​ಕುಮಾರ್ ಇತರರೊಂದಿಗೆ ವೀಕ್ಷಣೆ ಮಾಡಿದರು.‌

ಇದಕ್ಕೂ ಮೊದಲು ಚಿತ್ರ ಮಂದಿರದ ಎದುರು ನೆರೆದಿದ್ದ ಸಾವಿರಾರು ಸಂಖ್ಯೆಯ ಅಭಿಮಾನಿಗಳು ಹೂವಿನ ಮಳೆ ಸುರಿದರು. ಬೃಹತ್ ಹೂವಿನ ಹಾರ ಹಾಕಿ ಡಾ. ಶಿವರಾಜ್​ಕುಮಾರ್ ಅವರನ್ನು ಸ್ವಾಗತಿಸಿದರು. ಇದೇ ವೇಳೆ ನೆಚ್ಚಿನ ನಟನನ್ನು ನೋಡಲು ಸಾಕಷ್ಟು ನೂಕುನುಗ್ಗಲು ಉಂಟಾಗಿತ್ತು. ಚಿತ್ರ ಮಂದಿರದ ಬಾಲ್ಕನಿಯಲ್ಲಿ ಕುಳಿತು ಶಿವಣ್ಣ ಚಿತ್ರ ವೀಕ್ಷಿಸಿದರು. ಚಿತ್ರಮಂದಿರ ಹೌಸ್ ಫುಲ್ ಆಗಿತ್ತು.

ಶಿರಸಿಯಲ್ಲಿ ಭೈರತಿ ರಣಗಲ್ ಬಿಡುಗಡೆಯಾದ ನಂತರದಿಂದ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಅದರಲ್ಲೂ ಶಿವರಾಜ್​ಕುಮಾರ್ ಸ್ವತಃ ಆಗಮಿಸಿದ ಹಿನ್ನೆಲೆಯಲ್ಲಿ ಚಿತ್ರಮಂದಿರವನ್ನು ಶೃಂಗರಿಸಿ, ಪಟಾಕಿ ಸಿಡಿಸಿ ಸಂಭ್ರಮಿಸಲಾಯಿತು.

ಇದನ್ನೂ ಓದಿ :ಚಿಕಿತ್ಸೆಗಾಗಿ ಮುಂದಿನ ತಿಂಗಳು ಯುಎಸ್​ಗೆ ಹೋಗುತ್ತಿದ್ದೇನೆ: ನಟ ಶಿವರಾಜ್ ​ಕುಮಾರ್​