ಹೆಣ್ಣೆಂದರೆ ಒಂದು ಅದ್ಭುತ. ಸೃಷ್ಟಿಯ ಮೂಲ ನಾರಿ. ಆ ಸೃಷ್ಟಿಗೆ ಅಡಿಪಾಯ ಮಹಿಳೆಯರ ಋತುಚಕ್ರ. ಅವರ ಆರೋಗ್ಯಕ್ಕೆ ಉಳಿದೆಲ್ಲವುಗಳ ಜೊತೆಗೆ ಆರೋಗ್ಯಕರ ಮುಟ್ಟಿನ ಚಕ್ರವೂ ಪ್ರಮುಖವಾಗುತ್ತದೆ. ಆರೋಗ್ಯಕರ ಮುಟ್ಟಿನ ಚಕ್ರ, ಉತ್ತಮ ಸಂತಾನೋತ್ಪತ್ತಿ ಆರೋಗ್ಯ ಮಾತ್ರವಲ್ಲ, ಮಹಿಳೆಯ ಒಟ್ಟಾರೆ ಯೋಗಕ್ಷೇಮದ ಪ್ರತಿಬಿಂಬವೂ ಹೌದು. ಅದಕ್ಕಾಗಿ ಪ್ರತಿಯೊಬ್ಬ ಮಹಿಳೆಯೂ ತನ್ನ ಋತುಚಕ್ರದ ಬಗ್ಗೆ ಗಮನಹರಿಸುವುದು ಹಾಗೂ ಆರೋಗ್ಯಕರ ಹಾಗೂ ಸಾಮಾನ್ಯ ಋತುಚಕ್ರ ಎಂದರೆ ಏನು ಎಂಬುದನ್ನು ಅರ್ಥ ಮಾಡಿಕೊಳ್ಳುವುದು ಅತ್ಯಗತ್ಯ.
ಆರೋಗ್ಯಕರ ಋತುಚಕ್ರದ ಬಗ್ಗೆ ಎಲ್ಲಾ ರೀತಿಯ ಮಾಹಿತಿಯನ್ನು ತಿಳಿದುಕೊಂಡಿದ್ದರೆ, ಮಹಿಳೆಯು ತನ್ನ ಸಂತಾನೋತ್ಪತ್ತಿ ಆರೋಗ್ಯ ಉತ್ತಮವಾಗಿರುವಂತೆ ನೋಡಿಕೊಳ್ಳಬಹುದು. ಯಾವುದೇ ಸಮಸ್ಯೆಗಳು ಉಂಟಾದರೆ ತಕ್ಷಣ ವೈದ್ಯಕೀಯ ಆರೈಕೆಯನ್ನು ಪಡೆಯಬೇಕು. ಆರೋಗ್ಯಕರ ಋತುಚಕ್ರದ ಐದು ಚಿಹ್ನೆಗಳ ಬಗ್ಗೆ ಮೆಡಿಸೇವಾ ಸಂಸ್ಥಾಪಕ ಹಾಗೂ ಡಿಇಎಂ ಡಾ. ವಿಶೇಶ್ ಕಸ್ಲಿವಾಲ್ ಮಾಹಿತಿ ಹಂಚಿಕೊಂಡಿದ್ದಾರೆ. ಅವುಗಳು ಈ ಕೆಳಗಿನಂತಿವೆ.
ರೆಗ್ಯುಲರ್ ಸೈಕಲ್ ಲೆಂತ್(Regular Cycle Length):ನಿಯಮಿತ ಮುಟ್ಟಿನ ಚಕ್ರವು ಸಾಮಾನ್ಯವಾಗಿ 21 ರಿಂದ 35 ದಿನಗಳವರೆಗೆ ಇರುತ್ತದೆ. ಮಹಿಳೆಯಿಂದ ಮಹಿಳೆಗೆ ಈ ಅವಧಿ ಸ್ವಲ್ಪ ಬದಲಾಗಬಹುದು. ಆದರೆ ಸ್ಥಿರತೆ ಮುಖ್ಯವಾಗುತ್ತದೆ. ಊಹಿಸಬಹುದಾದ ಋತುಚಕ್ರದ ಲೆಂತ್ ಹೊಂದಿರುವ ದೇಹವು ನಿಯಮಿತವಾಗಿ ಅಂಡೋತ್ಪತ್ತಿ ಮಾಡುತ್ತದೆ ಮತ್ತು ಸಂಭಾವ್ಯ ಫಲೀಕರಣಕ್ಕಾಗಿ ಮೊಟ್ಟೆಯನ್ನು ಬಿಡುಗಡೆ ಮಾಡುತ್ತದೆ ಎಂದು ಸೂಚಿಸುತ್ತದೆ. ಅನಿಯಮಿತ ಚಕ್ರಗಳು ಒಂದೆಡೆ, ಹಾರ್ಮೋನುಗಳ ಅಸಮತೋಲನ, ಒತ್ತಡ ಅಥವಾ ಇತರ ಆಧಾರವಾಗಿರುವ ಆರೋಗ್ಯ ಸಮಸ್ಯೆಗಳನ್ನು ಸೂಚಿಸಬಹುದು. ನಿಮ್ಮ ಋತುಚಕ್ರವು ನಿಯಮಿತವಾಗಿ ವಿಶಿಷ್ಟ ವ್ಯಾಪ್ತಿಯಿಂದ ಹೊರಗಿದ್ದರೆ, ಕಾರಣವನ್ನು ಕಂಡುಕೊಳ್ಳಲು ವೈದ್ಯರನ್ನು ಭೇಟಿ ಮಾಡುವುದು ಸೂಕ್ತವಾಗಿದೆ.
ಸಾಮಾನ್ಯ ರಕ್ತಸ್ರಾವ (Normal Bleeding): ಮುಟ್ಟಿನ ರಕ್ತಸ್ರಾವದ ಪ್ರಮಾಣ ಮತ್ತು ಅವಧಿಯು ಮಹಿಳೆಯಿಂದ ಮಹಿಳೆಗೆ ಬದಲಾಗಬಹುದು. ಆದಾಗ್ಯೂ, ಆರೋಗ್ಯಕರ ಋತುಚಕ್ರವು ಸರಾಸರಿ ಎರಡರಿಂದ ಏಳು ದಿನಗಳವರೆಗೆ ಮಧ್ಯಮದಿಂದ ಭಾರೀ ಹರಿವನ್ನು ಒಳಗೊಂಡಿರುತ್ತದೆ. ಪ್ರತಿ ಎರಡು ಗಂಟೆಗಳಿಗಿಂತಲೂ ಹೆಚ್ಚು ಬಾರಿ ನೈರ್ಮಲ್ಯ ಉತ್ಪನ್ನಗಳನ್ನು ಬದಲಾಯಿಸುವ ಅಗತ್ಯವಿರುವಷ್ಟು ಅತಿಯಾದ ರಕ್ತಸ್ರಾವವನ್ನು ನೀವು ಅನುಭವಿಸಿದರೆ ಅಥವಾ ನಿಮ್ಮ ಅವಧಿಯು ಏಳು ದಿನಗಳಿಗಿಂತ ಹೆಚ್ಚು ಕಾಲ ಇದ್ದರೆ, ಇದು ಗರ್ಭಾಶಯದ ಫೈಬ್ರಾಯ್ಡ್‌ಗಳು ಅಥವಾ ಹಾರ್ಮೋನುಗಳ ಅಸಮತೋಲನದಂತಹ ಆರೋಗ್ಯ ಸ್ಥಿತಿಯ ಸಂಕೇತವಾಗಿರಬಹುದು. ಅಂತೆಯೇ, ಅಸಹಜವಾಗಿ ಸ್ವಲ್ಪ ರಕ್ತಸ್ರಾವ ಅಥವಾ ಬಿಂದುಗಳಷ್ಟೇ ರಕ್ತಸ್ರಾವವಾಗುತ್ತಿದೆಯಾದರೆ ಅಂಡೋತ್ಪತ್ತಿ ಅಥವಾ ಗರ್ಭಾಶಯದ ಒಳಪದರದ ಸಮಸ್ಯೆಗಳನ್ನು ಸೂಚಿಸಬಹುದು. ಈ ರೀತಿಯ ಯಾವುದೇ ಲಕ್ಷಣಗಳು ಕಂಡುಬಂದರೂ ವೈದ್ಯರ ಬಳಿ ಸಲಹೆ ಪಡೆಯುವುದು ಉತ್ತಮ.
ಕನಿಷ್ಠ ನೋವು ಮತ್ತು ಅಸ್ವಸ್ಥತೆ (Minimal Pain and Discomfort): ಮುಟ್ಟಿನ ಸಮಯದಲ್ಲಿ ಸ್ವಲ್ಪ ಮಟ್ಟಿಗೆ ಅಸ್ವಸ್ಥತೆ ಸಾಮಾನ್ಯ. ಆದರೆ ಅತಿಯಾದ ನೋವು ಅಥವಾ ದುರ್ಬಲಗೊಳಿಸುವ ಸೆಳೆತಗಳು ಸಮಸ್ಯೆಯ ಸಂಕೇತವಾಗಿರಬಹುದು. ಗರ್ಭಾಶಯದ ಸಂಕೋಚನದಿಂದ ಉಂಟಾಗುವ ಸೌಮ್ಯವಾದ ಸೆಳೆತ ಸಾಮಾನ್ಯವಾಗಿರುತ್ತದೆ. ಆದರೆ ದೈನಂದಿನ ಚಟುವಟಿಕೆಗಳಿಗೆ ಅಡ್ಡಿಪಡಿಸುವ ಅಥವಾ ನೋವಿನ ಔಷಧ ಸೇವಿಸಬೇಕೆನ್ನುವಷ್ಟು ತೀವ್ರವಾದ ನೋವಿದ್ದರೆ ನಿರ್ಲಕ್ಷಿಸುವುದು ಬೇಡ. ಎಂಡೊಮೆಟ್ರಿಯೊಸಿಸ್, ಶ್ರೋಣಿಯ ಉರಿಯೂತದ ಕಾಯಿಲೆ ಅಥವಾ ಫೈಬ್ರಾಯ್ಡ್‌ಗಳಂತಹ ಪರಿಸ್ಥಿತಿಗಳು ತೀವ್ರವಾದ ಮುಟ್ಟಿನ ನೋವನ್ನು ಉಂಟುಮಾಡಬಹುದು. ನಿಮ್ಮ ಋತುಚಕ್ರದ ಸಮಯದಲ್ಲಿ ನೀವು ತೀವ್ರವಾದ ನೋವನ್ನು ಅನುಭವಿಸಿದರೆ, ನಿಖರವಾದ ರೋಗನಿರ್ಣಯ ಮತ್ತು ಸರಿಯಾದ ಚಿಕಿತ್ಸೆಗಾಗಿ ವೈದ್ಯಕೀಯ ಸಲಹೆಯನ್ನು ಪಡೆಯುವುದು ಬಹಳ ಮುಖ್ಯ.
ಕನ್ಸಿಸ್ಟೆನ್ಸಿ ಋತುಚಕ್ರದ ಲೆಂತ್ (Consistent Cycle Length): ಋತುಚಕ್ರದ ಲೆಂತ್ನಲ್ಲಿನ ಸ್ಥಿರತೆ ಆರೋಗ್ಯಕರ ಋತುಚಕ್ರದ ಮತ್ತೊಂದು ಪ್ರಮುಖ ಸಂಕೇತ. ಇದರರ್ಥ ಒಂದು ಋತುಚಕ್ರದ ಪ್ರಾರಂಭ ಮತ್ತು ಮುಂದಿನ ಋತುಚಕ್ರದ ಪ್ರಾರಂಭದ ನಡುವಿನ ಅವಧಿಯು ತುಲನಾತ್ಮಕವಾಗಿ ಸ್ಥಿರವಾಗಿರುತ್ತದೆ. ಕ್ಯಾಲೆಂಡರ್‌ನಲ್ಲಿ ನಿಮ್ಮ ಚಕ್ರಗಳನ್ನು ಟ್ರ್ಯಾಕ್ ಮಾಡುವುದು ಅಥವಾ ಅವಧಿ-ಟ್ರ್ಯಾಕಿಂಗ್ ಅಪ್ಲಿಕೇಶನ್ ಅನ್ನು ಬಳಸುವುದು ಯಾವುದೇ ಸಮಸ್ಯೆಗಳು ಅಥವಾ ಚಕ್ರದ ಲೆಂತ್ನಲ್ಲಿನ ಬದಲಾವಣೆಗಳನ್ನು ಗುರುತಿಸಲು ಸಹಾಯ ಮಾಡುತ್ತದೆ. ನಿಮ್ಮ ಋತುಚಕ್ರದ ಲೆಂತ್ನಲ್ಲಿನ ಗಮನಾರ್ಹ ವ್ಯತ್ಯಾಸಗಳು ಅಥವಾ ಹಠಾತ್ ಬದಲಾವಣೆಗಳು ಹಾರ್ಮೋನುಗಳ ಅಸಮತೋಲನ, ಒತ್ತಡ ಅಥವಾ ಇತರ ಆರೋಗ್ಯ ಪರಿಸ್ಥಿತಿಗಳನ್ನು ಸೂಚಿಸಬಹುದು. ನಿಮ್ಮ ಋತುಚಕ್ರದ ಲೆಂತ್ನಲ್ಲಿ ನಿರಂತರ ಅಸಮತೋಲನ ಗಮನಿಸಿದರೆ ವೈದ್ಯರನ್ನು ಸಂಪರ್ಕಿಸಿ.
ಸಮತೋಲಿತ ಮನಸ್ಥಿತಿ ಮತ್ತು ಶಕ್ತಿಯ ಮಟ್ಟಗಳು (Balanced Mood and Energy Levels):ಋತುಚಕ್ರದ ಸಮಯದಲ್ಲಿ ಹಾರ್ಮೋನುಗಳ ಏರಿಳಿತಗಳು ಮನಸ್ಥಿತಿ ಮತ್ತು ಶಕ್ತಿಯ ಮಟ್ಟದ ಮೇಲೆ ಪರಿಣಾಮ ಬೀರಬಹುದು. ಆದಾಗ್ಯೂ, ಆರೋಗ್ಯಕರ ಋತುಚಕ್ರವು ಮೂಡ್ ಸ್ವಿಂಗ್ಗಳು ಮತ್ತು ಶಕ್ತಿಯ ಮಟ್ಟದಲ್ಲಿ ಸ್ವಲ್ಪ ಬದಲಾವಣೆಗಳಿಗೆ ಮಾತ್ರ ಕಾರಣವಾಗಿರುತ್ತದೆ. ಋತುಚಕ್ರದ ಮಸಯದಲ್ಲಿ ಅತಿಯಾದ ಆಯಾಸ, ತೀವ್ರವಾದ ಮನಸ್ಥಿತಿ ಬದಲಾವಣೆಗಳನ್ನು ಅನುಭವ ಅಥವಾ ನಿರಂತರವಾದ ದುಃಖ ಅಥವಾ ಆತಂಕದ ಭಾವನೆಗಳೊಂದಿಗೆ ಹೋರಾಡುವುದು ಹಾರ್ಮೋನುಗಳ ಅಸಮತೋಲನ ಅಥವಾ ಪ್ರೀ ಮೆನ್ಸ್ಟ್ರುವಲ್ ಡಿಸ್ಫೊರಿಕ್ ಡಿಸಾರ್ಡರ್ (PMDD) ನಂತಹ ಲಕ್ಷಣವೂ ಆಗಿರಬಹುದು. ಈ ರೋಗಲಕ್ಷಣಗಳು ನಿಮ್ಮ ದೈನಂದಿನ ಜೀವನದ ಮೇಲೆ ಗಮನಾರ್ಹವಾಗಿ ಪರಿಣಾಮ ಬೀರಿದರೆ, ವೈದ್ಯರಿಂದ ಸೂಕ್ತವಾದ ಲಸಹೆ ಪಡೆಯುವುದು ಮುಖ್ಯ.
ಮಹಿಳೆಯರ ಒಟ್ಟಾರೆ ಯೋಗಕ್ಷೇಮಕ್ಕಾಗಿ ಆರೋಗ್ಯಕರ ಋತುಚಕ್ರದ ಚಿಹ್ನೆಗಳಿಗೆ ಗಮನ ಕೊಡವುದು ಅಗತ್ಯವಾಗಿದೆ. ನಿಯಮಿತ ಋತುಚಕ್ರದ ಲೆಂತ್, ಸಾಮಾನ್ಯ ರಕ್ತಸ್ರಾವದ ಮಾದರಿಗಳು, ಕನಿಷ್ಠ ನೋವು ಮತ್ತು ಅಸ್ವಸ್ಥತೆ, ಸ್ಥಿರವಾದ ಋತುಚಕ್ರದ ಲೆಂತ್, ಮತ್ತು ಸಮತೋಲಿತ ಮನಸ್ಥಿತಿ ಮತ್ತು ಶಕ್ತಿಯ ಮಟ್ಟಗಳು ಸಂತಾನೋತ್ಪತ್ತಿ ಆರೋಗ್ಯದ ಎಲ್ಲಾ ಪ್ರಮುಖ ಸೂಚಕಗಳಾಗಿವೆ. ಇಂತಹ ಚಿಹ್ನೆಗಳ ಯಾವುದೇ ಬದಲಾವಣೆಯನ್ನು ನಿರ್ಲಕ್ಷ ಮಾಡಬಾರದು. ಏಕೆಂದರೆ ಅವು ವೈದ್ಯಕೀಯ ಆರೈಕೆಯ ಅಗತ್ಯವಿರುವ ಆರೋಗ್ಯ ಸಮಸ್ಯೆಗಳನ್ನು ಸೂಚಿಸಬಹುದು. ಆರೋಗ್ಯಕರ ಮುಟ್ಟಿನ ಚಕ್ರವನ್ನು ಅರ್ಥಮಾಡಿಕೊಳ್ಳುವ ಮೂಲಕ ಮತ್ತು ಸೂಕ್ತವಾದ ಆರೈಕೆಯನ್ನು ಪಡೆಯುವ ಮೂಲಕ, ಮಹಿಳೆಯರು ತಮ್ಮ ಸಂತಾನೋತ್ಪತ್ತಿ ಆರೋಗ್ಯವನ್ನು ಪೂರ್ವಭಾವಿಯಾಗಿ ನಿರ್ವಹಿಸಬಹುದು ಮತ್ತು ಅವರ ಒಟ್ಟಾರೆ ಯೋಗಕ್ಷೇಮವನ್ನು ಕಾಪಾಡಿಕೊಳ್ಳಬಹುದು.
ಇದನ್ನೂ ಓದಿ:ದುಃಖದಿಂದ ಹೃದಯ ಸಮಸ್ಯೆ ಹೆಚ್ಚುತ್ತದೆ: ಅಧ್ಯಯನದಲ್ಲಿ ಬಯಲು
