ಉತ್ತರ ಕನ್ನಡದ ಪ್ರಮುಖ ಅಭ್ಯರ್ಥಿಗಳೆಲ್ಲರೂ ಕೋಟ್ಯಧಿಪತಿಗಳೇ: ಆರ್.ವಿ.ದೇಶಪಾಂಡೆ ಆಸ್ತಿ ₹299 ಕೋಟಿ

ಉತ್ತರ ಕನ್ನಡ ಜಿಲ್ಲೆಯ ಚುನಾವಣಾ ಕಣ ರಂಗೇರಿದೆ. ಜಿಲ್ಲೆಯ ಬಹುತೇಕ ಎಲ್ಲ ಪ್ರಮುಖರು ನಾಮಪತ್ರ ಸಲ್ಲಿಕೆ ಮಾಡಿದ್ದಾರೆ. ನಾಮಪತ್ರ ಸಲ್ಲಿಸಿದ ಅಭ್ಯರ್ಥಿಗಳ ಆಸ್ತಿ ವಿವರ ಹೀಗಿದೆ.

ಕಾರವಾರ (ಉತ್ತರ ಕನ್ನಡ):ಉತ್ತರ ಕನ್ನಡ ಜಿಲ್ಲೆಯಲ್ಲಿ ಚುನಾವಣಾ ಅಬ್ಬರ ಜೋರಾಗಿದೆ. ಜಿಲ್ಲೆಯಲ್ಲಿ ಬಹುತೇಕ ಹಳೆ ಅಭ್ಯರ್ಥಿಗಳೇ ಕಣದಲ್ಲಿದ್ದು, ಬಹುತೇಕ ಎಲ್ಲ ಪ್ರಮುಖರು ನಾಮಪತ್ರ ಸಲ್ಲಿಕೆ ಮಾಡಿದ್ದಾರೆ. ಆದರೆ, ಕಳೆದ ಚುನಾವಣೆಗೆ ಹೋಲಿಕೆ ಮಾಡಿದರೆ ಈ ಬಾರಿ ಆಸ್ತಿ ಹೆಚ್ಚಾಗಿದೆ. ಹೌದು, ಅಭ್ಯರ್ಥಿಗಳು ಸಲ್ಲಿಸಿರುವ ಅಫಿಡವಿಟ್​ನಿಂದ ಈ ಮಾಹಿತಿ ಬಹಿರಂಗವಾಗಿದೆ.

299.53 ಕೋಟಿ ಆಸ್ತಿಯ ಒಡೆಯ ಆರ್.ವಿ.ದೇಶಪಾಂಡೆ:ಹಳಿಯಾಳ-ಜೋಯಿಡಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಆರ್.ವಿ.ದೇಶಪಾಂಡೆ ನಾಮಪತ್ರ ಸಲ್ಲಿಸಿದ್ದು, ಚುನಾವಣಾಧಿಕಾರಿಗಳಿಗೆ ಸಲ್ಲಿಸಿದ ಘೋಷಣಾ ಪತ್ರದಲ್ಲಿ ತಮ್ಮ ಕುಟುಂಬದ ಆಸ್ತಿ ಒಟ್ಟು 299,53 ಕೋಟಿ ಆಸ್ತಿ ಹೊಂದಿದ್ದಾರೆ. ಆರ್.ವಿ.ದೇಶಪಾಂಡೆಗಿಂತ ಪತ್ನಿ ರಾಧಾ ದೇಶಪಾಂಡೆ ಹೆಚ್ಚು ಆಸ್ತಿ ಹೊಂದಿದ್ದು ಅವರ ಆಸ್ತಿ ಮೌಲ್ಯ 253,66,39,532 ಇದೆ. ದೇಶಪಾಂಡೆಯವರ ಹೆಸರಲ್ಲಿ 45,86,99,207 ರೂ. ಆಸ್ತಿಯಿದೆ. ಒಟ್ಟು 9,91,30,805 ರೂ. ಸಾಲವಿದೆ.

ಘೋಷಿತ ಆಸ್ತಿ ವಿವರಗಳಲ್ಲಿ ಚರಾಸ್ತಿ ಮೊತ್ತ 234,35,02,185 ರೂ ಇದೆ. ಸ್ಥಿರಾಸ್ತಿ 65,18,36,554 ರೂ. ಆರ್.ವಿ.ದೇಶಪಾಂಡೆ ಹಾಗೂ ರಾಧಾ ದೇಶಪಾಂಡೆ ಹೆಸರಿನಲ್ಲಿ ಇದೆ. ದೇಶಪಾಂಡೆಯವರ ಬಳಿ ನಗದು 7,61,949 ರೂ. ಅವರ ಪತ್ನಿ ರಾಧಾ ಬಳಿ ರೂ. 6,74,276 ಇದೆ. ಬ್ಯಾಂಕ್​ ಖಾತೆಯಲ್ಲಿ 19,73,962, ಪತ್ನಿ ರಾಧಾ ದೇಶಪಾಂಡೆಯವರ ಹೆಸರಿಗೆ 17,92,700 ರೂ. ಇದೆ. ದೇಶಪಾಂಡೆಯವರ ಬಳಿ ಬ್ಯಾಂಕ್ ಖಾತೆಯಲ್ಲಿ ಠೇವಣಿ ಮತ್ತು ಇತರೆ ಸೇರಿ 1,10,90,667 ರೂ., ಅವರ ಇನ್ನೂ ಪತ್ನಿ ರಾಧಾ ಬಳಿ 13,21,49,136 ರೂ. ಇದೆ. ದೇಶಪಾಂಡೆಯವರ ಬಳಿ 17,17,405 ರೂ. ಮೌಲ್ಯದ ಚಿನ್ನಾಭರಣವಿದ್ದರೆ, ಪತ್ನಿ ಬಳಿ 4,73,67,542 ರೂ. ಮೌಲ್ಯದ ಚಿನ್ನಾಭರಣವಿದೆ. ಒಟ್ಟು ದೇಶಪಾಂಡೆ ಹೆಸರಿನಲ್ಲಿ 8,24,67,944 ರೂ. ಮತ್ತು ಅವರ ಪತ್ನಿ ರಾಧಾ ಹೆಸರಲ್ಲಿ ರೂ.1,66,62,861 ಸಾಲವಿದೆ.

ವಿ.ಎಸ್. ಪಾಟೀಲ್ ಆಸ್ತಿ 3.62 ಕೋಟಿ:ಕಾಂಗ್ರೆಸ್ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಕೆ ಮಾಡಿರುವ ವಿ.ಎಸ್‌. ಪಾಟೀಲ್ ತಮ್ಮ ಕುಟುಂಬದ ಆಸ್ತಿ ಘೋಷಣೆ ಮಾಡಿದ್ದು, ಒಟ್ಟು ಆಸ್ತಿ 3.62 ಕೋಟಿ ಒಡೆಯರಾಗಿದ್ದಾರೆ. ಕೃಷಿ ಮೂಲದಿಂದ ತಮ್ಮ ವಾರ್ಷಿಕ ಆದಾಯ 31,50,818 ರೂ. ಇದ್ದು, ತಮ್ಮ ಕೈಯಲ್ಲಿ 60 ಸಾವಿರ, ಪತ್ನಿ ಶಶಿಕಲಾ ಅವರ ಕೈಯಲ್ಲಿ 50 ಸಾವಿರ ರೂ. ನಗದು ಹಣವಿದೆ. ಕೆವಿಜಿ ಬ್ಯಾಂಕ್‌ನಲ್ಲಿ 44.133 ಲಕ್ಷ ರೂ. ಮುಂಡಗೋಡದ ಎಸ್‌ಬಿಐದಲ್ಲಿ 2.59 ರೂ. 1,64,904.66 ರೂ. ಕಲಕೇರಿ ಸೇವಾ ಸಹಕಾರಿ ಸಂಘದ ಶೇರು 32,000 ರೂಪಾಯಿಗಳಿದೆ ಎಂದು ಅಫಿಡವಿಟ್​​‌ನಲ್ಲಿ ನಮೂದಿಸಿದ್ದಾರೆ. ಪತ್ನಿ ಶಶಿಕಲಾ ಅವರು, ಕೆವಿಜಿ ಬ್ಯಾಂಕ್ ಖಾತೆಯಲ್ಲಿ 2,08,659,64 ರೂ. ಇನ್ನೊಂದು ಖಾತೆಯಲ್ಲಿ 86,485.66 ರೂ. ಎಸ್‌ಬಿಐ ಖಾತೆಯಲ್ಲಿ 1,46,448.61 ರೂ. ಹಾಗೂ ಕಲಕೇರಿ ಸೇವಾ ಸಹಕಾರಿ ಸಂಘದಲ್ಲಿ 30 ಸಾವಿರ ರೂ. ಶೇರು ಹೊಂದಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಸಾಲದೊಂದಿಗೆ ರೂಪಾಲಿ ನಾಯ್ಕ ಆಸ್ತಿಯೂ ಡಬಲ್:ಬಿಜೆಪಿ ಅಭ್ಯರ್ಥಿಯಾಗಿ ಎರಡನೇ ಬಾರಿ ನಾಮಪತ್ರ ಸಲ್ಲಿಕೆ ಮಾಡಿರುವ ಶಾಸಕಿ ರೂಪಾಲಿ ನಾಯ್ಕ ಅವರ ಆಸ್ತಿ ಕಳೆದ ಐದು ವರ್ಷದಲ್ಲಿ ಎರಡು ಪಟ್ಟು ಹೆಚ್ಚಾಗಿದೆ. ಚಿರಾಸ್ಥಿ 3.50 ಕೋಟಿಗೆ ಏರಿಕೆಯಾಗಿದೆ. ಅಲ್ಲದೆ ಸಾಲ ಕೂಡ ಡಬಲ್ ಆಗಿದೆ.
2018ರರಲ್ಲಿ ಚುನಾವಣಾ ನಾಮಪತ್ರ ಸಲ್ಲಿಕೆ ವೇಳೆ ಸಲ್ಲಿಸಲಾಗಿದ್ದ ತಮ್ಮ ಆಸ್ತಿ ವಿವರದಲ್ಲಿ ಅಂಕೋಲಾದ ಹಿಲ್ಲೂರಿನಲ್ಲಿ 2 ಎಕರೆ ಕೃಷಿ ಭೂಮಿ, ಕಾರವಾರದ ದೇವಳಿವಾಡದಲ್ಲಿ ಎರಡು ವಾಸ್ತವ್ಯದ ಮನೆ ಹೊಂದಿರುವುದಾಗಿ ಒಟ್ಟು 1.03 ಕೋಟಿ ಸ್ಥಿರಾಸ್ತಿ ಇರುವ ಬಗ್ಗೆ ಅಫಿಡವಿಟ್ ಸಲ್ಲಿಸಿದ್ದರು. ಆದರೆ, ಇದೀಗ ಪ್ರಸ್ತುತ ನಾಮಪತ್ರ ಸಲ್ಲಿಕೆ ವೇಳೆ ನೀಡಿರುವ ಅಫಿಡವಿಟ್‌ನಲ್ಲಿ ನಗೆಕೋವೆ, ನಿವಳಿ, ಮೈಸೂರಿನ ವರುಣಾದಲ್ಲಿ ಒಟ್ಟು 32 ಎಕರೆ 36 ಗುಂಟೆ ಕೃಷಿ ಭೂಮಿ, ಒಂದು ವಾಣಿಜ್ಯ ಕಟ್ಟಡ, ದೇವಳಿವಾಡಾದಲ್ಲಿ 3 ಗುಂಟೆಯ ಕೃಷಿಯೇತರ ಜಾಗ ಇರುವುದಾಗಿ ತಿಳಿಸಿದ್ದಾರೆ.

ರೂಪಾಲಿ ಪತಿಯ ಹೆಸರಿನಲ್ಲಿ ಕೇವಲ ಪಲ್ಸರ್ ಬೈಕ್: ಅಲ್ಲದೇ ಕೈಯಲ್ಲಿ 1,86,980 ರೂ. ಹೊಂದಿದ್ದು, ಯೂನಿಯನ್ ಬ್ಯಾಂಕ್‌ನಲ್ಲಿ 2.70 ಲಕ್ಷ ಠೇವಣಿ, ವಿವಿಧ ಬ್ಯಾಂಕ್‌ಗಳ 15 ಉಳಿತಾಯ ಖಾತೆಗಳಲ್ಲಿ 19.26 ಲಕ್ಷ ರೂ., ಮಲ್ಲಿಕಾರ್ಜುನ ಅರ್ಥ್ಮೂವರ್ಸ್ ಹೆಸರಿನ ಎರಡು ಖಾತೆಗಳಲ್ಲಿ 3 ಲಕ್ಷ ರೂ., 10 ಜೀವವಿಮೆ ಪಾಲಿಸಿಗಳಲ್ಲಿ 50 ಲಕ್ಷ, ಪತಿಯ ಹೆಸರಿನಲ್ಲಿ 1 ಲಕ್ಷದ ಒಂದು ಜೀವವಿಮೆ ಮಾಡಿಸಿದ್ದಾರೆ. 22.38 ಲಕ್ಷ ಮೌಲ್ಯದ 516 ಗ್ರಾಂ ಚಿನ್ನ, 1670 ಗ್ರಾಂ ಬೆಳ್ಳಿ, ಪತಿಯ ಹೆಸರಿನಲ್ಲಿ 5.60 ಲಕ್ಷ ಮೌಲ್ಯದ 140 ಗ್ರಾಂ ಚಿನ್ನ ಹೊಂದಿರುವ ರೂಪಾಲಿ, ವ್ಯಾಗನರ್, ಇನೋವಾ, ಹುಂಡೈ ಎಲೆಂಟ್ರಾ, ಟಾಟಾ ವೆಂಚರ್, ಟಾಟಾ ಹಿಟಾಚಿ ವಾಹನಗಳನ್ನ ಹೊಂದಿದ್ದಾರೆ. ಆದರೆ, ಪತಿಯ ಹೆಸರಿನಲ್ಲಿ ಕೇವಲ ಪಲ್ಸರ್ ಬೈಕ್ ಮಾತ್ರವಿದೆ.

ಕಳೆದ ಚುನಾವಣೆಯಲ್ಲಿ ಈ ಸಾಲ 52.67 ಲಕ್ಷ ರೂ. ಸಾಲ ಇರುವುದಾಗಿ ತಿಳಿಸಿದ್ದರು. ಆದರೆ ಇದೀಗ ಯೂನಿಯನ್ ಬ್ಯಾಂಕ್‌ನಲ್ಲಿ 18.18 ಲಕ್ಷ, 4.86 ಲಕ್ಷ, 23.80 ಲಕ್ಷ, 7.60 ಲಕ್ಷ ಹೀಗೆ ಒಟ್ಟು 54.44 ಲಕ್ಷ ಹಾಗೂ ಕಾರವಾರದ ಸೇಂಟ್ ಮಿಲಾಗ್ರಿಸ್ ಕ್ರೆಡಿಟ್ ಸೌಹಾರ್ದದಲ್ಲಿ 91.44 ಲಕ್ಷ, ಒಟ್ಟು 1.45 ಕೋಟಿ ರೂ. ಸಾಲ ಮಾಡಿಕೊಂಡಿರುವ ಬಗ್ಗೆ ಅಫಿಡವಿಟ್‌ನಲ್ಲಿ ದಾಖಲಿಸಿದ್ದಾರೆ.

ಸತೀಶ್ ಸೈಲ್ 104 ಕೋಟಿ ರೂ ಆಸ್ತಿ ಸರದಾರ:ಕಾರವಾರ-ಅಂಕೋಲಾ ಕ್ಷೇತ್ರದಿಂದ ನಾಮಪತ್ರ ಸಲ್ಲಿಸಿರುವ ಕಾಂಗ್ರೆಸ್‌ ಅಭ್ಯರ್ಥಿ ಸತೀಶ ಸೈಲ್ ಒಟ್ಟು 46.48 ಕೋಟಿ ರೂ. ಚರಾಸ್ತಿ ಹಾಗೂ 58.27 ಕೋಟಿ ರೂ. ಸ್ಥಿರಾಸ್ತಿ ಸೇರಿದಂತೆ ಒಟ್ಟು 104.76 ಕೋಟಿ ಆಸ್ತಿ ಘೋಷಿಸಿದ್ದಾರೆ. ಸೈಲ್ ಬಳಿ 1.06,717 ರೂ. ನಗದು, ಸತೀಶ ಸೈಲ್ ಪತ್ನಿ ಕಲ್ಪನಾ ಸೈಲ್ ಬಳಿ 3925 ರೂ. ನಗದು, ವಿವಿಧ ಬ್ಯಾಂಕ್​ಗಳು, ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಲ್ಲಿ ಸತೀಶ ಸೈಲ್ ಅವರ 66,67,464 ರೂ., ಕಲ್ಪನಾ ಸೈಲ್ 6,54,509 ರೂ., ಪುತ್ರಿ ಸಾದ್ವಿ ಅವರ ಹೆಸರಲ್ಲಿ 12,96,535 ರೂ., ಇನ್ನೋರ್ವ ಪುತ್ರಿ ಸಚಿ ಹೆಸರಲ್ಲಿ 19,845 ರೂ ಇದೆ. ಸತೀಶ ಸೈಲ್ ಹೆಸರಲ್ಲಿ 24,30,59,767 ರೂ., ಕಲ್ಪನಾ ಸೈಲ್ ಹೆಸರಲ್ಲಿ 11,81,79,674 ರೂ., ಮೋಟರ್ ವೆಹಿಕಲ್ ಖರೀದಿಗೆ 24,00,875 ರೂ., ಸೈಲ್ ಹೆಸರಲ್ಲಿ 3,61,194 ರೂ. ಮೌಲ್ಯದ ಪಿಠೋಪಕರಣಗಳನ್ನು ತೋರಿಸಲಾಗಿದೆ. ಸತೀಶ ಸೈಲ್ ಬಳಿ 12,70,540 ರೂ. ಮೌಲ್ಯದ 600 ಗ್ರಾಂ ಬಂಗಾರ, ಕಲ್ಪನಾ ಸೈಲ್ ಬಳಿ 45,77,840 ರೂ. ಮೌಲ್ಯದ 2090 ಗ್ರಾಂ ಬಂಗಾರ, ಸಾದ್ವಿ ಬಳಿ 9,60,480 ರೂ. ಮೌಲ್ಯದ 480 ಗ್ರಾಂ ಬಂಗಾರ, ಸಚಿ ಹೆಸರಲ್ಲಿ 6,36,318 ರೂ. ಮೌಲ್ಯದ 318 ಗ್ರಾಂ ಬಂಗಾರ ತೋರಿಸಲಾಗಿದೆ.

ಮಂಕಾಳ ವೈದ್ಯರ ಆಸ್ತಿ ಎಷ್ಟು ಗೊತ್ತೇ?:ಭಟ್ಕಳ ಹೊನ್ನಾವರ ಕಾಂಗ್ರೆಸ್ ಅಭ್ಯರ್ಥಿಯಾಗಿರುವ ಮಂಕಾಳು ವೈದ್ಯ ರೂ. 10 ಲಕ್ಷ ನಗದು ಹೊಂದಿರುವುದಾಗಿ ತಮ್ಮ ನಾಮಪತ್ರದೊಂದಿಗೆ ಸಲ್ಲಿಸಿದ ಆಫಿಡವಿಟ್‌ನಲ್ಲಿ ತಿಳಿಸಿದ್ದಾರೆ. ಕಾಂಗ್ರೆಸ್ ಅಭ್ಯರ್ಥಿ ಮಂಕಾಳ ವೈದ್ಯ ಪತ್ನಿ ಪುಷ್ಪಲತಾ ಅವರ ಬಳಿ ರೂ.2 ಲಕ್ಷ, ಮಗಳು ಬೀನಾ 1.5 ಲಕ್ಷ ನಗದು ಹಣವನ್ನು ಹೊಂದಿದ್ದಾರೆ. ಮಂಕಾಳು ವೈದ್ಯ ಹೊಂದಿರುವ ಚರಾಸ್ತಿಯ ಮೌಲ್ಯ 16.53 ಕೋಟಿ ರೂ. ಅವರ ಪತ್ನಿ ಪುಷ್ಪಲತಾ ಹೊಂದಿರುವ ಚರಾಸ್ತಿಯ ಮೌಲ್ಯ 1.60 ಕೋಟಿ ರೂ., ಕುಟುಂಬ ಹೊಂದಿರುವ ಚರಾಸ್ತಿಯ ಮೌಲ್ಯ 1.77 ಕೋಟಿ ರೂ., ಮಗಳು ಬೀನಾ ವೈದ್ಯ ಹೊಂದಿರುವ ಚರಾಸ್ತಿಯ ಮೌಲ್ಯ 51.01 ಲಕ್ಷ ರೂ. ಆಗಿದೆ. ಅವರು 42.99 ಲಕ್ಷ ರೂ. ಮೌಲ್ಯದ ಸ್ಥಿರಾಸ್ತಿಯನ್ನು ಖರೀದಿಸಿದ್ದಾರೆ.

ಇದನ್ನೂ ಓದಿ:ಸಂವಾದದಲ್ಲಿ ಮೋದಿ ಕೊಂಡಾಡಿದ ನಡ್ಡಾ: ಶೆಟ್ಟರ್ ಟಿಕೆಟ್‌ ಕುರಿತ ನಿರ್ಧಾರಕ್ಕೆ ಸಮರ್ಥನೆ