ಹಣದ ವಿಚಾರಕ್ಕೆ ಗಲಾಟೆ... ಟೋಲ್ ಗೇಟ್​ ಸಿಬ್ಬಂದಿಗೆ ಥಳಿಸಿದ ದುಷ್ಕರ್ಮಿಗಳು!

ದುಷ್ಕರ್ಮಿಗಳ ತಂಡವೊಂದು ಹಣದ ವಿಚಾರವಾಗಿ ಗಲಾಟೆ ಆರಂಭವಾಗಿ ಟೋಲ್​ ಸಿಬ್ಬಂದಿಗೆ ಥಳಿಸಿರುವ ಘಟನೆ ಶಿರಾ ತಾಲೂಕಿನಲ್ಲಿ ನಡೆದಿದೆ. ಘಟನೆಯಲ್ಲಿ ಇಬ್ಬರು ಟೋಲ್​ ಸಿಬ್ಬಂದಿ ಗಾಯಗೊಂಡಿದ್ದಾರೆ.

ತುಮಕೂರು:ಟೋಲ್​ ಹಣ ಕಟ್ಟುವ ಸಂಬಂಧ ದುಷ್ಕರ್ಮಿಗಳ ತಂಡವೊಂದು ಟೋಲ್​ ಸಿಬ್ಬಂದಿಗೆ ಥಳಿಸಿದ್ದಲ್ಲದೇ ದಾಂಧಲೆ ನಡೆಸಿ ಪರಾರಿಯಾಗಿರುವ ಘಟನೆ ಶಿರಾ ತಾಲೂಕು ಕರಜೀವನಹಳ್ಳಿ ಟೋಲ್​ನಲ್ಲಿ ಗುರುವಾರ ರಾತ್ರಿ ನಡೆದಿದೆ.

ಟೋಲ್​​ ಹಣ ಪಾವತಿಸುವುದಿಲ್ಲ ಎಂದು ಪುಂಡರ ಗುಂಪು ಟೋಲ್​ ಸಿಬ್ಬಂದಿಗೆ ಥಳಿಸಿದೆ. ಇದರಿಂದ ಇಬ್ಬರು ಟೋಲ್​ ಸಿಬ್ಬಂದಿ ಗಾಯಗೊಂಡಿದ್ದಾರೆ. ಅಲ್ಲದೆ ರೊಚ್ಚಿಗೆದ್ದ ಗುಂಪು ಟಿಕೆಟ್ ನೀಡುವ ಕೌಂಟರ್​ಗೂ ಹಾನಿ ಮಾಡಿದೆ. ಇಷ್ಟಕ್ಕೂ ಸುಮ್ಮನಾಗದ ದುಷ್ಕರ್ಮಿಗಳು, ಕಚೇರಿ ಒಳಗೂ ನುಗ್ಗಿ ದಾಂಧಲೆ ನಡೆಸಿದ್ದಾರೆ.

ಹಲ್ಲೆಯಿಂದ ಮಹಾರಾಷ್ಟ ಮೂಲದ ಕೆಲಸಗಾರರಿಬ್ಬರು ಗಾಯಗೊಂಡಿದ್ದು, ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ವಿಷಯ ತಿಳಿದು ಸ್ಥಳಕ್ಕೆ ಬಂದ ಕಳ್ಳಂಬಳ್ಳ ಪೊಲೀಸರು ಸಿಸಿಟಿವಿ ಫೂಟೇಜ್​ಗಳನ್ನು ವಶಕ್ಕೆ ಪಡೆದು ಪರಿಶೀಲನೆ ನಡೆಸಿದ್ದಾರೆ.