ಕೊರೊನಾ ಶಂಕೆ: ಲಿಂಗಸುಗೂರಿನಲ್ಲಿ ಇಬ್ಬರಿಗೆ ಕ್ವಾರಂಟೈನ್​​

ಬಾಗಲಕೋಟೆಯಲ್ಲಿ ಕೊರೊನಾ ಸೋಂಕಿನಿಂದ ಸತ್ತ ವ್ಯಕ್ತಿಯ ಮಕ್ಕಳಿಗೆ ಲಿಂಗಸುಗೂರಿನಲ್ಲಿರುವ ಇಬ್ಬರೊಂದಿಗೆ ಉತ್ತಮ ಸಂಬಂಧವಿದೆ ಎಂದು ಆ ಇಬ್ಬರನ್ನು ಇದೀಗ ಪರೀಕ್ಷೆಗೆ ಒಳಪಡಿಸಲಾಗಿದೆ.

ರಾಯಚೂರು: ಬಾಗಲಕೋಟೆಯಲ್ಲಿ ಕೊರೊನಾ ಸೋಂಕಿನಿಂದ ಮೃತಪಟ್ಟ ವ್ಯಕ್ತಿಯ ಮಕ್ಕಳಿಗೂ ಲಿಂಗಸುಗೂರಿನಲ್ಲಿ ಇರುವ ಇಬ್ಬರಿಗೂ ಆತ್ಮೀಯ ಸ್ನೇಹವಿದೆ ಎಂಬ ಸುದ್ದಿ ತಿಳಿದ ಹಿನ್ನೆಲೆ ಆ ಇಬ್ಬರನ್ನು ರಿಮ್ಸ್ ಆಸ್ಪತ್ರೆಗೆ ಕಳುಹಿಸಿ ಪರೀಕ್ಷೆ ನಡೆಸಲಾಗಿದೆ.

ಪರೀಕ್ಷೆ ವರದಿ ಬರುವವರೆಗೂ ನೀವು ಮನೆಯಿಂದ ಹೊರಗೆ ಬರಬೇಡಿ. ನಿಮಗೆ ಬೇಕಾದ ಎಲ್ಲಾ ಸೌಲಭ್ಯಗಳನ್ನು ತಾಲೂಕು ಆಡಳಿತ ನೀಡುತ್ತದೆ ಎಂದು ಡಿವೈಎಸ್ಪಿ ಎಸ್.ಎಸ್.ಹುಲ್ಲೂರು ಮನವಿ ಮಾಡಿದರು. ಅಲ್ಲದೇ ವರದಿಯಲ್ಲಿ ನೆಗೆಟಿವ್​ ಬಂದ ನಂತರ ನೀವು ಹೊರಗೆ ಬರುವಿರಂತೆ. ಅಲ್ಲಿಯವರೆಗೂ ದಯವಿಟ್ಟು ಮನೆಯಲ್ಲಿ ಇರಿ ಎಂದು ಹೇಳಿದರು. ಈ ಮಾತನ್ನು ಮೀರಿ ಯಾರಾದರೂ ಹೊರಗೆ ಬಂದರೆ ಕೇಸ್​ ದಾಖಲಿಸುವುದಾಗಿಯೂ ಎಚ್ಚರಿಕೆ ನೀಡಿದ್ದಾರೆ.

ಬಾಗಲಕೋಟೆಯಲ್ಲಿ ವೃದ್ಧ ಮೃತಪಟ್ಟ ನಂತರ ಆತನ ಮಕ್ಕಳ ಜೊತೆ ಇವರು ಸಂಪರ್ಕ ಹೊಂದಿದ್ದ ಬಗ್ಗೆ ಖಚಿತ ಮಾಹಿತಿ ಇಲ್ಲದೇ ಇದ್ದರೂ ಮುಂಜಾಗ್ರತಾ ಕ್ರಮವಾಗಿ ಅವರನ್ನು ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಅವರ ವರದಿಗಾಗಿ ಕಾಯಲಾಗುತ್ತಿದೆ.