ಮೈಸೂರು: ಕಾಲು ನೋವು ಚಿಕಿತ್ಸೆಗಾಗಿ ಹೋದ ಗೌರಿ ಹೆಸರಿನ ಆನೆ ಗುಣಮುಖವಾಗಿಯೂ ಕೂಡ ಇನ್ನು ವಾಪಸ್ ಬಾರದೇ ಇರುವುದರಿಂದ ಭಕ್ತರಲ್ಲಿ ಬೇಸರ ಮೂಡಿದೆ. ಸರಳವಾಗಿ ನಡೆಯುವ ಪಂಚ ಮಹಾರಥೋತ್ಸವದಲ್ಲಿ ಗೌರಿ ಪಾಲ್ಗೊಳ್ಳುತ್ತಾಳಾ ಎಂಬ ಪ್ರಶ್ನೆ ಭಕ್ತರಲ್ಲಿ ಕಾಡತೊಡಗಿದೆ.
ನಂಜುಂಡೇಶ್ವರನ ಸೇವೆಗೆ ಮತ್ತೆ ಬರುವಳೇ ಗೌರಿ?
ನಂಜನಗೂಡಿನ ನಂಜುಂಡೇಶ್ವರ ದೇವಸ್ಥಾನದ ಪ್ರಮುಖ ಆಕರ್ಷಣೆಯಾಗಿರುವ ಗೌರಿ ಆನೆ, ಕಾಲು ನೋವಿನಿಂದ ಬಳಲುತ್ತಿದ್ದರಿಂದ ಚಿಕಿತ್ಸೆಗಾಗಿ ಮೂರು ವರ್ಷಗಳ ಹಿಂದೆ ಕೋಲಾರ ಜಿಲ್ಲೆಯ ಮಾಲೂರಿನ ಆನೆ ಆರೈಕೆ ಕೇಂದ್ರಕ್ಕೆ ಕರೆದೊಯ್ಯಲಾಯಿತು. ಚಿಕಿತ್ಸೆಯ ಮೂಲಕ ಗೌರಿ ಆನೆ ಗುಣಮುಖವಾಗಿದ್ದಾಳೆ. ಆದರೆ, ನಂಜುಂಡೇಶ್ವರನ ಸೇವೆಗೆ ಲಭ್ಯವಾಗದೇ ಇರುವುದರಿಂದ ಭಕ್ತರಲ್ಲಿ ಅಸಮಾಧಾನ ತಂದಿದೆ. ಇದೇ 25 ರಂದು ನಡೆಯಲಿರುವ ಸರಳ ಪಂಚಮಹಾರಥೋತ್ಸವಕ್ಕೆ ಆನೆ ಆಗಮಿಸಿ ಸರಳ ಆಚರಣೆಗೆ ಮೆರಗು ನೀಡುತ್ತಾ ಎಂಬ ಪ್ರಶ್ನೆ ಕಾಡತೊಡಗಿದೆ.