ಅತ್ತ ಕೊರೊನಾ ಕಾಟ..ಇತ್ತ ಮಳೆಯೂ ಇಲ್ಲ.. ಸಂಭ್ರಮವಿಲ್ಲದ ಭೂತಾಯಿ ಮಕ್ಕಳ ಹಬ್ಬ

ರೈತಾಪಿ ವರ್ಗದ ಉಸಿರು ಎಂದರೆ ಎತ್ತುಗಳು, ಈ ಎತ್ತುಗಳಿಗೆ ಕಾರು ಹುಣ್ಣಿಮೆಯಲ್ಲಿ ಪೂಜೆ ಸಲ್ಲಿಸಲಾಗುತ್ತದೆ. ನಂತರ ಬರುವ ಮಣ್ಣೆತ್ತಿನ ಅಮವಾಸ್ಯೆಯಲ್ಲಿ ಮಣ್ಣಿನಲ್ಲಿ ಎತ್ತುಗಳ ಸಣ್ಣ ಬೊಂಬೆಗಳನ್ನು ನಿರ್ಮಿಸಿ ಪೂಜೆ ಸಲ್ಲಿಸುವುದು ಉತ್ತರ ಕರ್ನಾಟಕದಲ್ಲಿ ರೂಢಿಯಿದೆ.

ಕುಷ್ಟಗಿ:ಮಣ್ಣೆತ್ತಿನ ಅಮವಾಸ್ಯೆ ಭೂತಾಯಿ ಮಕ್ಕಳ ಹಬ್ಬವಾಗಿದ್ದು, ಸಂಪ್ರದಾಯಕ್ಕೆ ಸೀಮಿತವಾಗುತ್ತಿರುವ ಈ ಹಬ್ಬ ಸಕಾಲಿಕವಾಗಿ ಮಳೆಯಾಗದಿರುವುದಕ್ಕೆ ಕಳೆಗುಂದಿದೆ.

ಮುಂಗಾರು ಹಂಗಾಮಿನ ಬಿತ್ತನೆ ಕೆಲಸ ಮುಗಿದು, ರೈತಾಪಿ ವರ್ಗ ಈ ಹಬ್ಬದ ಸಂಭ್ರಮದಲ್ಲಿ ಭಾಗಿಯಾಗುತ್ತಿದ್ದಂತೆ ಹಬ್ಬದ ಸಂಭ್ರಮ ಹೆಚ್ಚುತ್ತಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಮಳೆ ಸರಿಯಾಗಿ ಬೀಳುತ್ತಿಲ್ಲ. ಬಿತ್ತನೆ ಸಂದರ್ಭದಲ್ಲಿ ಈ ಹಬ್ಬ ಬಂದಿದೆ.

ಕೆಲವೆಡೆ ಮಳೆಯಾಗಿ ಉತ್ತಮ ಬೆಳೆ ಇದ್ದರೂ, ಕೊರೊನಾ ವೈರಸ್ ಹಾವಳಿ ಹೆಚ್ಚಾಗಿರುವುದರಿಂದ ಹಬ್ಬದ ಸಂಭ್ರಮ ಮಾಯವಾಗಿದೆ. ಆದರೂ ರೈತಾಪಿ ವರ್ಗ ಸಂಪ್ರದಾಯವನ್ನು ಬಿಡಲು ತಯಾರಿಲ್ಲ. ಕಷ್ಟವೆನಿಸಿದರೂ ಕೆಲವೆಡೆ ಮಣ್ಣೆತ್ತಿನ ಅಮವಾಸ್ಯೆ ಸಂಭ್ರಮ ನಡೆಯುತ್ತಿದೆ.

ಮಣ್ಣೆತ್ತಿನ ಅಮವಾಸ್ಯೆಯಲ್ಲಿ ಮಣ್ಣಿನಲ್ಲಿ ಎತ್ತುಗಳನ್ನು ತಯಾರಿಸಿ ಪೂಜೆ ಸಲ್ಲಿಸಿ ಗೌರವ ಸಲ್ಲಿಸುವುದು ಉತ್ತರ ಕರ್ನಾಟಕದಲ್ಲಿರುವ ಜನಪ್ರಿಯ ವಾಡಿಕೆ

ಈ ಮಣ್ಣಿನ ಎತ್ತುಗಳನ್ನು ಕುಂಬಾರರು ತಯಾರಿಸಿ ಮಾರುವುದರಿಂದ ಈ ಕುಟುಂಬಗಳಿಗೆ ಒಂದಿಷ್ಟು ವಾರ್ಷಿಕ ಆದಾಯದ ಬರುತ್ತಿದೆ. ಜೊತೆಗೆ ಗ್ರಾಮೀಣ ಜಾನಪದ ಸಂಸ್ಕೃತಿಯ ಸೊಗಡನ್ನು ಈ ಹಬ್ಬ ಜೀವಂತವಾಗಿಸಿವೆ.