ಕಲಬುರಗಿ:ಯುವತಿಯೊಂದಿಗಿನ ಪ್ರೇಮ ವಿಚಾರಕ್ಕೆ ಲಾಡ್ಜ್‌ನಲ್ಲಿ ಕೆಲಸ ಮಾಡುತ್ತಿದ್ದ ಯುವಕ ಆಕೆಯ ಮನೆಯವರಿಂದಲೇ ಕೊಲೆಗೀಡಾದ ಘಟನೆ ಜಿಲ್ಲೆಯ ಅಫಜಲಪುರ ತಾಲೂಕಿನ ದೇವಲ ಗಾಣಗಾಪುರದಲ್ಲಿ ನಡೆದಿದೆ. ಚಂದ್ರಕಾಂತ್ ಪೂಜಾರಿ (24) ಎಂಬಾತ ದುರಂತ ಅಂತ್ಯ ಕಂಡ ಯುವಕನಾಗಿದ್ದಾನೆ.
ಚಂದ್ರಕಾಂತ್ ದೇವಲ ಗಾಣಗಾಪುರದ ಲಾಡ್ಜ್‌ವೊಂದರಲ್ಲಿ ಕೆಲಸ ಮಾಡುತ್ತ ತನ್ನ ತಾಯಿಯೊಂದಿಗೆ ಜೀವನ ಸಾಗಿಸುತ್ತಿದ್ದ. ಹೀಗಿರುವಾಗ ಈತನಿಗೆ ಪಕ್ಕದ ಜೇವರ್ಗಿ ತಾಲೂಕಿನ ಗ್ರಾಮವೊಂದರ ಕಾಲೇಜು ವಿದ್ಯಾರ್ಥಿನಿಯೋರ್ವಳ ಪರಿಚಯವಾಗಿದ್ದು, ಕ್ರಮೇಣ ಸಲುಗೆ ಬೆಳೆದು ಆರು ತಿಂಗಳಿನಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ಆದರೆ ಇವರ ಪ್ರೀತಿಯ ವಿಚಾರ ಯುವತಿ ಮನೆಯವರಿಗೆ ಗೊತ್ತಾದಾಗ ಗಲಾಟೆ ನಡೆದಿದೆ.
ಬಳಿಕ ಮನೆಯಲ್ಲೇ ಇದ್ದರೆ ಮದುವೆ ಆಗಲು ಬಿಡುವುದಿಲ್ಲವೆಂದು ಮೂರ್ನಾಲ್ಕು ದಿನಗಳ ಹಿಂದೆ ಇಬ್ಬರೂ ಬೇರೆಡೆ ಓಡಿ ಹೋಗಿದ್ದರು. ಆದರೂ ಹುಡುಕಿ ಕರೆತಂದ ಯುವತಿ ಮನೆಯವರು ಚಂದ್ರಕಾಂತ್ಗೆ ತಮ್ಮ ಮಗಳ ತಂಟೆಗೆ ಬಾರದಂತೆ ಎಚ್ಚರಿಕೆ ನೀಡಿದ್ದರು. ಇದರಿಂದ ದಿಕ್ಕು ತೋಚದಂತಾದ ಯುವಕ ಬೆಂಗಳೂರಿಗೆ ಹೋಗಿದ್ದ. ಆದರೆ ಚಂದ್ರಕಾಂತನನ್ನು ಬಿಟ್ಟಿರಲಾಗದೆ ಅವನೇ ಬೇಕೆಂದು ಯುವತಿ ಮನೆಯಲ್ಲಿ ಹಠ ಹಿಡಿದಿದ್ದಾಳೆ ಎನ್ನಲಾಗಿದೆ.