45 ನಿಮಿಷಗಳ ಕಾಲ ಲಿಫ್ಟ್​ನೊಳಗೆ ಸಿಲುಕಿದ್ದ ವಕೀಲ... ಮುಂದೇನಾಯ್ತು?

ವ್ಯಕ್ತಿಯೋರ್ವರ ಮನೆ ಮುಳುಗಡೆ ವಿಚಾರವಾಗಿ ಮಾತನಾಡಲು ಭೂ ಸ್ವಾಧೀನ ಕಚೇರಿಗೆ ತೆರಳಿದ್ದ ವಕೀಲ ಮಂಜೇಗೌಡ ಎಂಬುವರು ಸುಮಾರು 45 ನಿಮಿಷಗಳ ಕಾಲ ಲಿಫ್ಟ್​ನೊಳಗೆ ಸಿಲುಕಿದ್ದ ಘಟನೆ ನಡೆದಿದೆ.

ಹಾಸನ:ಕೆಲಸದ ನಿಮಿತ್ತ ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿದ್ದ ವಕೀಲ ಮಂಜೇಗೌಡ ಎಂಬುವರು ಸುಮಾರು 45 ನಿಮಿಷಗಳ ಕಾಲ ಲಿಫ್ಟ್​ನೊಳಗೆ ಸಿಲುಕಿದ್ದ ಘಟನೆ ನಡೆದಿದೆ.

ವಕೀಲ ಮಂಜೇಗೌಡರು ವ್ಯಕ್ತಿಯೋರ್ವರ ಮನೆ ಮುಳುಗಡೆ ವಿಚಾರವಾಗಿ ಮಾತನಾಡಲು ಭೂ ಸ್ವಾಧೀನ ಕಚೇರಿಗೆ ತೆರಳಿ ವಾಪಸ್ ಬರುತ್ತಿದ್ದರು. ಈ ವೇಳೆ ವಿದ್ಯುತ್ ಕಡಿತಗೊಂಡು ಲಿಫ್ಟ್​ನಲ್ಲಿ ಸಿಲುಕಿಕೊಂಡಿದ್ದಾರೆ. ಸುಮಾರು 45 ನಿಮಿಷಗಳ ಕಾಲ ಒಳಗೆ ಸಿಲುಕಿಕೊಂಡಿದ್ದ ಅವರು, ಬಳಿಕ ಮಾನವ್​ ಎಂಬುವರಿಗೆ ಕರೆ ಮಾಡಿದ್ದಾರೆ. ಬಳಿಕ ಮಾನವ್​ ಅವರು ಅಗ್ನಿಶಾಮಕ ದಳಕ್ಕೆ ವಿಷಯ ತಿಳಿಸಿದ್ದು, ಬಳಿಕ ಸಿಬ್ಬಂದಿ ಆಗಮಿಸಿ ಲಿಫ್ಟ್​ ಬಾಗಿಲು ತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ವಕೀಲ ಮಂಜೇಗೌಡ, ಬೆಳಿಗ್ಗೆ 10.30ರ ಸಮಯದಲ್ಲಿ ಡಿಸಿ ಕಚೇರಿಗೆ ಕೆಲಸದ ನಿಮಿತ್ತ ಬಂದಿದ್ದೇನೆ. ಅಲ್ಲಿಂದ ಕೆಲಸ ಮುಗಿಸಿ ಹಿಂತಿರುಗುವಾಗ ಲಿಫ್ಟ್​ ಸ್ಥಗಿತಗೊಂಡಿದೆ. ಇದರಿಂದ ಭಯವಾಯಿತು. ಸುಮಾರು 45 ನಿಮಿಷಗಳ ಕಾಲ ಒಂಗಡೆ ಸಿಲುಕಿಕೊಂಡಿದ್ದೆ ಎಂದರು.