ಹಸುವಿನ ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿದ ಬೀದಿ ನಾಯಿ... ಪುಣ್ಯಕೋಟಿಗೆ ಕೈ ಮುಗಿದ ಜನ

ಇಂದು ಬೆಳಗ್ಗೆ ಬೀದಿ ನಾಯಿಯೊಂದು ಮನೆಯ ಮುಂದೆ ಕಟ್ಟಿ ಹಾಕಿದ್ದ ಹಸುವಿನ ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿದು ಹಸಿವು ನೀಗಿಸಿಕೊಳ್ಳುತ್ತಿದ್ದ ದೃಶ್ಯ ನೋಡಿದವರು ಬೆರಗಾಗಿದ್ದಾರೆ.

ಹಾಸನ: ಹಿಂದೆ ಬಂದರೆ ಒದೆಯಬೇಡ, ಮುಂದೆ ಬಂದರೆ ಹಾಯಬೇಡ... ಹೀಗಂತ ಕರು, ಹಸುವಿಗೆ ಹೇಳುತ್ತಿಲ್ಲ. ಬೀದಿ ನಾಯಿಯೊಂದು ಹಸುವಿನ ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿಯುತ್ತಿರುವ ದೃಶ್ಯ ನೋಡಿದರೆ ನಿಮಗೂ ಈ 'ಪುಣ್ಯಕೋಟಿ'ಯ ಸಾಲುಗಳು ನೆನಪಿಗೆ ಬರದೇ ಇರವು.

ಇಂಥದ್ದೊಂದು ದೃಶ್ಯ ಕಂಡುಬಂದಿದ್ದು ಹಾಸನ ತಾಲೂಕಿನ ಕೆ.ಬ್ಯಾಡರಹಳ್ಳಿಯಲ್ಲಿ. ಇಂದು ಬೆಳಗ್ಗೆ ಬೀದಿ ನಾಯಿಯೊಂದು ಮನೆಯ ಮುಂದೆ ಕಟ್ಟಿಹಾಕಿದ್ದ ಹಸುವಿನ ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿದು ಹಸಿವು ನೀಗಿಸಿಕೊಳ್ಳುತ್ತಿತ್ತು. ಈ ನಾಯಿ ಪ್ರತಿನಿತ್ಯ ಹಸುವಿನ ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿದು ಹೋಗುತ್ತಂತೆ. ಮನೆ ಮಾಲೀಕನಿಗೆ ಹಾಲು ಕರೆಯುವ ಸಮಯದಲ್ಲಿ ಮೊದಲು ನೀಡುತ್ತಿದ್ದ ಹಾಲಿನ ಪ್ರಮಾಣಕ್ಕೂ, ಕಳೆದ 15 ದಿನದಿಂದ ಹಸು ನೀಡುತ್ತಿದ್ದ ಹಾಲಿನ ಪ್ರಮಾಣಕ್ಕೂ ವ್ಯತ್ಯಾಸ ಕಂಡು ಬಂದಿದೆ. ಹೀಗಾಗಿ ಇಂದು ಹಸುವನ್ನು ಹೊರಗೆ ಕಟ್ಟಿ ಹಸುವಿನ ಚಲನವಲನವನ್ನ ಗಮನಿಸಿದಾಗ ನಾಯಿಯೊಂದು ಕೆಚ್ಚಲಿಗೆ ಬಾಯಿ ಹಾಕಿ ಹಾಲು ಕುಡಿಯುವ ದೃಶ್ಯ ಕಂಡು ಬಂದಿದೆ. ಇದನ್ನು ನೋಡಿದ ಮಾಲೀಕ ನಿಬ್ಬೆರಗಾಗಿದ್ದಾನೆ.

ಈ ಘಟನೆಯನ್ನು ಚಿತ್ರೀಕರಿಸಿದ ಗ್ರಾಮದ ಯುವಕನೋರ್ವ ದೃಶ್ಯವನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾನೆ.