ಸಕಲೇಶಪುರದಲ್ಲಿ ಮಹಿಳೆಗೆ ಕೊರೊನಾ: ಮನೆ-ಅಂಗಡಿ ಸೀಲ್​ ಡೌನ್​​

ಹಾಸನ ಜಿಲ್ಲೆಯ ಸಕಲೇಶಪುರದ 40 ವರ್ಷದ ಮಹಿಳೆಗೆ ಕೊರೊನಾ ಸೋಂಕು ತಗುಲಿ ಆತಂಕ ಸೃಷ್ಟಿಸಿದೆ.

ಸಕಲೇಶಪುರ:ಪಟ್ಟಣದ ಚಪ್ಪಲಿ ಅಂಗಡಿ ಮಾಲೀಕನೊಬ್ಬನ ಹೆಂಡತಿಗೆ ಕೊರೊನಾ ಕಾಣಿಸಿಕೊಂಡ ಹಿನ್ನೆಲೆ ಮುಂಜಾಗ್ರತಾ ಕ್ರಮವಾಗಿ ತಾಲೂಕು ಆಡಳಿತದ ವತಿಯಿಂದ ಮಾಲೀಕನ ಮನೆ ಹಾಗೂ ಅಂಗಡಿ ಸೀಲ್​ ಡೌನ್ ಮಾಡಲಾಗಿದೆ.

ಸೋಂಕಿತೆ 40 ವರ್ಷದ ಮಹಿಳೆಯಾಗಿದ್ದು, ಬೆಂಗಳೂರಿನಿಂದ ಹಾಸನದಲ್ಲಿರುವ ತಾಯಿ ಮನೆಗೆ ಹಿಂತಿರುಗಿದ್ದರು. ಜ್ವರದ ಕಾರಣ ಹಿಮ್ಸ್ ಆಸ್ಪತ್ರೆಯಲ್ಲಿ ಕೋವಿಡ್ ಪರೀಕ್ಷೆ ಮಾಡಲಾಗಿದ್ದು, ಕೊರೊನಾ ದೃಢಪಟ್ಟಿದೆ. ಮುಂಜಾಗ್ರತಾ ಕ್ರಮವಾಗಿ ಪಟ್ಟಣದ ಮಲ್ಲಿಕಾರ್ಜುನ ನಗರ ಬಡಾವಣೆಯಲ್ಲಿರುವ ವರ್ತಕನ ಮನೆ ಸೀಲ್​ ಡೌನ್ ಮಾಡಲಾಗಿದ್ದು, ಮನೆಯ ಸುತ್ತಮುತ್ತ 50 ಮೀಟರ್​ನಷ್ಟು ವ್ಯಾಪ್ತಿಯಲ್ಲಿ ಯಾರೂ ಪ್ರವೇಶಿಸದಂತೆ ನಿರ್ಬಂಧ ಹೇರಲಾಗಿದೆ. ಪತ್ನಿಗೆ ಸೊಂಕು ಕಾಣಿಸಿರುವುದು ದೃಢವಾಗಿದ್ದು, ಪತಿಯ ಸ್ವ್ಯಾಬ್ ಟೆಸ್ಟ್ ಆಗಬೇಕಾಗಿದೆ.

ಪಟ್ಟಣದಲ್ಲಿ ಅಂಗಡಿ ಸೀಲ್​ ಡೌನ್​ ಮಾಡಿರುವುದರಿಂದ ಸುತ್ತಮುತ್ತಲಿನ ವರ್ತಕರಿಗೆ ಆತಂಕ ಉಂಟಾಗಿದೆ. ಪಟ್ಟಣದ ಮಲ್ಲಿಕಾರ್ಜುನ ನಗರ ಬಡಾವಣೆಗೆ ಆಗಮಿಸಿದ್ದ ಉಪ ವಿಭಾಗಾಧಿಕಾರಿ ಗಿರೀಶ್ ನಂದನ್, ತಹಶೀಲ್ದಾರ್ ಮಂಜುನಾಥ್, ತಾಲೂಕು ವೈದ್ಯಾಧಿಕಾರಿ ಮಹೇಶ್ ಸ್ಥಳ ಪರಿಶೀಲಿಸಿ ವರ್ತಕನಿಗೆ ಧೈರ್ಯ ತುಂಬಿದ್ದಾರೆ.