ಕೋಮು ಸೌಹಾರ್ದತೆಯ ಸಂಕೇತ ತೋಂಟದಾರ್ಯ ಮಠದ ಈ ರೊಟ್ಟಿ ಜಾತ್ರೆ

ಜಿಲ್ಲೆಯ ‌ಮುಂಡರಗಿ ತಾಲೂಕಿನ ಡಂಬಳದ ತೋಂಟದಾರ್ಯ ಮಠದ ಎಡೆಯೂರು ಸಿದ್ಧಲಿಂಗೇಶ್ವರರ ರೊಟ್ಟಿ ಜಾತ್ರೆ ಈ ಭಾಗದಲ್ಲಿ ಭಾರಿ ಫೇಮಸ್. ಕಳೆದ 20 ವರ್ಷಗಳಿಂದ ನಡೆದುಕೊಂಡು ಬರುತ್ತಿರುವ ಈ ಜಾತ್ರೆಗೆ ನಿನ್ನೆ ಚಾಲನೆ ದೊರೆಯಿತು.

ಗದಗ: ಜಾತ್ರೆ ಅಂದ್ರೆ ರಥೋತ್ಸವ, ಪಲ್ಲಕ್ಕಿ ಉತ್ಸವ ಸಾಮಾನ್ಯ. ಆದ್ರೆ ಈ ಜಾತ್ರೆ ಮಾತ್ರ ಫುಲ್ ಡಿಫರೆಂಟ್. ಇಲ್ಲಿ ಬರೀ ರೊಟ್ಟಿಯದ್ದೇ ಕಾರಬಾರು. ಈ ರೊಟ್ಟಿಯ ಜಾತ್ರೆಯಲ್ಲಿ ಭಾವೈಕ್ಯತೆಯ ರುಚಿ ಇದೆ. ಕೋಮು ಸೌಹಾರ್ದತೆಯ ಸಂಕೇತವಾಗಿದೆ.

ಹೌದು, ಇದು ಜಿಲ್ಲೆಯ ‌ಮುಂಡರಗಿ ತಾಲೂಕಿನ ಡಂಬಳದ ತೋಂಟದಾರ್ಯ ಮಠದ ಜಾತ್ರೆಯ ಝಲಕ್. ಡಂಬಳ ಗ್ರಾಮದ ತೋಂಟದ ಎಡೆಯೂರು ಸಿದ್ಧಲಿಂಗೇಶ್ವರರ ರೊಟ್ಟಿ ಜಾತ್ರೆ ಈ ಭಾಗದಲ್ಲಿ ಭಾರಿ ಫೇಮಸ್.ಸಮಾಜದಲ್ಲಿ ಜಾತಿ ಜಾತಿ ಅಂತ ಕೋಮು ದಳ್ಳುರಿಯಲ್ಲಿ ಬೆಂದು ಹೋಗುವವರು ಸಾಕಷ್ಟು ಜನರಿದ್ದಾರೆ. ಆದರೆ ಈ ಮಠ ಮಾತ್ರ ಸದ್ದಿಲ್ಲದೆ ಡಂಬಳ ಗ್ರಾಮದ ಸರ್ವಜನಾಂಗದ ಶಾಂತಿಯ ತೋಟವಾಗಿದೆ. ಈ‌ ಜಾತ್ರೆಯಲ್ಲಿ ರೊಟ್ಟಿಯದ್ದೇ ಪ್ರಮುಖ ಪಾತ್ರ. ಈ ರೊಟ್ಟಿ ಜಾತ್ರೆಯಲ್ಲಿ ರಾಶಿ ರಾಶಿ ಖಡಕ್ ಜೋಳದ ರೊಟ್ಟಿಯನ್ನು ಜಾತಿ ಮತ ಭೇದವಿಲ್ಲದೆ ಎಲ್ಲಾ ಜಾತಿ ಧರ್ಮದ ಜನರು ತಮ್ಮ ತಮ್ಮ ಮನೆಯಲ್ಲಿ ಮಾಡಿಕೊಂಡು ಮಠಕ್ಕೆ ನೀಡಿ, ಸಾಮೂಹಿಕ ಭೋಜನ‌ ಮಾಡ್ತಾರೆ.

ಕಳೆದ 20 ವರ್ಷಗಳಿಂದ ನಡೆದುಕೊಂಡು ಬರುತ್ತಿರುವ ಈ ಜಾತ್ರೆಗೆ ನಿನ್ನೆ ಚಾಲನೆ ದೊರೆಯಿತು. ವೈಶಿಷ್ಟ್ಯಪೂರ್ಣವಾಗಿ ನಡೆಯುವ ರೊಟ್ಟಿ ಜಾತ್ರೆ ಆರಂಭ ಮಾಡಿದ್ದೇ ತೋಂಟದಾರ್ಯ ಮಠದ ಲಿಂಗೈಕ್ಯ ಸಿದ್ದಲಿಂಗ ಶ್ರೀಗಳು. ಉತ್ತರ ಕರ್ನಾಟಕದಲ್ಲಿ ಈ ಜಾತ್ರೆ ರೊಟ್ಟಿ ಜಾತ್ರೆಯೆಂದೇ ಖ್ಯಾತಿ ಪಡೆದಿದೆ‌.

ತೋಂಟದಾರ್ಯ ಮಠದ ಡಾ. ಸಿದ್ದರಾಮ ಶ್ರೀಗಳು, ಬಂದಿದ್ದ ಭಕ್ತರಿಗೆ ರೊಟ್ಟಿ ನೀಡುವ ಮೂಲಕ ಈ ರೊಟ್ಟಿ ಜಾತ್ರೆಯ ಊಟಕ್ಕೆ ಚಾಲನೆ ನೀಡಿದರು. ಇದಕ್ಕೂ ಮೊದಲು ಡಂಬಳ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಸಿದ್ಧಲಿಂಗೇಶ್ವರರ ಫೋಟೋ ಇಟ್ಟು ಅಡ್ಡಪಲ್ಲಕ್ಕಿ ಮೆರವಣಿಗೆ ಮಾಡಲಾಯಿತು. ಮೆರವಣಿಗೆ ಮಠಕ್ಕೆ ಆಗಮಿಸಿದ ಬಳಿಕ ಯಡಿಯೂರು ಸಿದ್ಧಲಿಂಗೇಶ್ವರರಿಗೆ ಪೂಜೆ, ಮಂಗಳಾರತಿ ಮಾಡಲಾಯಿತು. ರೊಟ್ಟಿ ಜೊತೆಗೆ ರಿಂಡಿ, ಅಗಸಿ ಚಟ್ನಿ, ಪುಂಡಿ ಪಲ್ಲೆಯನ್ನು ಸವಿದು ಸುತ್ತಮುತ್ತಲಿನ ಹಳ್ಳಿಗಳಿಂದ ಆಗಮಿಸಿದ ಸಾವಿರಾರು ಭಕ್ತರು ಜಾತಿ ಭೇದ ಮರೆತು ಸಾಮೂಹಿಕ ಭೋಜನ‌ ಮಾಡಿದರು.