ನಾಮಪತ್ರ ವಾಪಸ್​​​ ತೆಗೆದುಕೊಳ್ಳುವಂತೆ ಬಂಡಾಯ ನಾಯಕರಿಗೆ ಸಿದ್ದು ಸೂಚನೆ

ಕುಂದಗೋಳ ಉಪಚುನಾವಣೆಗೆ ಜಮಖಂಡಿ ಮಾದರಿ ರಣತಂತ್ರ ರೂಪಿಸಿಲು ಕಾಂಗ್ರೆಸ್​​ ನಾಯಕರು ತೀರ್ಮಾನಿಸಿದ್ದಾರೆ. ಮಾಜಿ ಸಿಎಂ ಸಿದ್ದರಾಮಯ್ಯನವರ ನೇತೃತ್ವದಲ್ಲಿ ನಿನ್ನೆ ನಡೆದ ಗುಪ್ತ ಸಭೆಯಲ್ಲಿ ಈ ತೀರ್ಮಾನವನ್ನು ಕೈಗೊಂಡಿದ್ದಾರೆ ಎನ್ನಲಾಗುತ್ತಿದೆ.

ಹುಬ್ಬಳ್ಳಿ: ಎರಡು ದಿನದೊಳಗೆ ತಮ್ಮ ನಾಮಪತ್ರ ವಾಪಸ್​ ತೆಗೆದುಕೊಳ್ಳುವಂತೆ ಬಂಡಾಯದ ಬಾವುಟ ಹಾರಿಸಿದ್ದ ಕೈ ಮುಖಂಡರಿಗೆ ಮಾಜಿ ಸಿಎಂ ಸಿದ್ದರಾಮಯ್ಯ ಸೂಚನೆ ನೀಡಿದ್ದಾರೆ.ಕುಂದಗೋಳದಿಂದ ಒಟ್ಟು ಏಳು ಜನ ಕೈ ಬಂಡಾಯ ಅಭ್ಯರ್ಥಿಗಳು ಸ್ಪರ್ಧೆ ಮಾಡಿದ್ದು, ಏಳು ಜನರನ್ನು ಪ್ರತ್ಯೇಕವಾಗಿ ಕರೆದು ಸಿದ್ದರಾಮಯ್ಯ ಸಭೆ ನಡೆಸಿದ್ದಾರೆ.

ಅದರಲ್ಲಿ ಮೂವರು ಸಿದ್ದರಾಮಯ್ಯ ಮಾತಿಗೆ ಅಸ್ತು ಸಹ ಎಂದಿದ್ದಾರೆ. ಇನ್ನುಳಿದ ನಾಲ್ಕು ಜನ ಕಾದು ನೋಡುವ ತಂತ್ರ ಅನುಸರಿಸುತ್ತಿದ್ದು, ನಾಮಪತ್ರವಾಪಸ್ ಪಡೆದರೆ ಎಲ್ಲ ಬೇಡಿಕೆಗಳನ್ನು ಈಡೇರಿಸುವುದಾಗಿ ಅವರು ಅಭಯ ನೀಡಿದ್ದಾರೆ. ಎರಡೂ ಕ್ಷೇತ್ರಗಳಲ್ಲಿ ಅಧಿಕೃತ ಅಭ್ಯರ್ಥಿ ಪರ‌ ಕೆಲಸ ಮಾಡುವಂತೆ ಸೂಚನೆ‌ ನೀಡಿದ್ದು, ಸಭೆಯಲ್ಲಿ ಸಿದ್ದರಾಮಯ್ಯ ಅವರಿಗೆ ಕೈ ಬಂಡಾಯಗಾರರು ಪಾಸಿಟಿವ್ ರೆಸ್ಪಾನ್ಸ್ ನೀಡಿದ್ದಾರೆ ಎನ್ನಲಾಗಿದೆ.