ಧಾರವಾಡದ ಮಾವು ಸಂಸ್ಕರಣ,ಶೀತಲ ಗೃಹ ಘಟಕಕ್ಕೆ ಡಿಸಿ ಭೇಟಿ: ಪರಿಶೀಲನೆ

ಗಾಮನಗಟ್ಟಿ ಕೈಗಾರಿಕಾ ಪ್ರದೇಶದಲ್ಲಿ ನಿರ್ಮಾಣವಾಗಿರುವ ಇನ್ಫ್ರಾ ಫೈನ್ ಫುಡ್ಸ್ ಕೈಗಾರಿಕೆಯ ಮಾವು ಸಂಸ್ಕರಣ ಹಾಗೂ ಶೀತಲ ಗೃಹ ಘಟಕಕ್ಕೆ ಧಾರವಾಡ ಜಿಲ್ಲಾ ಉಸ್ತುವಾರಿ ಕಾರ್ಯದರ್ಶಿ ರವಿಕುಮಾರ ಸುರಪುರ ಹಾಗೂ ಜಿಲ್ಲಾಧಿಕಾರಿ ನಿತೇಶ್​ ಪಾಟೀಲ ಭೇಟಿ ನೀಡಿ, ಪರಿಶೀಲಿಸಿದರು.

ಧಾರವಾಡ: ಜಿಲ್ಲಾ ಉಸ್ತುವಾರಿ ಕಾರ್ಯದರ್ಶಿ ರವಿಕುಮಾರ ಸುರಪುರ ಹಾಗೂ ಜಿಲ್ಲಾಧಿಕಾರಿ ನಿತೇಶ್ ಪಾಟೀಲ ಅವರು ತೋಟಗಾರಿಕೆ ಇಲಾಖೆಯಿಂದ ರಾಷ್ಟ್ರೀಯ ತೋಟಗಾರಿಕೆ ಮಿಷನ್ 2020-21 ನೇ ಸಾಲಿನ ಯೋಜನೆಯಡಿ ನೀಡಿರುವ ಅನುದಾನದಲ್ಲಿ ಗಾಮನಗಟ್ಟಿ ಕೈಗಾರಿಕಾ ಪ್ರದೇಶದಲ್ಲಿ ನಿರ್ಮಾಣವಾಗಿರುವ ಇನ್ಫ್ರಾ ಫೈನ್ ಫುಡ್ಸ್ ಕೈಗಾರಿಕೆಯ ಮಾವು ಸಂಸ್ಕರಣ ಹಾಗೂ ಶೀತಲ ಗೃಹ ಘಟಕಕ್ಕೆ ಭೇಟಿ ನೀಡಿದರು.

ಉತ್ತರ ಕರ್ನಾಟಕದಲ್ಲಿ ಅತ್ಯಂತ ದೊಡ್ಡ ಮಾವು ಸಂಸ್ಕರಣ ಹಾಗೂ ಶೀತಲ ಗೃಹವಾಗಿರುವ ಈ ಕೈಗಾರಿಕೆಗೆ ಬಹು ಜಿಲ್ಲೆಗಳಿಂದ ಮಾವು ಪೂರೈಕೆ ಆಗಲಿದೆ. ಮಾವು ಸೀಜನ್ ಆರಂಭವಾಗುತ್ತಿರುವ ಹಿನ್ನೆಲೆಯಲ್ಲಿ ಜಿಲ್ಲಾ ಉಸ್ತುವಾರಿ ಕಾರ್ಯದರ್ಶಿಗಳು ಹಾಗೂ ಜಿಲ್ಲಾಧಿಕಾರಿಗಳು ಇಂದು ಭೇಟಿ ನೀಡಿ, ಪರಿಶೀಲಿಸಿದರು.

ಈ ಸಂದರ್ಭದಲ್ಲಿ ಕೃಷಿ, ತೋಟಗಾರಿಕೆ, ಕಂದಾಯ ಇಲಾಖೆ ಅಧಿಕಾರಿಗಳು, ಫಲಾನುಭವಿ ರೈತರು ಹಾಗೂ ಕೈಗಾರಿಕಾ ಉದ್ಯಮಿಗಳು ಜೊತೆಯಲ್ಲಿದ್ದರು.