ಹೊರಬಂದರೆ ನಿಮ್ಮೊಳಗೆ ನಾ ಬರುವೆ: ರಸ್ತೆಯಲ್ಲಿ ಕೊರೊನಾ ಚಿತ್ರ ಬರೆದು ಎಚ್ಚರಿಕೆ

ನಗರದ ಜಯದೇವ ವೃತ್ತದಲ್ಲಿ ಕೊರೊನಾ ವೈರಸ್ ಚಿತ್ರ ಬಿಡಿಸಿ ಮನೆಯಿಂದ ಯಾರೂ ಹೊರ ಬರಬೇಡಿ ಎಂಬ ಶೀರ್ಷಿಕೆ ಮೂಲಕ ಜನರಲ್ಲಿ ಜಾಗೃತಿ ಮೂಡಿಸುವ ಕಾರ್ಯ ನಡೆಯುತ್ತಿದೆ.

ದಾವಣಗೆರೆ: ಕೊರೊನಾ ವೈರಸ್ ಸೋಂಕು ಹರಡುವಿಕೆ ತಡೆಗೆ ಜಾಗೃತಿ ಮೂಡಿಸುವ ಕಾರ್ಯಕ್ರಮಗಳು ಅಲ್ಲಲ್ಲಿ ನಡೆಯುತ್ತಲೇ ಇವೆ. ಈ ಮಧ್ಯೆ, ನಾಮಫಲಕ ಕಲಾವಿದ ಸಂಘ ಈ ಸೋಂಕಿನ ಬಗ್ಗೆ ವಿಶೇಷ ರೀತಿಯಲ್ಲಿ ಅರಿವು ಮೂಡಿಸುತ್ತಿದೆ.
ನಗರದ ಜಯದೇವ ವೃತ್ತದಲ್ಲಿ ಕೊರೊನಾ ವೈರಸ್ ಚಿತ್ರ ಬಿಡಿಸಿ ಮನೆಯಿಂದ ಯಾರೂ ಹೊರಗಡೆ ಬರಬೇಡಿ ಎಂಬ ಶೀರ್ಷಿಕೆ ಮೂಲಕ ಜನರಿಗೆ ಎಚ್ಚರಿಕೆ ಮೂಡಿಸುತ್ತಿದೆ. ರಸ್ತೆಯ ವೃತ್ತದಲ್ಲಿ ನೂರು ಅಡಿ ಸುತ್ತಳತೆಯ ಬೃಹತ್ ಆಕಾರದ ವೈರಸ್ ಚಿತ್ರ ರಚಿಸಲಾಗಿದೆ.

ಅಲ್ಲದೇ, ಮನೆಯಿಂದ ಹೊರಗಡೆ ನೀವು ಬಂದರೆ ನಿಮ್ಮ ಮನೆಗೆ ನಾನು ಬರುವೆ ಎಂಬ ವಾಕ್ಯ ಬರೆಯಲಾಗಿದೆ. ಸುಮಾರು 30 ಕಲಾವಿದರು ಈ ಚಿತ್ರ ಬಿಡಿಸಿದ್ದಾರೆ. ಇನ್ನೂ ನಗರದ ಹತ್ತು ಕಡೆ ಇದೇ ರೀತಿ ಚಿತ್ರ ಬಿಡಿಸಿ ಅರಿವು ಮೂಡಿಸುತ್ತೇವೆ ಎಂದು ಕಲಾವಿದರ ಸಂಘ ಹೇಳಿದೆ. ಕಲಾವಿದರ ಈ ಕಾರ್ಯಕ್ಕೆ ಜನರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.