ಸುಳ್ಯದ ಗ್ರಾಮೀಣ ವಿದ್ಯಾರ್ಥಿ ಎಸ್ಎಸ್​ಎಲ್​ಸಿ ಟಾಪರ್

ಕಡಬ ತಾಲೂಕಿನ ಸುಬ್ರಹ್ಮಣ್ಯದ ಕುಮಾರಸ್ವಾಮಿ ಆಂಗ್ಲ ಮಾಧ್ಯಮ ಶಾಲೆಯ ವಿದ್ಯಾರ್ಥಿ ಅನೂಷ್ ಎ.ಎಲ್. 625ಕ್ಕೆ 625 ಅಂಕಗಳನ್ನು ಪಡೆದು ದಕ್ಷಿಣ ಕನ್ನಡ ಜಿಲ್ಲೆಗೆ ಕೀರ್ತಿ ತಂದಿದ್ದಾನೆ.

ಸುಳ್ಯ:ಎಸ್ಎಸ್​ಎಲ್​ಸಿ ಫಲಿತಾಂಶ ಪ್ರಕಟವಾಗಿದ್ದು, ದಕ್ಷಿಣ ಕನ್ನಡ ಜಿಲ್ಲೆಯ ಸುಬ್ರಹ್ಮಣ್ಯದ ಕುಮಾರಸ್ವಾಮಿ ವಿದ್ಯಾಲಯದ ವಿದ್ಯಾರ್ಥಿ ಅನೂಷ್​​​ 625ಕ್ಕೆ 625 ಅಂಕ ಗಳಿಸುವ ಮೂಲಕ ಎಸ್ಎಸ್​ಎಲ್​ಸಿ ಟಾಪರ್ ಆಗಿ ಹೊರಹೊಮ್ಮಿದ್ದಾನೆ.

ಈತ ಸುಳ್ಯ ತಾಲೂಕಿನ ಬಳ್ಪದ ಲೋಕೇಶ್ ಹಾಗೂ ಉಷಾ ದಂಪತಿಯ ಪುತ್ರ. ಈತನ ತಂದೆ ಲೋಕೇಶ್​ ಅವರು ಗುತ್ತಿಗಾರು ಮೆಸ್ಕಾಂ ಶಾಖೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ತಾಯಿ ಉಷಾ ಅವರು ಗೃಹಿಣಿ. ಸಹೋದರ ಆಕಾಶ್ ಆರನೇ ತರಗತಿ ವಿದ್ಯಾರ್ಥಿ.

ಎಸ್ಎಸ್​ಎಲ್​ಸಿ ಟಾಪರ್ ಆಗಿರುವ ಬಗ್ಗೆ 'ಈಟಿವಿ ಭಾರತ'ದೊಂದಿಗೆ ಮಾತನಾಡಿದ ಅನೂಷ್, ತನ್ನ ಸಂತಸ ವ್ಯಕ್ತಪಡಿಸಿದ್ದು, ಮುಂದಕ್ಕೆ ಯುಪಿಎಸ್​ಸಿ ಪರೀಕ್ಷೆ ಬರೆದು ಐಎಎಸ್, ಐಎಫ್ಎಸ್ ಶ್ರೇಣಿಯ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸಬೇಕೆಂಬ ಗುರಿ ಇಟ್ಟುಕೊಂಡಿದ್ದಾನೆ. ಅನೂಷ್ ಗೆ ಈಟಿವಿ ಭಾರತದ ಕಡೆಯಿಂದ ಆಲ್ ದಿ ಬೆಸ್ಟ್.