ಮಂಗಳೂರು: ಕದ್ರಿ ಶ್ರೀ ಜೋಗಿ(ಯೋಗೀಶ್ವರ)ಮಠದ ಜೀರ್ಣೋದ್ಧಾರದ ವೇಳೆ ಎರಡು ಸಾವಿರ ವರ್ಷಗಳ ಪುರಾತನ ಕಾಲದ ಶ್ರೀ ಕಾಳಭೈರವನ ವಿಗ್ರಹವನ್ನು ಬದಲಾಯಿಸಿ, ರಾಜಸ್ಥಾನದ ಮಾರ್ವಾಡಿಗಳು ನೀಡಿರುವ ಸಣ್ಣ ಕಾಳಭೈರವನ ಮೂರ್ತಿಯನ್ನು ಪ್ರತಿಷ್ಠಾಪಿಸಲಾಗಿದೆ. ಇದು ಮಠಾಧೀಶ ಶ್ರೀ ನಿರ್ಮಲನಾಥಜೀ ಮಹಾರಾಜ್ ಅವರು ಎಸಗಿರುವ ಅಕ್ಷಮ್ಯ ಅಪರಾಧ ಎಂದು ಶ್ರೀ ಜೋಗಿ(ಯೋಗೀಶ್ವರ) ಮಠದ ಜೀರ್ಣೋದ್ಧಾರ ಮತ್ತು ಕಾರ್ಯನಿರ್ವಹಣಾ ಸಮಿತಿ ಆರೋಪಿಸಿದೆ.
ನಗರದಲ್ಲಿಂದು ಸುದ್ದಿಗೋಷ್ಠಿಯಲ್ಲಿ ಜೀರ್ಣೋದ್ಧಾರ ಮತ್ತು ಕಾರ್ಯನಿರ್ವಹಣಾ ಸಮಿತಿಯ ಅಧ್ಯಕ್ಷ ಹರಿನಾಥ್ ಮಾತನಾಡಿ, ಪುರಾತನ ಕಾಳಭೈರವನ ಮೂರ್ತಿಗೆ ಸಂಬಂಧಿಸಿದಂತೆ ಡಿಸಿ ಅವರಿಂದ, ಪೊಲೀಸ್ ಇಲಾಖೆಯಿಂದ ನ್ಯಾಯ ದೊರಕಿಲ್ಲ. ಕಾಳಭೈರವನ ಹಳೆಯ ವಿಗ್ರಹವನ್ನು ಸ್ವಾಮೀಜಿ ಅವರು 70 ಲಕ್ಷ ರೂ ಹಣಕ್ಕೆ ಮಾರಾಟ ಮಾಡಲು ಯತ್ನಿಸಿದ್ದರು ಎಂದು ಆರೋಪಿಸಿದರು.
ಆದರೆ ಪುರಾತತ್ವ ಇಲಾಖೆಯಿಂದ ತಡೆಯಾಜ್ಞೆ ತಂದ ಬಳಿಕ ಈ ಮೂರ್ತಿಯನ್ನು ಅಲ್ಲಿ ಪರಶುರಾಮ ಯಜ್ಞಕುಂಡದ ಬಳಿ ಇಡಲಾಗಿದೆ. ಅಲ್ಲದೇ ಇನ್ನಿತರ ಪುರಾತನ ವಿಗ್ರಹ ಜ್ವಾಲಾ ಮಹಮ್ಮಾಯಿ, ಮಹಾಕಾಳಿ ಇನ್ನಿತರ ಮೂರ್ತಿಗಳನ್ನು ನಿರ್ಲಕ್ಷ್ಯ‌ಮಾಡಿ ಹೊಸ ಮೂರ್ತಿಗಳನ್ನು ಪ್ರತಿಷ್ಠಾಪಿಸಲಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.