ಚಿಕ್ಕಮಗಳೂರಲ್ಲಿ ಅಕ್ರಮ ಭೂಮಿ ಮಂಜೂರು: ನಾಲ್ವರ ವಿರುದ್ಧ ದೂರು ದಾಖಲು.. ಇಬ್ಬರು ಅರೆಸ್ಟ್​

ಅಕ್ರಮ ಭೂ ಮಂಜೂರು ಹಿನ್ನೆಲೆ ನಾಲ್ವರು ಅಧಿಕಾರಿಗಳ ವಿರುದ್ಧ ಮೂಡಿಗೆರೆ ತಹಶೀಲ್ದಾರ್ ತಿಪ್ಪೇಸ್ವಾಮಿ ಅವರು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಚಿಕ್ಕಮಗಳೂರು : ಕಡೂರು ಹಾಗೂ ಮೂಡಿಗೆರೆ ತಾಲೂಕಿನ ಈ ಲ್ಯಾಂಡ್ ಸ್ಕ್ಯಾಂ ರಾಜ್ಯದಲ್ಲೇ ದೊಡ್ಡದಾಗಿದೆ. ಕಡೂರು ತಹಶೀಲ್ದಾರ್ ಆಗಿದ್ದ ಉಮೇಶ್ 3500 ಎಕರೆ ಅಕ್ರಮ ಮಾಡಿದ್ರೆ, ಮೂಡಿಗೆರೆ ತಹಶೀಲ್ದಾರ್ ಆಗಿದ್ದ ರಮೇಶ್ 2200 ಎಕರೆ ಅಕ್ರಮವಾಗಿ ಖಾತೆ ಮಾಡಿಕೊಟ್ಟಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರ ವಿರುದ್ದ ಹಾಲಿ ತಹಶೀಲ್ದಾರ್ ತಿಪ್ಪೇಸ್ವಾಮಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈಗಾಗಲೇ ಇಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ.

ಮೂಡಿಗೆರೆಯಲ್ಲಿ 2019-2021ರ ವರೆಗೆ ತಹಶೀಲ್ದಾರ್ ಆಗಿದ್ದ ರಮೇಶ್ ಬಾಳೂರು ಹೋಬಳಿಯ ಹಾದಿಓಣಿ ಗ್ರಾಮದ ಸರ್ವೇ ನಂಬರ್ 21ರಲ್ಲಿ 7 ಜನಕ್ಕೆ, ಕೂವೆ ಗ್ರಾಮದ ಸರ್ವೇ ನಂಬರ್ 87ರಲ್ಲಿ 6 ಜನ ಸೇರಿದಂತೆ ಒಟ್ಟು 13 ಜನಕ್ಕೆ ಭೂಮಿ ಮಂಜೂರು ಮಾಡಿದ್ದಾರೆ. ಆದರೆ ಅರ್ಜಿ ಇಲ್ಲ, ಕಮಿಟಿಯಲ್ಲಿ ಫೈಲ್ ಇಲ್ಲ, ಸಾಗುವಳಿ ಚೀಟಿಯೂ ಇಲ್ಲ ಎಂಬುದು ತಿಳಿದುಬಂದಿದೆ.

ಈ ಬಗ್ಗೆ ಮೂಡಿಗೆರೆ ತಹಶೀಲ್ದಾರ್ ತಿಪ್ಪೇಸ್ವಾಮಿ ಅವರು ಮಾಧ್ಯಮದವರೊಂದಿಗೆ ಮಾತನಾಡಿ, ಬಾಳೂರು ಹೋಬಳಿ ಸರ್ವೇ ನಂಬರ್ 21ರಲ್ಲಿ 7 ಜನಕ್ಕೆ ಅಕ್ರಮವಾಗಿ ಖಾತೆ ಮಾಡಿದ್ದಾರೆ. ಅಕ್ರಮವಾಗಿ ಅಂದರೆ ಯಾವುದೇ ಅರ್ಜಿ ಇಲ್ಲ. ಸಮಿತಿಗೆ ಮಂಡಿಸಿಲ್ಲ. ಸಾಗುವಳಿ ಚೀಟಿ ನೀಡಿಲ್ಲ. ಈ ಬಗ್ಗೆ ಡಿಸಿ ಆಫೀಸ್​ನಲ್ಲಿ ಕಂಪ್ಲೇಂಟ್​ ಆಗಿತ್ತು. ಡಿಸಿಯವರು ಡೈರೆಕ್ಷನ್ಸ್​ ಕೊಟ್ರು. ಅದರಲ್ಲಿ ಕೋರ್ಟ್​ನಲ್ಲಿ 7 ಜನರದ್ದು ಖಾತೆ ರದ್ದಾಗಿತ್ತು. ಇನ್ನು 6 ಜನರದ್ದು ತನಿಖೆ ನಡೆಯುತ್ತಿದೆ. ಖಾತೆ ರದ್ದುಪಡಿಸಿ ನಮಗೆ ನಿರ್ದೇಶನ​ ಕೊಟ್ಟಿದ್ದಾರೆ ಎಂದರು.

ಅವರು ಅಕ್ರಮವಾಗಿ ಖಾತೆಗೆ ಕ್ರಮ ವಹಿಸಿರುವುದರಿಂದ ನಾವು ಐಪಿಸಿ ಸೆಕ್ಷನ್ 409, 464 ಹಾಗೂ ಕೆಎಲ್​ಆರ್ ಆ್ಯಕ್ಟ್​ 964 ಹಾಗೂ 192ಎ ಮತ್ತು 192 ಬಿ ರಡಿಯಲ್ಲಿ ನಾಲ್ಕು ಜನರ ಮೇಲೆ ನಾವು ಮೂಡಿಗೆರೆ ಸಬ್​​ಇನ್ಸ್​ಪೆಕ್ಟರ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದೇವೆ. ತಹಶೀಲ್ದಾರ್​, ಶಿರಸ್ತೇದಾರ್​, ಗ್ರಾಮ ಲೆಕ್ಕಾಧಿಕಾರಿ ಮತ್ತು ಭೂಮಿ ಆಪರೇಟರ್ ಒಟ್ಟು ನಾಲ್ಕು ಜನರ ವಿರುದ್ಧ​ ದೂರು ಸಲ್ಲಿಸಲಾಗಿದೆ. ಈಗ ಗಿರೀಶ್​ ಹಾಗೂ ನೇತ್ರಾವತಿ ಎಂಬುವರನ್ನು ಬಂಧಿಸಲಾಗಿದೆ ಎಂದು ಆಗಿದ್ದಾರೆ.

2019-2021ರವರೆಗೂ ಮೂಡಿಗೆರೆ ತಾಲೂಕಿನಲ್ಲಿ ರಮೇಶ್​ ಎಂಬುವವರು ತಹಶೀಲ್ದಾರ್ ಆಗಿ ಕಾರ್ಯನಿರ್ವಹಿಸಿದ್ದಾರೆ. ಇನ್ನೊಬ್ಬರು ಶಿರಸ್ತೇದಾರರಾದ ಪಾಲಯ್ಯ ಎಂಬುವವರು ಕರ್ತವ್ಯ ನಿರ್ವಹಿಸಿದ್ದಾರೆ. ಗಿರೀಶ್​ ಎಂಬುವವರು ಬಾಳೂರು ಹೋಬಳಿಯಲ್ಲಿ ಗ್ರಾಮ ಲೆಕ್ಕಾಧಿಕಾರಿ, ಇವರು ಆರ್​ಐ ಇನ್​ಚಾರ್ಜ್​ ಆಗಿದ್ದಾರೆ. ಭೂಮಿ ಆಪರೇಟರ್​ ಆಗಿ ನೇತ್ರಾವತಿ ಎಂಬುವವರು ಕೆಲಸ ನಿರ್ವಹಿಸುತ್ತಿದ್ದರು ಎಂದು ಮಾಹಿತಿ ನೀಡಿದ್ದಾರೆ. ಇದೀಗ ತಲೆಮರೆಸಿಕೊಂಡಿರುವ ರಮೇಶ್ ಹಾಗೂ ಪಾಲಯ್ಯ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ ಎಂದು ತಹಶೀಲ್ದಾರ್​ ತಿಪ್ಪೇಸ್ವಾಮಿ ತಿಳಿಸಿದರು.

ಇದನ್ನೂ ಓದಿ:ಅಕ್ರಮವಾಗಿ ಸರ್ಕಾರಿ, ಅರಣ್ಯ ಭೂಮಿ ಮಂಜೂರು: ಕಡೂರು ತಹಶೀಲ್ದಾರ್ ಬಂಧನ