SSLCಯಲ್ಲಿ ಗಡಿಜಿಲ್ಲೆ ಮಕ್ಕಳ ಸಾಧನೆ, 15ನೇ ಸ್ಥಾನಕ್ಕೇರಿದ ಚಾಮರಾಜನಗರ

ಚಾಮರಾಜನಗರ ಜಿಲ್ಲೆಯಲ್ಲಿ ಈ ಬಾರಿ ಶೇ.80.58 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಜಿಲ್ಲಾವಾರು ಫಲಿತಾಂಶ ಪಟ್ಟಿಯಲ್ಲಿ ಕಳೆದ ಬಾರಿ ಶೇ.74.46 ರಷ್ಟು ಫಲಿತಾಂಶ ಪಡೆದು ರಾಜ್ಯಕ್ಕೆ 24 ನೇ ಸ್ಥಾನ ಪಡೆದ ಜಿಲ್ಲೆ, ಈ ಸಲ 9 ಸ್ಥಾನಗಳಷ್ಟು ಮುಂದೆ ಬಂದಿದೆ.

ಚಾಮರಾಜನಗರ: ಕಳೆದ ಶೈಕ್ಷಣಿಕ ವರ್ಷಕ್ಕಿಂತ ಈ ಬಾರಿ ಜಿಲ್ಲೆಯ ವಿದ್ಯಾರ್ಥಿಗಳು ಗಮನಾರ್ಹ ಸಾಧನೆ ಮಾಡಿದ್ದಾರೆ. ಒಟ್ಟು 625ಕ್ಕೆ 618 ಅಂಕ ಪಡೆದ ಗುಂಡ್ಲುಪೇಟೆಯ ಎಂ.ಸ್ಪೂರ್ತಿ ಜಿಲ್ಲೆಗೆ ಟಾಪರ್ ಆಗಿ ಹೊರಹೊಮ್ಮಿದ್ದಾರೆ.

ಹನೂರು ಕ್ರಿಸ್ತರಾಜ ಶಾಲೆಯ ಯಶಸ್ವಿನಿ-616 ಅಂಕ, ನಗರದ ಸೇವಾಭಾರತಿ ಆಂಗ್ಲ ಮಾಧ್ಯಮ ಶಾಲೆಯ ಪ್ರಿಯಾದರ್ಶಿನಿ ಮತ್ತು ಹನೂರಿನ ವಿವೇಕಾನಂದ ಪ್ರೌಢಶಾಲೆಯ ಅರ್ಬಿಯಾ ಸಲೀಂ- 613 ಅಂಕ, ಕೊಳ್ಳೇಗಾಲದ ನಿಸರ್ಗ ವಿದ್ಯಾನಿಕೇತನ ಶಾಲೆಯ ಶ್ರೀನಿವಾಸ ಪ್ರಸಾದ್- 611 ಅಂಕ ಗಳಿಸಿ ಕ್ರಮವಾಗಿ ಜಿಲ್ಲೆಗೆ 2, 3, 4ನೇ ಸ್ಥಾನ ಪಡೆದಿದ್ದಾರೆ.

ಎರಡನೇ ಸ್ಥಾನ ಪಡೆದ ಹನೂರಿನ ಕ್ರಿಸ್ತರಾಜ ಪ್ರೌಢಶಾಲೆಯ ಯಶಸ್ವಿನಿ ತಂದೆ ಕಾಮಗೆರೆ ಗ್ರಾಮದ ಕೆ.ಎಸ್.ರಾಜುಗೌಡ ಜೀವನೋಪಾಯಕ್ಕಾಗಿ ಪಂಕ್ಚರ್ ಶಾಪ್ ಇಟ್ಟುಕೊಂಡಿದ್ದಾರೆ.

613 ಅಂಕ ಪಡೆದು ಜಿಲ್ಲೆಗೆ ಮೂರನೇ ಸ್ಥಾನ ಪಡೆದ ಹನೂರಿನ ವಿವೇಕಾನಂದ ಶಾಲೆಯ ಅರ್ಬಿಯಾ ಸಲೀಂ, ಬ್ಲಾಕ್ ಕಾಂಗ್ರೆಸ್ ಮಹಿಳಾ ಘಟಕದ ಅಧ್ಯಕ್ಷೆ ಹಾಗೂ ವೈದ್ಯರಾದ ಅಥಿಯಾ ಫೈರೋಜ್ ಮತ್ತು ಸಲೀಂ ಪಾಷ ದಂಪತಿ ಪುತ್ರಿಯಾಗಿದ್ದಾರೆ.

ಕೊಳ್ಳೇಗಾಲದ ನಿಸರ್ಗ ವಿದ್ಯಾನಿಕೇತನ ಶಾಲೆಯ ಶ್ರೀನಿವಾಸ ಪ್ರಸಾದ್ 611 ಅಂಕ ಪಡೆದು ನಾಲ್ಕನೇ ಸ್ಥಾನ ಪಡೆದಿದ್ದು, ಇವರ ತಂದೆ ಕುದೇರಿನಲ್ಲಿರುವ ಚಾಮುಲ್ ಘಟಕದಲ್ಲಿ ನೌಕರರಾಗಿದ್ದು, ತಾಯಿ ಗೃಹಿಣಿಯಾಗಿದ್ದಾರೆ.

ಫಲಿತಾಂಶ ಪಟ್ಟಿಯಲ್ಲಿ 15 ನೇ ಸ್ಥಾನಕ್ಕೇರಿದ ಜಿಲ್ಲೆ:

ಈ ಬಾರಿಯ ಫಲಿತಾಂಶದಲ್ಲಿ ಮಹತ್ವದ ಸಾಧನೆ ಮಾಡಿದ ಜಿಲ್ಲೆಯ ವಿದ್ಯಾರ್ಥಿಗಳು ಗಡಿಜಿಲ್ಲೆಯನ್ನು 15 ನೇ ಸ್ಥಾನಕ್ಕೇರಿಸಿದ್ದಾರೆ. ಈ ಬಾರಿ ಪರೀಕ್ಷೆ ಬರೆದ

ಶೇ.80.58 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಕಳೆದ ಸಾಲಿನಲ್ಲಿ ಶೇ.74.46 ರಷ್ಟು ಫಲಿತಾಂಶ ಪಡೆದು ಜಿಲ್ಲೆ ರಾಜ್ಯಕ್ಕೆ 24 ನೇ ಸ್ಥಾನ ಪಡೆದಿತ್ತು. ಈ ಬಾರಿ 9 ಸ್ಥಾನಗಳಷ್ಟು ಮುಂದೆ ಬಂದಿದೆ.

ಪಿಯು ಫಲಿತಾಂಶದಲ್ಲಿ 6 ಸ್ಥಾನಗಳಷ್ಟು ಕುಸಿದಿದ್ದ ಗಡಿಜಿಲ್ಲೆ ಎಸ್​ಎಸ್​ಎಲ್​ಸಿಯಲ್ಲಿ ಪ್ರಗತಿ ತೋರಿಸಿದೆ.