ಕೊಳ್ಳೇಗಾಲ: ಆಮೆ ಮಾಂಸ ಸವಿಯುತ್ತಿದ್ದ ಆರು ಮಂದಿ ಬಂಧನ

ಆಮೆ ಕೊಂದು ಬಾಡೂಟ ಮಾಡಿ ಸವಿದಿರುವ 6 ಮಂದಿಯನ್ನು ಕೊಳ್ಳೇಗಾಲ ಅರಣ್ಯ ಅಧಿಕಾರಿಗಳು ಬಂಧಿಸಿದ್ದಾರೆ.

ಕೊಳ್ಳೇಗಾಲ: ಇಲ್ಲಿನ ಬಸ್ತಿಪುರ ಬಡಾವಣೆಯ ಕಬಿನಿ ನಾಲೆಯ ಬಳಿ ಸಮೀಪದಲ್ಲಿ ಆಮೆಯನ್ನು ಕೊಂದು ಮಾಂಸ ಸವಿಯುತ್ತಿದ್ದ 6 ಮಂದಿಯನ್ನು ಅರಣ್ಯ ಇಲಾಖಾ ಅಧಿಕಾರಿಗಳು ಬಂಧಿಸಿದ್ದಾರೆ.

ಗುಂಡ್ಲುಪೇಟೆ ಸಮೀಪದ ಮಾಕ್ಕಳ್ಳಿ ಕಲೋನಿಯ ಸುರೇಶ್, ಶಿವಣ್ಣ, ಗಣೇಶ್, ಹರೀಶ್, ಕುಮಾರ್, ಶ್ರೀನಿವಾಸ್ ಎಂಬುವರು ಬಂಧಿತ ಆರೋಪಿಗಳಾಗಿದ್ದಾರೆ. ಬಂಧಿತ ಆರೋಪಿಗಳು ಊರೂರು ತಿರುಗಿ ಶಾಸ್ತ್ರ ಹೇಳಿ ಬದುಕುತ್ತಿದ್ದವರಾಗಿದ್ದು, ಪಟ್ಟಣ ಸಮೀಪದ ಬಸ್ತಿಪುರ ಗ್ರಾಮದ ಕಬಿನಿ ನಾಲೆಯ ಸಮೀಪದಲ್ಲಿ ಮಂಗಳವಾರ ರಾತ್ರಿ ಆಮೆಯನ್ನು ಕೊಂದು ಮಾಂಸದಿಂದ ಅಡುಗೆ ತಯಾರಿಸುತ್ತಿದ್ದರು.

ಇದೇ ವೇಳೆ ರೈತ ಮುಖಂಡ ಮಹದೇವ ಅನುಮಾನಸ್ಪದವಾಗಿ ಕಂಡ ಇವರನ್ನು ವಿಚಾರಿಸಿರುವ ವೇಳೆ ಆಮೆ ಕೊಂದು ಅಡುಗೆ ತಯಾರಿಸುತ್ತಿದ್ದಾರೆ ಎಂಬ ಖಚಿತ ಮಾಹಿತಿ ಆಧಾರಿಸಿ ಅರಣ್ಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.

ಎಚ್ಚೆತ್ತ ಆರ್.ಎಫ್.ಓ ಪ್ರವೀಣ್ ರಾಮಪ್ಪ ಛಲವಾದಿ ಅರಣ್ಯ ಸಿಬ್ಬಂದಿ ಜೊತೆ ಸ್ಥಳಕ್ಕೆ ದೌಡಾಯಿಸಿ, 6 ಮಂದಿಯನ್ನು‌ ವಶಕ್ಕೆ ಪಡೆದುಕೊಂಡಿದ್ದಾರೆ. ಆಮೆ ಚಿಪ್ಪು, ಮಾಂಸ ಹಾಗೂ ಮೂಳೆಗಳನ್ನು ಜಪ್ತಿ ಮಾಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.