ಚಾಮರಾಜನಗರ: ಬಿಸಿಲ ಝಳ, ಬಾಯಾರಿಕೆ, ದಣಿವು ನೀಗಿಸಿಕೊಳ್ಳಲು ಕೊಳ್ಳೇಗಾಲದ ಮಂದಿ ಮಾಕ್ಟೇಲ್ ಕುಡಿಯುತ್ತಿದ್ದಾರೆ.
ಮಾಕ್ಟೇಲ್ ಕುಡಿಯಲು ಈಗ ರೆಸಾರ್ಟ್, ರೆಸ್ಟೋರೆಂಟ್, ಬೀಚ್‌ಗಳಿಗೆ ಹೋಗಬೇಕಿಲ್ಲ. ಹಳ್ಳಿ ಹಳ್ಳಿಗಳ ಟೀ ಸ್ಟಾಲ್‌ಗಳಲ್ಲೂ ಈ ಪೇಯ ಸಿಗುತ್ತಿದೆ. ಇದಕ್ಕೊಂದು ಉದಾಹರಣೆ ಕೊಳ್ಳೇಗಾಲದ ಬೃಂದಾವನ ಹೈವೇ ಟೀ ಸ್ಟಾಲ್. ಬಿಸಿಲಿನ ಧಗೆ ತಡೆದುಕೊಳ್ಳಲಾಗದೇ ಇಲ್ಲಿನ ಜನರು ಈ ಅಂಗಡಿಗೆ ದಾಂಗುಡಿ ಇಡುತ್ತಿದ್ದು, ಮಾಕ್ಟೇಲ್ ಮಜಾ ಅನುಭವಿಸುತ್ತಿದ್ದಾರೆ.
ಮಾಕ್ಟೇಲ್ ನಾನ್ ಅಲ್ಕೋಹಾಲಿಕ್ ಡ್ರಿಂಕ್. ನಿಂಬೆ, ಪುದೀನಾ ಹಾಕಿ ಈ ಪೇಯ ತಯಾರಿಸುವುದರಿಂದ ಕುಡಿಯಲು ಆಹ್ಲಾದವಾಗಿರುತ್ತದೆ ಎಂದು ಟೀ ಅಂಗಡಿ ಮಾಲೀಕ ಹರೀಶ್ ಹೇಳುತ್ತಾರೆ. ಇಲ್ಲಿ ಗ್ರಾಹಕರು ಪ್ರತಿ ಗ್ಲಾಸು ಮಾಕ್‌ಟೇಲ್‌ಗೆ 15 ರೂ. ಪಾವತಿಸಬೇಕು. ಅಂಗಡಿಯಲ್ಲಿ ದಿನವೊಂದಕ್ಕೆ 300-350 ಗ್ಲಾಸ್ ಮಾಕ್ ಟೇಲ್ ಮಾರಾಟವಾಗುತ್ತಿದೆ ಎನ್ನುತ್ತಾರೆ ಅಂಗಡಿ ಮಾಲೀಕರು.
ನಮ್ಮಲ್ಲಿ ಸಿಗುವ ಮಾಕ್‌ಟೇಲ್‌ನ್ನು ಒಮ್ಮೆ ಬಂದು ಟೇಸ್ಟ್ ಮಾಡಿದವರು ಖಾಯಂ ಗ್ರಾಹಕರಾಗಿ ಪ್ರತಿದಿನ ಇಷ್ಟಪಟ್ಟು ಸೇವಿಸುತ್ತಿದ್ದಾರೆ ಎಂದು ಹರೀಶ್ ಹೇಳಿದರು.
ನಾನು ಕೂಡ ಪ್ರತಿದಿನ ಮಾಕ್ಟೇಲ್ ಸೇವಿಸುತ್ತಿದ್ದು ಪೇಯ ರುಚಿಯಾಗಿದೆ. ನನಗೆ ಈ ರುಚಿ ಮತ್ತು ಪೇಯ ಎರಡು ಹೊಸತು ಎನ್ನುತ್ತಾರೆ ಗ್ರಾಹಕ ಗುರುಮೂರ್ತಿ.