ಗಡಿ ಜಿಲ್ಲೆಯಲ್ಲಿ ಲಕ್ಷಕ್ಕೂ ಅಧಿಕ ಮಂದಿಯ ಹಸಿವು ನೀಗಿಸಿದ ಇಂದಿರಾ ಕ್ಯಾಂಟೀನ್​

ಲಾಕ್​​ಡೌನ್ ಘೋಷಣೆಯಾದ ಬಳಿಕ ಇಂದಿರಾ ಕ್ಯಾಂಟೀನ್​​ನಲ್ಲಿ ಹಲವು ಕಡೆ ಉಚಿತವಾಗಿಯೇ ಊಟ ವಿತರಣೆ ಮಾಡಲಾಗಿತ್ತು. ಅಲ್ಲದೇ ಬಡವರ್ಗದವರಿಗೆ ಕ್ಯಾಂಟೀನ್​​ನಲ್ಲಿ ಕಡಿಮೆ ಬೆಲೆಗೆ ಊಟ, ತಿಂಡಿಯ ವ್ಯವಸ್ಥೆಯೂ ಆಗುತ್ತಿತ್ತು. ಲಾಕ್​​ಡೌನ್​ ವೇಳೆಯಲ್ಲಿಯೂ ಇಲ್ಲಿನ ಇಂದಿರಾ ಕ್ಯಾಂಟೀನ್​​ ಬಡವರಿಗೆ ಆಶಾಕಿರಣವಾಗಿದ್ದು, ಜಿಲ್ಲೆಯಲ್ಲಿ ಲಕ್ಷ ಲಕ್ಷ ಜನ ಇಂದಿರಾ ಕ್ಯಾಂಟೀನ್​ ಊಟ ಸವಿದಿದ್ದಾರೆ.

ಚಾಮರಾಜನಗರ:ಬಡವರು, ನಿರ್ಗತಿಕರಿಗೆ ವರದಾನವಾಗಿದ್ದ ಇಂದಿರಾ ಕ್ಯಾಂಟೀನ್​ ಲಾಕ್​ಡೌನ್​​ ವೇಳೆಯಲ್ಲೂ ಸಾರ್ಥಕ ರೀತಿಯಲ್ಲಿ ಕಾರ್ಯ ನಿರ್ವಹಿಸಿದೆ.

ಮಾ. 23ರಿಂದ ಏ.21ರ ವರೆಗೆ ಚಾಮರಾಜನಗರ, ಗುಂಡ್ಲುಪೇಟೆ, ಯಳಂದೂರು ಹಾಗೂ ಕೊಳ್ಳೇಗಾಲ ಒಳಗೊಂಡಂತೆ ಬರೋಬ್ಬರಿ 1.40 ಲಕ್ಷ ಊಟ ವಿತರಿಸಲಾಗಿದ್ದು, ರೋಗಿಗಳ ಸಂಬಂಧಿಕರು, ಸರ್ಕಾರಿ ನೌಕರರು ಇದರ ಫಲಾನುಭವಿಗಳಾಗಿದ್ದಾರೆ. ಪ್ರತಿ ತಿಂಗಳಿಗೆ 1.35 ಲಕ್ಷ ಊಟ ನೀಡಲು ಇಂದಿರಾ ಕ್ಯಾಂಟೀನ್​ಗೆ ಅವಕಾಶವಿದ್ದರೂ ಲಾಕ್​ಡೌನ್​​ ಇಲ್ಲದ ವೇಳೆ 2-3 ಸಾವಿರ ಊಟ ಕಡಿಮೆಯೇ ವಿತರಣೆಯಾಗುತ್ತಿತ್ತು.

ಆದರೆ, ಲಾಕ್​​ಡೌನ್​​ನಲ್ಲಿ ಎಲ್ಲಾ ಹೋಟೆಲ್, ಫಾಸ್ಟ್ ಪುಡ್ ಬಂದ್​ ಆಗಿದ್ದರೂ ಹಸಿದವರಿಗೆ ಇಂದಿರಾ ಕ್ಯಾಂಟೀನ್​​ ಒಂದೇ ಆಧಾರವಾಗಿ 1.40 ಸಾವಿರ ಊಟ ಖರ್ಚಾಗಿದೆ. ಇದರಲ್ಲಿ 6 ಸಾವಿರ ಊಟ ಉಚಿತವಾಗಿ ನಿರ್ಗತಿಕರಿಗೆ ವಿತರಿಸಲಾಗಿದೆ. ಲಾಕ್​​ಡೌನ್​​ ವೇಳೆ ಕ್ಯಾಂಟೀನ್​ಗೆ ಬಂದವರಿಗೆ ಯಾರೂ ಹಸಿವಿನಿಂದ ಹಿಂತಿರುಗದಂತೆ ನೋಡಿಕೊಳ್ಳಲಾಗಿದೆ. ಬಡವರು, ಕೂಲಿ ಕಾರ್ಮಿಕರು ಸೇರಿದಂತೆ ಸರ್ಕಾರಿ ನೌಕರರಿಗೂ ಇಂದಿರಾ ಕ್ಯಾಂಟೀನ್​ ಹಸಿವು ನೀಗಿಸಿದೆ ಎಂದು ನಗರಾಭಿವೃದ್ಧಿ ನಿರ್ದೇಶಕ ಕೆ.ಸುರೇಶ್ ಈಟಿವಿ ಭಾರತಕ್ಕೆ ತಿಳಿಸಿದ್ದಾರೆ.

ಇನ್ನು, ಲಾಕ್​​ಡೌನ್​​​ನಲ್ಲಿ ವಿಶೇಷವಾಗಿ ಬಾಕ್ಸ್​​ಗಳನ್ನು ತಂದರೆ ಪಾರ್ಸೆಲ್ ವ್ಯವಸ್ಥೆಯನ್ನು ಕಲ್ಪಿಸಿದ್ದೆವು. ಈ ಮೂಲಕ ಆಸ್ಪತ್ರೆಯಲ್ಲಿದ್ದ ರೋಗಿಗಳ ಸಂಬಂಧಿಕರು, ಕೂಲಿ ಕಾರ್ಮಿಕರು ಇದರ ಲಾಭ ಪಡೆದರು ಎಂದು ಕ್ಯಾಂಟೀನ್​ ಕ್ಯಾಷಿಯರ್ ನಿಸಾರ್ ಅಹಮದ್ ಮಾಹಿತಿ ನೀಡಿದರು.

ಲಾಕ್​​ಡೌನ್​ ಅವಧಿಯಲ್ಲಿ ಗುಂಡ್ಲುಪೇಟೆ ಕ್ಯಾಂಟೀನ್​ನಲ್ಲಿ 23,110 ಊಟ, ಯಳಂದೂರಿನಲ್ಲಿ 20,696, ಕೊಳ್ಳೇಗಾಲದಲ್ಲಿ 49,482 , ಚಾಮರಾಜನಗರದಲ್ಲಿ 44,646 ಊಟ ವಿತರಿಸಿದ್ದು ಇದರೊಟ್ಟಿಗೆ ಸಿಡಿಎಸ್ ಭವನದಲ್ಲಿನ‌ ನಿರ್ಗತಿಕರು, ರಾಜಸ್ಥಾನದ ವಲಸಿಗ ಕಾರ್ಮಿಕರಿಗೆ 6 ಸಾವಿರ ಊಟ ನೀಡುವ ಮೂಲಕ ಉತ್ತಮ ಕಾರ್ಯ ಮಾಡಿದ್ದಾರೆ.

ಇನ್ನು, ಇಂದಿರಾ ಕ್ಯಾಂಟೀನ್​​​ ನೀಡಿದ ರುಚಿ - ಶುಚಿ ಆಹಾರಕ್ಕೂ ಗ್ರಾಹಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಲಾಕ್​​ಡೌನ್​ನಲ್ಲಿ ಕ್ಯಾಂಟೀನ್​ ಊಟ ಸವಿದ ಬಳಿಕ ಲಾಕ್​ಡೌನ್​​ ಸಡಿಲಿಕೆ ಬಳಿಕವೂ ಖಾಯಂ ಗ್ರಾಹಕರಾಗುತ್ತಿದ್ದಾರೆ.