ಪ್ರಧಾನಿ ಮೋದಿ ಕಂಡರೆ ಭ್ರಷ್ಟಾಚಾರಿಗಳು ಮಾತ್ರ ಭಯಪಡಬೇಕು, ನಾವಲ್ಲ: ಸಂಸದ ಖೂಬಾ

ಸಿಎಂ ಬಿ.ಎಸ್. ಯಡಿಯೂರಪ್ಪ ಆದಿಯಾಗಿ ರಾಜ್ಯದ 25 ಸಂಸದರು ಪ್ರಧಾನಿ ನರೇಂದ್ರ ಮೋದಿಯವರ ಬಳಿ ಹೋಗಿ ನೆರೆ ಪರಿಹಾರ ಕೇಳಲು ಹೆದರುತ್ತಾರೆ ಎಂಬ ಕಾಂಗ್ರೆಸ್ ನಾಯಕರ ಆರೋಪವನ್ನು ಸಂಸದ ಭಗವಂತ ಖೂಬಾ ತಳ್ಳಿ ಹಾಕಿದರು.

ಬೀದರ್: ಪ್ರಧಾನಿ ಮೋದಿಯವರನ್ನು ಕಂಡರೆ ನಾವು ಭಯಬೀಳಲ್ಲ. ಅವರನ್ನು ಕಂಡರೆ ಭ್ರಷ್ಟಾಚಾರಿಗಳು, ದೇಶದ್ರೋಹಿಗಳು, ಮತ ಬ್ಯಾಂಕ್​ ಮೇಲೆ ರಾಜಕಾರಣ ಮಾಡೋರು ಮಾತ್ರ ಭಯಪಡುತ್ತಾರೆ ಎಂದು ಸಂಸದ ಭಗವಂತ ಖೂಬಾ ತಿರುಗೇಟು ನೀಡಿದರು.

ನಗರದ ರಂಗಮಂದಿರದಲ್ಲಿ ಬಿದರಿ ಸಾಂಸ್ಕೃತಿಕ ವೇದಿಕೆ ಲೋಕಾರ್ಪಣೆ ಕಾರ್ಯಕ್ರಮದ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಕಾಂಗ್ರೆಸ್​ ನಾಯಕರ ಆರೋಪಕ್ಕೆ ಪ್ರತಿಕ್ರಿಯಿಸಿದರು. ಕಾಂಗ್ರೆಸ್​ನವರ ಪ್ರಶ್ನೆಗಳಿಗೆಲ್ಲ ಉತ್ತರಿಸುವ ಅಗತ್ಯವಿಲ್ಲ. ನೆರೆ ಪೀಡಿತ ಪ್ರದೇಶದ ಸಮಗ್ರ ಅಭಿವೃದ್ಧಿ ಮಾಡಲು ನಾವು ಸಿದ್ಧ ಎಂದು ಹೇಳಿದರು.

ಭೀಕರ ಜಲಪ್ರಳಯಕ್ಕೆ ತುತ್ತಾಗಿ ಬದುಕು ಬೀದಿಪಾಲಾಗಿರುವ ಸಂತ್ರಸ್ತರ ಸಹಾಯಕ್ಕೆ ಕೇಂದ್ರ ಸರ್ಕಾರ ನಿಯಮಾವಳಿ ಪ್ರಕಾರ ಅನುದಾನ ಬಿಡುಗಡೆ ಮಾಡಲಿದೆ. ಎನ್​​ಡಿಆರ್​​ಎಫ್ ನಿಯಮಾವಳಿ ಹಾಗೂ ಕ್ರೀಯಾ ಯೋಜನೆಯಂತೆ ಕೇಂದ್ರ ಸರ್ಕಾರವು ನೆರೆ ಪೀಡಿತ ಪ್ರದೇಶದಲ್ಲಿನ ಹಾನಿ ಹಾಗೂ ಪುನರ್ವಸತಿಗಾಗಿ ಪರಿಹಾರ ನೀಡಲಿದೆ ಎಂದರು.