ಸಿಂಹಗಳ ಸಫಾರಿಗೆ ಸಿದ್ಧವಾಗುತ್ತಿದೆ ಬಳ್ಳಾರಿ ವಾಜಪೇಯಿ ಝೂಲಾಜಿಕಲ್‌ ಪಾರ್ಕ್

ಶಿಲ್ಪಕಲಾ ವೈಭವದ ಮೂಲಕ ವಿಶ್ವದ ಗಮನ ಸೆಳೆದಿರುವ ಐತಿಹಾಸಿಕ ಹಂಪಿಯ ಬಳಿಯೇ ರಾಜ್ಯದ ಅತಿ ದೊಡ್ಡ ಜೈವಿಕ ಉದ್ಯಾನವನವಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಆದರೆ, ಇದೀಗ ಅದು ತನ್ನ ವಿಸ್ತಾರವನ್ನು ಹೆಚ್ಚಿಸಿಕೊಳ್ಳುವ ಮೂಲಕ ರಾಜ್ಯದ ಗಮನ ಸೆಳೆಯುತ್ತಿದೆ.

ಬಳ್ಳಾರಿ:ರಾಜ್ಯದಲ್ಲಿಯೇ ದೊಡ್ಡ ಜೈವಿಕ ಉದ್ಯಾನವನವಾದ ಜಿಲ್ಲೆಯ ಅಟಲ್ ಬಿಹಾರಿ ವಾಜಪೇಯಿ ಝೂಲಾಜಿಕಲ್ ಪಾರ್ಕ್ ಇದೀಗ ಎಲ್ಲರ ಗಮನ ಸೆಳೆಯುತ್ತಿದೆ. ಕಾರಣ ​ಎರಡು ಸಿಂಹ ಮತ್ತು ನಾಲ್ಕು ಹುಲಿಗಳನ್ನು ತರಲಾಗಿದ್ದು, ಈ ನಿಟ್ಟಿನಲ್ಲಿ ಪ್ರಾಣಿ ಪ್ರಿಯರಲ್ಲಿ ತೀವ್ರ ಕುತೂಹಲ ಮೂಡಿಸಿದ್ದ ಸಿಂಹ ಸಫಾರಿಗೆ ತಯಾರಿ ನಡೆದಿದೆ.ಉದ್ಯಾನವನದಲ್ಲಿಎರಡು ಸಿಂಹ, ನಾಲ್ಕು ಹುಲಿ, 200 ಜಿಂಕೆಗಳು ಓಡಾಡಿಕೊಂಡಿದ್ದು ಇವುಗಳನ್ನು ನೋಡಲೆಂದೇ ದಿನನಿತ್ಯ ಸಾವಿರಾರು ಜನರು ಪಾರ್ಕ್​ಗೆ ಬರುತ್ತಿದ್ದಾರೆ.

ಸಿಂಹ ಸಫಾರಿಗಾಗಿ 30 ಹೆಕ್ಟೇರ್​ ಪ್ರದೇಶ ಮೀಸಲಿರಿಸಲಾಗಿದೆ. ಮೈಸೂರಿನ ಜಯಚಾಮರಾಜೇಂದ್ರ ಮೃಗಾಲಯದಿಂದ ಫೆ. 21ರಂದು ಪೃಥ್ವಿ ಮತ್ತು ರಮ್ಯಾ ಹೆಸರಿನ ಎರಡು ಹುಲಿಗಳನ್ನು ಈ ಉದ್ಯಾನಕ್ಕೆ ತಂದಿದ್ದು, ಇದೀಗ ವಾತಾವರಣಕ್ಕೆ ಹೊಂದಿಕೊಳ್ಳಲಿವೆಯೇ ಎನ್ನುವುದಕ್ಕೆ ನಿಗಾವಹಿಸಲಾಗುತ್ತಿದೆ. ಅಲ್ಲದೆ ಬನ್ನೇರುಘಟ್ಟ ಅಭಯಾರಣ್ಯದಿಂದ ಎರಡು ಗಂಡು ಮತ್ತು ಎರಡು ಹೆಣ್ಣು ಹುಲಿ ಸೇರಿದಂತೆ ಒಟ್ಟು 4 ಹುಲಿಗಳು ಬಂದಿದ್ದು, ಅವುಗಳು ಸಹ ಸಫಾರಿಗೆ ರೆಡಿಯಾಗಿವೆ. ಅಟಲ್ ಬಿಹಾರಿ ವಾಜಪೇಯಿ ಜೈವಿಕ ಉದ್ಯಾನದಲ್ಲಿ ಆರಂಭದಲ್ಲಿ ಜಿಂಕೆಗಳ ಸಫಾರಿ ಆಗಿತ್ತು. ಇದೀಗ ಹುಲಿಗಳ ಆಗಮನ, ತದನಂತರ ಸಿಂಹಗಳ ಸಫಾರಿ ನಡೆಯಲಿದೆ ಎನ್ನುತ್ತಾರೆ ಇಲ್ಲಿನ ಸಿಬ್ಬಂದಿ.

ಒಬ್ಬರಿಗೆ 50 ರೂ.:

ಉದ್ಯಾನದಲ್ಲಿ ಸಫಾರಿ ತೆರಳುವ ಪ್ರಾಣಿ ಪ್ರಿಯರಿಗೆ ತಲಾ 50 ರೂ. ಪಡೆದು ಅರಣ್ಯ ಇಲಾಖೆ ವಾಹನದಲ್ಲಿಯೇ ಸುತ್ತಾಡಿಸುವ ವ್ಯವಸ್ಥೆ ಇದೆ. ಉದ್ಯಾನದಲ್ಲಿ ಸಿಂಹಗಳ ವಾಸಕ್ಕೆ ಮನೆ ನಿರ್ಮಿಸಲಾಗಿದೆ. ಸಫಾರಿಯ ಪ್ರದೇಶದಲ್ಲಿ ಕುಡಿಯುವ ನೀರಿಗಾಗಿ ಅಲ್ಲಲ್ಲಿ ಕೆರೆಗಳನ್ನ ನಿರ್ಮಿಸಲಾಗಿದೆ. ಉದ್ಯಾನದಲ್ಲಿನ ಪ್ರಾಣಿಗಳು, ಕಚೇರಿಯ ಬಳಕೆ, ಗಿಡ-ಮರಗಳಿಗೆ ನೀರಿನ ವ್ಯವಸ್ಥೆಗಾಗಿ ಕಮಲಾಪುರ ಬಳಿಯ ಎಲ್​ಎಲ್​ಸಿಯಿಂದ 2.5 ಕ್ಯೂಸೆಕ್​ ನೀರು ಪಡೆಯುವುದಕ್ಕೆ ಯೋಜನೆಯೂ ಸಿದ್ಧವಾಗಿದೆ ಎನ್ನುತ್ತಾರೆ ಇಲ್ಲಿನ ಸಿಬ್ಬಂದಿ.

ಇಂದಿರಾ ಪ್ರಿಯದರ್ಶಿನಿ ಜಿಂಕೆ ಸಫಾರಿ:

2017ರ ನ. 3ರಂದು ಕಮಲಾಪುರದ ಬಳಿಯ ಇಂದಿರಾ ಪ್ರಿಯದರ್ಶಿನಿ ಜಿಂಕೆ ಸಫಾರಿಯನ್ನ ಆಗಿನ ಮುಖ್ಯಮಂತ್ರಿಯಾಗಿದ್ದ ಸಿದ್ದರಾಮಯ್ಯನವರು ಲೋಕಾರ್ಪಣೆ ಮಾಡಿದ್ದರು. ಇದರಲ್ಲಿ 75 ಚುಕ್ಕೆ ಜಿಂಕೆಗಳು, 80 ಕೃಷ್ಣಮೃಗ, 7 ನೀರು​ನಾಯಿ, 6 ಸಾಂಬಾರ್​ ಪ್ರಾಣಿಗಳಿವೆ. ಆ ‌ಪೈಕಿ 5 ಚುಕ್ಕೆ ಜಿಂಕೆಗಳು, 9 ಕೃಷ್ಣಮೃಗ, 2 ನೀರು​ನಾಯಿ ಮರಿಗಳಾಗಿದ್ದು ಜಿಂಕೆಗಳ ಸಂತತಿಯೂ ವೃದ್ಧಿಸಿದೆ. ಈ ಜಿಂಕೆ ಸಫಾರಿಯನ್ನು ನೋಡಲು ಪ್ರವಾಸಿಗರು, ಪ್ರಾಣಿ ಪ್ರೀಯರು ಇದೀಗ ಹೆಚ್ಚಾಗಿ ಆಗಮಿಸುತ್ತಿದ್ದಾರೆ. ಹುಲಿ ಮತ್ತು ಸಿಂಹಗಳ ಸಫಾರಿಗೆ ಸಿದ್ಧವಾಗಿದ್ದು, ಕತ್ತೆ ಕಿರುಬ ಸೇರಿ ಇತರ ಕಾಡುಪ್ರಾಣಿಗಳ ಸಫಾರಿಗೂ ಚಿಂತನೆ ನಡೆದಿದೆ ಎನ್ನಲಾಗುತ್ತಿದೆ.

ಜೀವನದಲ್ಲಿ ಹುಲಿ ಹಾಗೂ ಸಿಂಹಗಳನ್ನು ನೇರವಾಗಿ ನೋಡಿರಲಿಲ್ಲ. ಇದೀಗ ಅವುಗಳನ್ನು ನೋಡಿ ಸಂತೋಷವಾಯ್ತು. ಕಮಲಾಪುರದ ಈ ಅಟಲ್ ಬಿಹಾರಿ ವಾಜಪೇಯಿ ಝೂಲಾಜಿಕಲ್ ಪಾರ್ಕ್​ನಲ್ಲಿ ಬೇಗ ಈ ಸಫಾರಿ ಪ್ರಾರಂಭವಾಗಲಿ ಎನ್ನುತ್ತಾರೆ ಮಹಿಳಾ ಅಧ್ಯಯನ ವಿಭಾಗದ ಸಂಶೋಧನಾ ವಿದ್ಯಾರ್ಥಿ ಸಂಜೀವ್ ಕುಮಾರ್ ಸೂಡಿ.

ಒಟ್ಟಾರೆ, ಉದ್ಯಾನಕ್ಕೆ ಪ್ರವಾಸಿಗರನ್ನು ಹೆಚ್ಚಾಗಿ ಸೆಳೆಯಲು ಮೂಲ ಸೌಕರ್ಯ ಕಲ್ಪಿಸಲು ಅರಣ್ಯ ಇಲಾಖಾ ಅಧಿಕಾರಿಗಳು ಉತ್ಸುಕತೆ ತೋರುತ್ತಿದ್ದಾರೆ. ಈ ಪ್ರದೇಶದಲ್ಲಿ ಉದ್ಯಾನವನಕ್ಕೆ ಈ ಕಾಡುಪ್ರಾಣಿಗಳನ್ನು ತಂದು ಬಿಟ್ಟಿದ್ದು ಸಾರ್ವಜನಿಕರಿಗೆ ನೋಡಲು ಸಂತೋಷಪಡುತ್ತಿದ್ದಾರೆ.