ಗಡಿಯಲ್ಲಿರುವ ಕನ್ನಡಿಗರ ಪರ ನಿಲ್ಲುವಂತೆ ಸಿಎಂಗೆ ಅಶೋಕ್ ಚಂದರಗಿ ಒತ್ತಾಯ

ಒಂದು ಕಡೆ ಮಹಾರಾಷ್ಟ್ರ ಸರ್ಕಾರ ಕನ್ನಡಿಗರ ಧ್ವನಿ ಹತ್ತಿಕ್ಕಲು ಪ್ರಯತ್ನ ಮಾಡುತ್ತಿದೆ. ಮತ್ತೊಂದೆಡೆ ಕರ್ನಾಟಕ ಸರ್ಕಾರ ಗಡಿ ಜನರನ್ನು ನಡುನೀರಿನಲ್ಲಿ ಬಿಡುತ್ತಿದೆ ಎಂಬ ಸಂಶಯ ಸಹ ಕಾಡುತ್ತಿದೆ ಎಂದು ಕನ್ನಡ ಪರ ಹೋರಾಟಗಾರರು ನೋವು ಹಾರಹಾಕಿದ್ದಾರೆ.

ಬೆಳಗಾವಿ:ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಗಡಿಯಲ್ಲಿರುವ ಕನ್ನಡ ಜನರ ಪರ ನಿಲ್ಲಬೇಕು. ನಿಲ್ಲದಿದ್ದರೆ ಬೆಳಗಾವಿಗೆ ಬಂದಾಗ ಪ್ರತಿಭಟನಾ ಬಿಸಿ ಎದುರಿಸಬೇಕಾಗುತ್ತದೆ ಎಂದು ಬೆಳಗಾವಿಯ ಜಿಲ್ಲಾ ಕನ್ನಡಪರ ಸಂಘಟನೆಗಳ ಕ್ರಿಯಾಸಮಿತಿ ಅಧ್ಯಕ್ಷ ಅಶೋಕ್ ಚಂದರಗಿ ಎಚ್ಚರಿಕೆ ನೀಡಿದ್ದಾರೆ.

ಗಡಿಯಲ್ಲಿ ನಡೆಯುತ್ತಿರುವ ಘರ್ಷಣೆ ಕುರಿತು ಹೇಳಿನೆ ನೀಡಿರುವ ಅವರು, ಜತ್ತ, ಅಕ್ಕಲಕೋಟ ಕರ್ನಾಟಕಕ್ಕೆ ಸೇರಬೇಕು ಅಂತ ಹೇಳಿ ಇಲ್ಲಿಯ ಕನ್ನಡಿಗರನ್ನು ಹುಚ್ಚೆದ್ದು ಕುಣಿಸಿದ್ದೀರಿ. ನಿಮ್ಮ ಮಾತು ಕೇಳಿ ಜತ್ತ ಕನ್ನಡಿಗರು ಒಪ್ಪಿಕೊಂಡಿದ್ದಾರೆ. ನಿಮ್ಮ ಒಂದೇ ಒಂದು ಹೇಳಿಕೆಯಿಂದ ಇಲ್ಲಿ ಕನ್ನಡಪರ ವಾತಾವರಣ ಸೃಷ್ಟಿಯಾಗಿದೆ. ಇದನ್ನು ತಡೆದುಕೊಳ್ಳಲಾಗದ ಮಹಾರಾಷ್ಟ್ರ ಸರ್ಕಾರ ಕನ್ನಡಿಗರ ಧ್ವನಿ ಹತ್ತಿಕ್ಕಲು ಪ್ರಯತ್ನಿಸುತ್ತಿದೆ.

ಆದರೆ, ಕರ್ನಾಟಕ ಸರ್ಕಾರ ಇವರನ್ನು ನಡುನೀರಿನಲ್ಲಿ ಬಿಡುತ್ತಿದೆ ಎಂಬ ಸಂಶಯ ಸಹ ಕಾಡುತ್ತಿದೆ. ಗಡಿ ಸಂರಕ್ಷಣಾ ಆಯೋಗದ ಅಧ್ಯಕ್ಷರ ಜೊತೆ ಇಬ್ಬರು ಸಚಿವರನ್ನು ಮಹಾರಾಷ್ಟ್ರಕ್ಕೆ ಕಳುಹಿಸಬೇಕು. ತಾವು ಯಾವುದೇ ಕಾರಣಕ್ಕೂ ಮೌನ ವಹಿಸಿಬಾರದು ಎಂದಿದ್ದಾರೆ.

ಇಂತಹ ಹೇಳಿಕೆ ನೀಡುವ ಮುನ್ನ ಆಲೋಚನೆ ಮಾಡಬೇಕಿತ್ತು. ನೀವು ಮೊದಲು ಏಕೆ ಹೇಳಿಕೆ ನೀಡಿದ್ರಿ? ಬೆಳಗಾವಿ ಅಧಿವೇಶನದಲ್ಲಿ ಜತ್ತ ಅಕ್ಕಲಕೋಟ ಜನರ ಬಗ್ಗೆ ಚರ್ಚೆ ಆಗಬೇಕು. ಈ ಬಗ್ಗೆ ತಾವೇ ಮಹಾರಾಷ್ಟ್ರ ಸರ್ಕಾರ ಮೇಲೆ ಒತ್ತಡ ತರಬೇಕು. ನೀವು ಮೌನವಹಿಸಿದರೆ ಬೆಳಗಾವಿಗೆ ಬಂದಾಗ ನಿಮ್ಮ ವಿರುದ್ಧ ಪ್ರತಿಭಟನೆ ತಪ್ಪಿದ್ದಲ್ಲ.

ನಿರ್ಣಯ ಪಾಸ್ ಮಾಡಿದ ಗ್ರಾಮ ಪಂಚಾಯಿತಿಗಳ ವಿಸರ್ಜನೆಗೆ ಮಹಾರಾಷ್ಟ್ರ ಸರ್ಕಾರ ಈಗಾಗಲೇ ಮುಂದಾಗಿದೆ. ಈ ಸಂದರ್ಭದಲ್ಲಿ ಈ ಭಾಗದ ಜನರನ್ನು ನಡುನೀರಿನಲ್ಲಿ ಕೈಬಿಟ್ರೆ ಅವರು ಅನಾಥರಾಗುತ್ತಾರೆ. ಹಾಗಾಗಿ ನಿಮ್ಮ ಮಾತಿಗೆ ಬದ್ಧರಾಗಿರುವಂತೆ ಅವರು ಮನವಿ ಮಾಡಿಕೊಂಡಿದ್ದಾರೆ.

ಇದನ್ನೂ ಓದಿ:ಹೊಸಕೋಟೆ ಕಾಂಗ್ರೆಸ್​ನಲ್ಲಿ ಮತ್ತೆ ಭಿನ್ನಮತ: ಶಾಸಕ ಶರತ್ ಬಚ್ಚೇಗೌಡ ವಿರುದ್ದ‌‌‌ ಸಿಡಿದೆದ್ದ ಕಾರ್ಯಕರ್ತರು