ಬಾಬಾ ಸಾಹೇಬರ ಲೇಖನಿಯಿಂದ ಭಾರತ ಬದಲಾಯಿತು: ಜ್ಞಾನಪ್ರಕಾಶ ಸ್ವಾಮೀಜಿ

ಛತ್ರಪತಿ ಶಾಹುಮಹಾರಾಜರ 144ನೇ ಜಯಂತಿ ಅಂಗವಾಗಿ ಕರ್ನಾಟಕ ದಲಿತ ಸಂಘರ್ಷ ಸಮಿತಿಯ ಜಿಲ್ಲಾ ಘಟಕವು 'ಶೋಷಿತ ಸಮುದಾಯಗಳ ಸಾಮಾಜಿಕ ನ್ಯಾಯಕ್ಕಾಗಿ ಸಂಕಲ್ಪ ಸಮಾವೇಶ'ವನ್ನು ಬೆಳಗಾವಿಯಲ್ಲಿ ಆಯೋಜಿಸಿದೆ.

ಬೆಳಗಾವಿ: "ಜೀವ ಜಗತ್ತಿನಲ್ಲಿ ಮಹಿಳೆಯೇ ಶ್ರೇಷ್ಠ ಎಂದಿದ್ದರೂ ದೇಶದಲ್ಲಿ ಮಹಿಳೆಯರ ಮೇಲೆ ದೌರ್ಜನ್ಯ ನಡೆಯುತ್ತಲೇ ಇದೆ. ಶೋಷಿತ ಸಮುದಾಯಗಳೂ ಹೊರತಾಗಿಲ್ಲ. ಇದೆಲ್ಲದಕ್ಕೂ ಕಡಿವಾಣ ಹಾಕಬೇಕಿದ್ದರೆ ಶೋಷಿತ ಸಮುದಾಯಗಳು ಸುಶಿಕ್ಷಿತರಾಗಬೇಕು. ಆಗ ಮಾತ್ರ ಶಾಹುಮಹಾರಾಜರು ಮತ್ತು ಮಹಾತ್ಮಾ ಫುಲೆ ದಂಪತಿಯ ಕನಸು ನನಸಾಗಿಸಲು ಸಾಧ್ಯ" ಎಂದು ಮೈಸೂರಿನ ಉರಿಲಿಂಗಪೆದ್ದಿ ಮಠದ ಜ್ಞಾನಪ್ರಕಾಶ ಸ್ವಾಮೀಜಿ ಅಭಿಪ್ರಾಯಪಟ್ಟರು. ಬೆಳಗಾವಿಯ ಕುಮಾರ ಗಂಧರ್ವ ಕಲಾಭವನದಲ್ಲಿ ಛತ್ರಪತಿ ಶಾಹುಮಹಾರಾಜರ 144ನೇ ಜಯಂತಿ ಅಂಗವಾಗಿ ಕರ್ನಾಟಕ ದಲಿತ ಸಂಘರ್ಷ ಸಮಿತಿಯ ಜಿಲ್ಲಾ ಘಟಕ ಆಯೋಜಿಸಿದ್ದ 'ಶೋಷಿತ ಸಮುದಾಯಗಳ ಸಾಮಾಜಿಕ ನ್ಯಾಯಕ್ಕಾಗಿ ಸಂಕಲ್ಪ ಸಮಾವೇಶದಲ್ಲಿ ಭಾಗಿಯಾಗಿ ಅವರು ಮಾತನಾಡಿದರು.

"ಬಿಳಿ ಮತ್ತು ಕಪ್ಪು ಬಣ್ಣದ ಬಗ್ಗೆ ಇಂದು ತೀವ್ರ ಚರ್ಚೆ ನಡೆಯುತ್ತಿದೆ. ಕಪ್ಪು ಈ ದೇಶದ ಮೂಲ ಬಣ್ಣ. ಕಪ್ಪು ಬಣ್ಣದ ದ್ರಾವಿಡರೇ ಮೂಲ ಭಾರತೀಯರು. ಅಂತಹ ದ್ರಾವಿಡರೆನಿಸಿಕೊಂಡಿರುವ ಶೋಷಿತ ಸಮುದಾಯಗಳು ಶಾಹು ಮಹಾರಾಜರು, ಡಾ.ಬಾಬಾಸಾಹೇಬ್ ಅಂಬೇಡ್ಕರ್, ಮಹಾತ್ಮಾ ಫುಲೆ ಅವರ ಆದರ್ಶಗಳನ್ನು ಅರಿತುಕೊಂಡು ಸ್ವಾಭಿಮಾನ, ಘನತೆಯ ಜೀವನ ನಡೆಸಬೇಕು" ಎಂದು ಕರೆ ಕೊಟ್ಟರು.

"ಬೆಳಗಾವಿ, ಬಳ್ಳಾರಿ, ರಾಯಚೂರು ಸೇರಿದಂತೆ ವಿವಿಧ ಜಿಲ್ಲೆಗಳಲ್ಲಿ ಶೇ. 45ಕ್ಕೂ ಅಧಿಕ ಸಂಖ್ಯೆಯಷ್ಟು ಎಸ್ಸಿ, ಎಸ್ಟಿ ಮಕ್ಕಳು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಿಂದ ಹೊರಗುಳಿಯುತ್ತಿದ್ದಾರೆ. ಈ ಪರಿಸ್ಥಿತಿ ಹೀಗೇ ಮುಂದುವರೆದರೆ ಶೋಷಿತ ಸಮುದಾಯಗಳು ಮತ್ತೆ ಅನ್ಯಾಯದ ಚಕ್ರಕ್ಕೆ ಸಿಲುಕಬೇಕಾಗುತ್ತದೆ. ಭಾರತ ಬದಲಾಗುವುದು ದೇವಸ್ಥಾನ, ಚರ್ಚ್, ಮಸೀದಿಗಳಿಂದಲ್ಲ. ಡಾ.ಬಾಬಾಸಾಹೇಬ ಅಂಬೇಡ್ಕರ್ ಕೊಟ್ಟ ಮತದಾನದ ಹಕ್ಕಿನಿಂದ ಬದಲಾವಣೆ ಸಾಧ್ಯ. ಬಾಬಾ ಸಾಹೇಬರ ಲೇಖನಿಯಿಂದ ಭಾರತ ಬದಲಾಗಿದೆ" ಎಂದರು.

ಇದಕ್ಕೂ ಮೊದಲು ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಸಾಮಾಜಿಕ ಹೋರಾಟಗಾರ್ತಿ ಅಕ್ಷತಾ, "ಯಾವ ನೆಲದಲ್ಲಿ ನಮ್ಮ ಹಕ್ಕು ಕಳೆದುಕೊಂಡಿದ್ದೇವೆಯೋ, ಧ್ವನಿ ಕಳೆದುಕೊಂಡಿದ್ದೇವೋ ಅದೇ ನೆಲದಲ್ಲಿ ಎದ್ದು ನಿಲ್ಲುವ ಸಂಕಲ್ಪ ಮಾಡಬೇಕು. ಮೂಢನಂಬಿಕೆಗಳನ್ನು ಬದಿಗಿಟ್ಟು ಪುಸ್ತಕ ಓದುವ ಪ್ರವೃತ್ತಿ ಬೆಳೆಸಿಕೊಳ್ಳಬೇಕು. ದೇಶ ಕಟ್ಟಿದ ಶೂದ್ರರ ತಲೆಯಲ್ಲಿ ಮೂಢನಂಬಿಕೆಗಳನ್ನು ತುಂಬಿದ ಪರಿಣಾಮವೇ ಮೂಲನಿವಾಸಿಗಳು ತಮ್ಮತನ ಕಳೆದುಕೊಳ್ಳುವಂತಾಯಿತು".

"ಶೂದ್ರರ ಸಾತಂತ್ರ‍್ಯವನ್ನೇ ಕಿತ್ತುಕೊಂಡ ಪರಿಸ್ಥಿತಿಯಲ್ಲಿ ಹುಟ್ಟಿ ಬಂದ ಶಾಹುಮಹಾರಾಜರ ಕಾರಣದಿಂದ ಸಂವಿಧಾನ ಜನಕ ಡಾ.ಬಿ.ಆರ್.ಅಂಬೇಡ್ಕರ್ ಎನ್ನುವ ಶಕ್ತಿ ರೂಪಗೊಂಡಿತು. ಅಂಬೇಡ್ಕರ್ ಅವರ ದೂರದೃಷ್ಟಿಗಳಿಂದ ತುಂಬಿದ ಸಂವಿಧಾನ ಜಾರಿಯಾದ ಕಾರಣದಿಂದ ಶಕ್ತಿ ಕಳೆದುಕೊಂಡಿದ್ದ ಶೂದ್ರರು ಉಸಿರಾಡುವಂತಾಗಿದೆ" ಎಂದು ಹೇಳಿದರು.

"ಶಾಹುಮಹಾರಾಜರು ಸಂವಿಧಾನ ರಚನೆಗೂ ಮೊದಲೇ ಮೀಸಲಾತಿ ಜಾರಿಗೆ ತಂದು ಶೂದ್ರರ ಬೆನ್ನಿಗೆ ನಿಂತರು. ಮುಸ್ಲಿಂ ಸಮುದಾಯದ ಮೊಹರಂ ದೇವರು ಮತ್ತು ಗಣಪತಿ ಮೂರ್ತಿಗಳನ್ನು ಒಂದೇ ವೇದಿಕೆಯಲ್ಲಿಟ್ಟು ಪೂಜೆ ಮಾಡಿ ಅಂದಿನ ಕಾಲದಲ್ಲಿಯೇ ಭಾವೈಕ್ಯತೆ ಸಂದೇಶ ಸಾರಿದ್ದರು. ಸ್ವತಃ ಶಾಹುಮಹಾರಾಜರ ಮೇಲೆ ಅತ್ಯಾಚಾರದ ಆರೋಪ ಹೊರಿಸಿ ಬ್ರಿಟಿಷರಿಗೆ ದೂರು ನೀಡಿ ಕಿರುಕುಳ ನೀಡಿದರೂ ಮಹಾರಾಜರು ಕೊನೆ ಕ್ಷಣದವರೆಗೂ ಶೋಷಿತರ ಪರವಾಗಿ ನಿಂತಿದ್ದರು. ಅಂತಹ ಶಾಹುಮಹಾರಾಜರನ್ನು ಅರ್ಥ ಮಾಡಿಕೊಳ್ಳಬೇಕಿದ್ದರೆ ಮೂಢನಂಬಿಕೆಗಳನ್ನು ಬದಿಗಿಟ್ಟು ಪುಸ್ತಕ ಓದುವ ಹವ್ಯಾಸ ಬೆಳೆಸಿಕೊಳ್ಳಬೇಕು. ವ್ಯಕ್ತಿಗಳ ಹಿಂದೆ ಓಡದೆ ವಿಚಾರಗಳ ಬೆನ್ನು ಹತ್ತಿ" ಎಂದು ಅಕ್ಷತಾ ಕರೆ ನೀಡಿದರು.

ಕಾರ್ಯಕ್ರಮದಲ್ಲಿ ದಲಿತ ಸಂಘರ್ಷ ರಾಜ್ಯ ಸಮಿತಿ ಸದಸ್ಯ ಸಿದ್ದಾರ್ಥ ಸಿಂಘೆ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಜಿಲ್ಲಾ ಸಮಿತಿ ಸಂಚಾಲಕ ರವಿ ಬಸ್ತವಾಡ್ಕರ್ ಸ್ವಾಗತಿಸಿದರು. ರಾಜ್ಯ ಸಂಚಾಲಕ ಪರಶುರಾಮ ನೀಲನಾಯಕ್ ಅಧ್ಯಕ್ಷತೆ ವಹಿಸಿದ್ದರು. ಸತೀಶ ಶುಗರ್ಸ್ ನಿರ್ದೇಶಕ ರಾಹುಲ ಜಾರಕಿಹೊಳಿ ರಾಜ್ಯ ಸಂಘಟನಾ ಸಂಚಾಲಕರಾದ ಎಂ.ಸಿ.ನಾರಾಯಣ, ಡಿ.ನಾರಾಯಣ, ಡಿ.ಸಿದ್ದರಾಜು, ಬಿ.ಎನ್.ವೆಂಕಟೇಶ್, ಸಂಜೀವ ಕಾಂಬಳೆ ಸೇರಿ ಮತ್ತಿತರರು ಉಪಸ್ಥಿತರಿದ್ದರು.

ಇದನ್ನೂ ಓದಿ :ಇನ್ಮುಂದೆ ಬೆಂಗಳೂರಲ್ಲಿ ಫ್ಲೆಕ್ಸ್, ಹೋರ್ಡಿಂಗ್ಸ್ ಹಾಕಿದ್ರೆ 50 ಸಾವಿರ ರೂಪಾಯಿ ದಂಡ: ಡಿಸಿಎಂ ಡಿ ಕೆ ಶಿವಕುಮಾರ್​ ಎಚ್ಚರಿಕೆ