ದೇವಸ್ಥಾನ ನಿರ್ಮಾಣಕ್ಕೆ ಮೀಸಲಿಟ್ಟ ಜಾಗ ಮಾರಲು ಹುನ್ನಾರ: ಗೌಂಡವಾಡ ಗ್ರಾಮಸ್ಥರಿಂದ ಆರೋಪ

ಬೆಳಗಾವಿಯ ಗೌಂಡವಾಡ ಗ್ರಾಮದಲ್ಲಿ ದೇವಸ್ಥಾನದ ನಿರ್ಮಾಣಕ್ಕೆ ಮೀಸಲಿರಿಸಿದ್ದ ಜಾಗವನ್ನು ಕೆಲವರು ಮಾರಲು ಹುನ್ನಾರ ನಡೆಸುತ್ತಿದ್ದಾರೆಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.

ಬೆಳಗಾವಿ: ಗೌಂಡವಾಡ ಗ್ರಾಮದಲ್ಲಿ ದೇವಸ್ಥಾನ ನಿರ್ಮಾಣಕ್ಕೆ ಮೀಸಲಿರಿಸಿದ್ದ ಜಾಗವನ್ನು ಪರಭಾರೆ ಮಾಡಲು ಯತ್ನಿಸಲಾಗುತ್ತಿದೆ ಎಂದು ಆರೋಪಿಸಿರುವ ಗ್ರಾಮಸ್ಥರು ನಗರದ ಜಿಲ್ಲಾಧಿಕಾರಿ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

ಈ ವೇಳೆ ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದ ಗ್ರಾಮಸ್ಥರು, ತಾಲೂಕಿನ ಗೌಂಡವಾಡದಲ್ಲಿ ಸರ್ವೇ ನಂಬರ್​ 78ರಲ್ಲಿ 1 ಎಕರೆ 26 ಗುಂಟೆ ಹಾಗೂ 88ರ ಸರ್ವೇಯಲ್ಲಿ 1 ಎಕರೆ 27 ಗುಂಟೆ ಜಾಗವನ್ನು ದೇವಸ್ಥಾನ ನಿರ್ಮಿಸಲು ಇನಾಮು ನೀಡಲಾಗಿದೆ. ಆದ್ರೆ, ಕೆಲವರು ದೇವಸ್ಥಾನದ ಜಾಗವನ್ನು ಬಿಟ್ಟು ಉಳಿದ ಭೂಮಿಯನ್ನು ಫ್ಲಾಟ್ ಮಾಡಿ ಮಾರಲು ಹುನ್ನಾರ ನಡೆಸಿದ್ದಾರೆ. ಹೀಗಾಗಿ ಇದನ್ನು ತಡೆದು ಈ ಜಾಗವನ್ನು ದೇವರ ಹೆಸರಿನಲ್ಲಿಯೇ ಭೂಮಿಯನ್ನು ನೋಂದಣಿ ಮಾಡಿ ಗ್ರಾಮಸ್ಥರಿಗೆ ಅನುಕೂಲ ಮಾಡಿಕೊಡಬೇಕು ಎಂದು ಆಗ್ರಹಿಸಿದರು.

ಇನ್ನು ದೇವಸ್ಥಾನ ನಿರ್ಮಾಣದ ಹೆಸರಿನಲ್ಲಿ ನೀಡಿರುವ ಇನಾಮು ಜಾಗ ಗ್ರಾಮದ ಹಕ್ಕಾಗಿ ಉಳಿಯಬೇಕು. ಫ್ಲಾಟ್​​ ಮಾಡಿ ಮಾರುವುದರಿಂದ ಬೇರೆಯವರ ವಶಕ್ಕೆ ನೀಡಿದಂತೆ ಆಗುತ್ತದೆ. ಇದನ್ನು ತಪ್ಪಿಸಲು ದೇವರ ಹೆಸರಿನಲ್ಲಿ ಭೂಮಿಯನ್ನು ನೋಂದಣಿ ಮಾಡಬೇಕು ಎಂದು ಒತ್ತಾಯಿಸಿದರು.