ಶಾಸಕ ರಿಜ್ವಾನ್ ಬೆಂಬಲಿಗರು ಮನೆಗೆ ನುಗ್ಗಿ ದೌರ್ಜನ್ಯ ಎಸಗಿದ್ದಾರೆ.. ಮಹಿಳೆ ಆರೋಪ

ರಾತ್ರೋರಾತ್ರಿ ಮನೆಗೆ ನುಗ್ಗಿ ಗೂಂಡಾಗಿರಿ ಮಾಡಿರುವುದಲ್ಲದೇ ತನ್ನನ್ನೇ ಮನೆಯಿಂದ ಹೊರಹಾಕಿ ಬೀಗ ಹಾಕಿದ್ದಾರೆ ಎಂದು ಸೋನಾಂ ಮಿಶ್ರಾ ಎಂಬ ಮಹಿಳೆ ಆರೋಪಿಸಿದ್ದಾರೆ.

ಬೆಂಗಳೂರು: ಶಿವಾಜಿನಗರ ಕ್ಷೇತ್ರದ ಶಾಸಕ ರಿಜ್ವಾನ್ ಅರ್ಷದ್ ಬೆಂಬಲಿಗರು ಒಂಟಿ ಮಹಿಳೆಯ ಮನೆಗೆ ಅತಿಕ್ರಮವಾಗಿ ಪ್ರವೇಶಿಸಿ ದೌರ್ಜನ್ಯ ಎಸಗಿರುವ ಆರೋಪ ಕೇಳಿಬಂದಿದೆ. ರಾತ್ರೋರಾತ್ರಿ ಮನೆಗೆ ನುಗ್ಗಿ ಗೂಂಡಾಗಿರಿ ಮಾಡಿರುವುದಲ್ಲದೇ ತನ್ನನ್ನೇ ಮನೆಯಿಂದ ಹೊರಹಾಕಿ ಬೀಗ ಹಾಕಿದ್ದಾರೆ ಎಂದು ಸೋನಂ ಮಿಶ್ರಾ ಎಂಬುವರು ಆರೋಪಿಸಿದ್ದಾರೆ.

ಸೋಮವಾರ ತಡರಾತ್ರಿ ರಿಚರ್ಡ್ಸ್ ಪಾರ್ಕ್ ಬಳಿ ಹರ್ಮನ್ ರಿಗಾಲಿಯಾ ಅಪಾರ್ಟ್‌ಮೆಂಟಿನಲ್ಲಿರುವ ತಮ್ಮ ಮನೆಗೆ ನುಗ್ಗಿರುವ ಐವರು ಯುವಕರು, ಏಕಾಏಕಿ ಮನೆಯಲ್ಲಿದ್ದ ಮಾಲಕಿ ಸೋನಂ ಮಿಶ್ರಾರನ್ನು ಹೊರಕಳುಹಿಸಿ ಮನೆಗೆ ಬೀಗ ಹಾಕಿದ್ದಾರಂತೆ.

ಮನೆಯಲ್ಲಿರುವ ತನ್ನ ಚಿನ್ನಾಭರಣ, ಹಣ ದೋಚಲಾಗಿದ್ದು, ರಾತ್ರಿಯಿಡೀ ತಾನು ರಸ್ತೆಯಲ್ಲೇ ಕಾಲ ಕಳೆಯುವಂತಾಯಿತು. ಅಲ್ಲದೇ ಈ ಬಗ್ಗೆ ಪುಲಕೇಶಿ ನಗರ ಪೊಲೀಸ್ ಠಾಣೆಗೆ ದೂರು ನೀಡಲು ತೆರಳಿದರೂ ದೂರು ದಾಖಲಿಸಿಕೊಳ್ಳುತ್ತಿಲ್ಲ ಎಂದು ಸೋನಂ ಮಿಶ್ರಾ ಆರೋಪಿಸಿದ್ದಾರೆ.

ಇದನ್ನೂ ಓದಿ:ಮದುವೆ ವಿಷ್ಯ ಮುಚ್ಚಿಟ್ಟು ಅನೈತಿಕ ಸಂಬಂಧ: ಗೊತ್ತಾಗುತ್ತಿದ್ದಂತೆ ಮರ್ಮಾಂಗ ಕತ್ತರಿಸಿದ ಪ್ರೇಯಸಿ!