ಬೆಂಗಳೂರು : ರಾಜಧಾನಿಯ ಪೌರಕಾರ್ಮಿಕರು ಒಂದೆಡೆ ನೆಮ್ಮದಿಯಿಂದ ಕುಳಿತು ಊಟ, ತಿಂಡಿ ಮಾಡಲು ಮತ್ತು ಬ್ರೇಕ್ ಅವಧಿಯಲ್ಲಿ ವಿಶ್ರಾಂತಿ ತೆಗೆದುಕೊಳ್ಳಲು ಹಾಗೂ ಬಟ್ಟೆ ಬದಲಾಯಿಸಿಕೊಳ್ಳಲು ‘ಸುವಿಧಾ ಕ್ಯಾಬಿನ್’ ವ್ಯವಸ್ಥೆ ಜಾರಿಗೊಳಿಸಲು ಬಿಬಿಎಂಪಿ ಮುಂದಾಗಿದೆ. ಬಿಬಿಎಂಪಿ ವಾರ್ಡ್ಗಳ ವ್ಯಾಪ್ತಿಯಲ್ಲಿ 25,000 ಪೌರಕಾರ್ಮಿಕರು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಇವರಲ್ಲಿ ಶೇ.75ರಷ್ಟು ಮಹಿಳೆಯರು ರಸ್ತೆಗಳ ಸ್ವಚ್ಛತೆ ಹಾಗೂ ತ್ಯಾಜ್ಯವಿಲೇವಾರಿ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ.
ಈ ಪೌರಕಾರ್ಮಿಕರಿಗೆ ತಿಂಡಿ ತಿನ್ನಲು, ವಿಶ್ರಾಂತಿ ಪಡೆಯಲು ಹಾಗೂ ಕೆಲಸ ಮುಗಿದ ಬಳಿಕ ಸಮವಸ್ತ್ರವನ್ನು ಬದಲಾಯಿಸಲು ಸರಿಯಾದ ವ್ಯವಸ್ಥೆಯಿಲ್ಲದಂತಾಗಿತ್ತು. ಪುರುಷ ಹಾಗೂ ಮಹಿಳಾ ಪೌರಕಾರ್ಮಿಕರು ಪರದಾಡುತ್ತಿದ್ದರು. ನೆರಳು ಸಿಗುವ ಜಾಗದಲ್ಲಿ ಎಲ್ಲೆಂದರಲ್ಲಿ ಕುಳಿತು ಊಟ ಹಾಗೂ ವಿಶ್ರಾಂತಿ ಪಡೆಯಬೇಕಾದ ಪರಿಸ್ಥಿತಿ ನಗರದಲ್ಲಿತ್ತು.
ಮಹಿಳಾ ಪೌರಕಾರ್ಮಿಕರು ತಿಂಗಳ ಅವಧಿಯ ತುರ್ತು ಅಗತ್ಯಕ್ಕೆ ಸರಿಯಾದ ವ್ಯವಸ್ಥೆ ಇಲ್ಲದೆ ರಜೆ ಹಾಕುತ್ತಿದ್ದರು. ಈ ಸಮಸ್ಯೆ ಅರಿತ ಬಿಬಿಎಂಪಿ 'ಸುವಿಧಾ ಕ್ಯಾಬಿನ್' ಮೂಲಕ ಪರಿಹಾರ ನೀಡಲು ಸಿದ್ಧತೆ ನಡೆಸಿದೆ. ಬಟ್ಟೆ ಬದಲಾವಣೆಗೆ ರೂಮ್, ಶೌಚಾಲಯ, ಮಗುವಿಗೆ ಹಾಲುಣಿಸಲು ಜಾಗ, ಕುಡಿಯುವ ನೀರು, ಮೊಬೈಲ್ ಫೋನ್ ಚಾರ್ಜಿಂಗ್ ಪಾಯಿಂಟ್ಗಳನ್ನು ಹೊಂದಿರುವ ಕೊಠಡಿಗಳನ್ನು ಸುವಿಧಾ ಕ್ಯಾಬಿನ್ ಒಳಗೊಂಡಿದೆ.