ನಾಡಗೀತೆಗೆ ಕಾಲಮಿತಿ ನಿಗದಿ: ವಿರಾಮ ನೀಡದೆ ಹಾಡಲು ಸೂಚನೆ

ಯಾರು ಯಾವ ಧಾಟಿಯಲ್ಲಾದರೂ ಹಾಡಲಿ, ಹಿನ್ನಲೆ ಸಂಗೀತ ಯಾವುದೇ ಇರಲಿ, ತಾಳ ಯಾವುದಾದರೂ ಇರಲಿ ಆದರೆ ಗೀತೆಯನ್ನು ನಿಲ್ಲಿಸದೆ ಸಂಪೂರ್ಣವಾಗಿ ಹಾಡಬೇಕು ಎನ್ನುವ ಪ್ರಮುಖ ಅಂಶವನ್ನೂ ಸೇರಿಸಿಕೊಂಡಂತೆ ಮಾಹಿತಿಯನ್ನು ವರದಿ ರೂಪದಲ್ಲಿ ಸರ್ಕಾರಕ್ಕೆ ಸಲ್ಲಿಸಲಾಗಿದ್ದು ಅನುಮೋದನೆ ಹಂತಕ್ಕೆ ಬಂದು ತಲುಪಿದೆ.

ಬೆಂಗಳೂರು: ಇನ್ಮುಂದೆ ಒಬ್ಬೊಬ್ಬರು ಒಂದೊಂದು ರೀತಿಯಲ್ಲಿ ನಾಡಗೀತೆ ಹಾಡುವ ಸಂಪ್ರದಾಯಕ್ಕೆ ಕಡಿವಾಣ ಬೀಳಲಿದೆ. ರಾಷ್ಟ್ರಗೀತೆಯಂತೆ ನಾಡಗೀತೆಯನ್ನೂ ಕಾಲಮಿತಿಯಲ್ಲಿ ಯಾವ ಸಾಲೂ ಕೂಡಾ ಪುನರಾವರ್ತನೆಯಾಗದಂತೆ, ಹಿನ್ನೆಲೆ ಸಂಗೀತಕ್ಕಾಗಿ ವಿರಾಮ ನೀಡದೆ ಹಾಡುವ ನಿಯಮ ಸದ್ಯದಲ್ಲೇ ಜಾರಿಗೆ ಬರಲಿದೆ.

ಕನ್ನಡ ಸಾಹಿತ್ಯ ಪರಿಷತ್​ ಅಧ್ಯಕ್ಷ ಮನು ಬಳಿಗಾರ್ ನೇತೃತ್ವದಲ್ಲಿ ನಾಡಗೀತೆಗೆ ಕಾಲಮಿತಿ ನಿಗದಿಪಡಿಸುವ ಸಂಬಂಧ ವಿದ್ವಾಂಸರು ಮತ್ತು ಶಿಕ್ಷಣತಜ್ಞರ ಅಭಿಪ್ರಾಯ ಸಂಗ್ರಹ ಮಾಡಲಾಗಿದೆ. ಯಾರು ಯಾವ ಧಾಟಿಯಲ್ಲಾದರೂ ಹಾಡಲಿ, ಹಿನ್ನಲೆ ಸಂಗೀತ ಯಾವುದೇ ಇರಲಿ,ಯಾವ ರಾಗದಲ್ಲಿ ಬೇಕಾದರೂ ಹಾಡಲಿ, ತಾಳ ಯಾವುದಾದರೂ ಇರಲಿ ಆದರೆ ಗೀತೆಯನ್ನು ನಿಲ್ಲಿಸಿದೆ ಸಂಪೂರ್ಣವಾಗಿ ಹಾಡಬೇಕು ಎನ್ನುವ ಪ್ರಮುಖ ಅಂಶವನ್ನೂ ಸೇರಿಸಿಕೊಂಡಂತೆ ಮಾಹಿತಿಯನ್ನು ವರದಿ ರೂಪದಲ್ಲಿ ಸರ್ಕಾರಕ್ಕೆ ಸಲ್ಲಿಕೆ ಮಾಡಲಾಗಿದ್ದು ಅನುಮೋದನೆ ಹಂತಕ್ಕೆ ಬಂದು ತಲುಪಿದೆ.

ವರದಿಯಲ್ಲೇನಿದೆ?

• ಯಾವ ಸಾಲೂ ಅಥವಾ ಚರಣವನ್ನೂ ಕೂಡ ಕೈಬಿಡಬಾರದು
• ಯಾವ ಸಾಲೂ ಪುನರಾವರ್ತನೆಯಾಗಬಾರದು
• 2.30 ನಿಮಿಷದಲ್ಲಿ ಹಾಡಬೇಕು

ಈ ಕುರಿತು ಈಟಿವಿ ಭಾರತ್ ಜೊತೆ ಮಾತನಾಡಿದ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಮನು ಬಳಿಗಾರ್, ಆ ಧಾಟಿ, ಈ ಧಾಟಿ, ಆ ರಾಗ ಈ ರಾಗ ಅಂತಾ ಇಲ್ಲ ಬೇರೆ ಬೇರೆಯವರು ಬೇರೆ ಬೇರೆ ರಾಗದಲ್ಲಿ ಹಾಡಲಿದ್ದಾರೆ. ಏಳೆಂಟು ವಿಧದಲ್ಲಿ ಹಾಡುತ್ತಾರೆ, ಸಂಗೀತವನ್ನು ಕೊಡುವ ಸಲುವಾಗಿ ಗೀತೆಯನ್ನು ಹಾಡುವ ಮಧ್ಯದಲ್ಲಿ ನಿಲ್ಲಿಸಿಬಿಡುತ್ತಾರೆ ಇದು ಆಗಬಾರದು. ಶಾಂತವಾಗಿ,ಸಮಾಧಾನವಾಗಿ 2.30 ನಿಮಿಷದಲ್ಲಿ ಇಡೀ ನಾಡಗೀತೆಯನ್ನು ಹಾಡಬಹುದು. ಈ ಹಿನ್ನೆಲೆ ಹಾಡನ್ನು ಹಾಡಿಸಿ, ವೀಡಿಯೋ ಮಾಡಿ ಅದನ್ನು ಸರ್ಕಾರಕ್ಕೆ ಕಳುಹಿಸಿಕೊಟ್ಟಿದ್ದೇವೆ ಎಂದರು.