'ಆರ್​ಆರ್ ನಗರ ಕುರುಕ್ಷೇತ್ರದಲ್ಲಿ ಅರ್ಜುನನಾಗಿರುವ ಮುನಿರತ್ನರನ್ನು ಗೆಲ್ಲಿಸಿ'

ಆರ್​ಆರ್ ನಗರ ಕುರುಕ್ಷೇತ್ರದಲ್ಲಿ ಅರ್ಜುನನಾಗಿ ಮುನಿರತ್ನ ನಿಮ್ಮ ಬಳಿ ಮತ ಕೇಳಲು ಬಂದಿದ್ದಾರೆ. ಕೊರೊನಾ ಸಂದರ್ಭದಲ್ಲಿ ಮುನಿರತ್ನ ಹಸಿದವರಿಗೆ ಅನ್ನ ಕೊಟ್ಟರು. ಕರ್ನಾಟಕದಲ್ಲಿ ಬಿಜೆಪಿ ಸರ್ಕಾರ ಇದ್ದರೆ ಅದಕ್ಕೆ ಮುನಿರತ್ನ ಕೂಡ ಕಾರಣ. ಹಾಗಾಗಿ ಎಲ್ಲರೂ ಅವರಿಗೆ ಮತಹಾಕುವ ಮೂಲಕ ಗೆಲ್ಲಿಸಿ ಎಂದು ಹೇಳಿದರು.

ಬೆಂಗಳೂರು: ಆರ್​ಆರ್ ನಗರ ಕುರುಕ್ಷೇತ್ರದಲ್ಲಿ ಅರ್ಜುನನಾಗಿ ಮುನಿರತ್ನ ನಿಮ್ಮ ಬಳಿ ಮತ ಕೇಳಲು ಬಂದಿದ್ದಾರೆ. ಅರ್ಜುನನನ್ನು ಗೆಲ್ಲಿಸಿ ಎಂದು ಕಂದಾಯ ಸಚಿವ ಆರ್.ಅಶೋಕ್ ಮನವಿ ಮಾಡಿದರು.

ಜಾಲಹಳ್ಳಿ‌ ಗ್ರಾಮದಲ್ಲಿ ಜನತೆಯನ್ನುದ್ದೇಶಿಸಿ ಮಾತನಾಡಿದ ಅವರು, ಕೊರೊನಾ ಸಂದರ್ಭದಲ್ಲಿ ಮುನಿರತ್ನ ಹಸಿದವರಿಗೆ ಅನ್ನ ಕೊಟ್ಟರು. ಡಿ.ಕೆ.ಶಿವಕುಮಾರ್ ಕನಕಪುರದಿಂದ ಬಂದಿದ್ದಾರೆ. ಚುನಾವಣೆ ನಂತರ ಹೋಗುತ್ತಾರೆ. ಜಾತಿ-ಜಾತಿ ಅನ್ನುತ್ತಾರೆ. ಕಷ್ಟದಲ್ಲಿ ಜಾತಿ ಬರಲ್ಲ, ರೋಪ್ ಹಾಕುವವರು ನಮಗೆ ಬೇಡ. ಕರ್ನಾಟಕದಲ್ಲಿ ಬಿಜೆಪಿ ಸರ್ಕಾರ ಇದ್ದರೆ ಅದಕ್ಕೆ ಮುನಿರತ್ನ ಕೂಡ ಕಾರಣ. ಎಸ್.ಟಿ.ಸೋಮಶೇಖರ್, ಬೈರತಿ ಬಸವರಾಜ್, ಮುನಿರತ್ನ ಅವರ ಋಣವನ್ನು ನಾವು ತೀರಿಸಬೇಕಿದೆ ಎಂದು ಮುನಿರತ್ನ ಪರ ಮತ ಯಾಚಿಸಿದರು. ಜಾಲಹಳ್ಳಿ ರಾಮಯ್ಯನ ಮಗ ಅಶೋಕ ಅಂತ ವಿಧಾನಸೌಧದಲ್ಲಿ ಭಾಷಣ ಮಾಡಿದ್ದೆ. ಹೆಚ್.ಎಂ.ಡಿ ವಾರ್ಡ್​ನಿಂದ ಇಲ್ಲಿವರೆಗೂ ಮೆರವಣಿಗೆ ಮಾಡಿದ್ದರು ಎಂದು ನೆನಪಿನ ಬುತ್ತಿ‌ಬಿಚ್ಚಿಟ್ಟರು.

ನಟ ದರ್ಶನ್ ಮಾತನಾಡಿ, ಮುನಿರತ್ನ ಹಂತಹಂತವಾಗಿ ಬೆಳೆದಿದ್ದಾರೆ. ಅವರು ನಮಗ ಅನ್ನ ಹಾಕಿದ್ದಾರೆ. ಕುರುಕ್ಷೇತ್ರ ಸಿನಿಮಾ ಮಾಡುವುದಕ್ಕೆ ಗುಂಡಿಗೆ ಬೇಕಿತ್ತು. ಅದು ಮುನಿರತ್ನ ಅವರಿಗೆ ಇತ್ತು. ಬರಿ ಒಂದು ಗುಂಡಿಗೆ ಅಲ್ಲ 10 ಗುಂಡಿಗೆ ಅವರಿಗೆ ಇದೆ ಎಂದು ದರ್ಶನ್ ಹೇಳಿದರು.

ನಟಿ ಅಮೂಲ್ಯ ಮಾತನಾಡಿ, ಆರ್​ಆರ್ ನಗರದ ಪ್ರತಿ ವಾರ್ಡ್​ನಲ್ಲಿ ಹೋಗಿ ಬಂದಿದ್ದೇನೆ. ಜಾಲಹಳ್ಳಿ ನನಗೆ ಅಶೋಕ್ ಅಂಕಲ್​ನಿಂದ ಸ್ಪೆಷಲ್. ಕೊರೊನಾ ಸಮಯದಲ್ಲಿ ಮುನಿರತ್ನ ಅವರು ಉತ್ತಮ ಕೆಲಸ ಮಾಡಿದ್ದರು. ನಾನು ನೋಡಿದ್ದೇನೆ ಮುನಿರತ್ನ ಅವರ ಮೇಲೆ, ಬಿಜೆಪಿ ಮೇಲೆ ನಿಮ್ಮ ವಿಶ್ವಾಸ ಇರಲಿ ಎಂದು ಮನವಿ ಮಾಡಿದರು.

ಹೆಚ್​ಎಂಟಿಯಲ್ಲಿ ಪ್ರಚಾರದ ನಂತರ ಬೆಳಗಿನ ಪ್ರಚಾರಕ್ಕೆ ವಿರಾಮ ನೀಡಿ ಸಚಿವ ಅಶೋಕ್ ನಿವಾಸಕ್ಕೆ ದರ್ಶನ್ ಸೇರಿ ಬಿಜೆಪಿ ಮುಖಂಡರು ಭೋಜನಕ್ಕೆ ತೆರಳಿದ್ದು, ಸಂಜೆ ಮತ್ತೆ ಪೀಣ್ಯಾದಿಂದ ಪ್ರಚಾರ ಆರಂಭವಾಗಲಿದೆ.