ಇಂದಿರಾ ಕ್ಯಾಂಟೀನ್​ನಲ್ಲಿ ಊಟೋಪಹಾರಕ್ಕೆ ಮರುಚಾಲನೆ

ಕೊರೊನಾ ಹರಡುವುದನ್ನು ತಡೆಯುವ ನಿಟ್ಟಿನಲ್ಲಿ ಮುನ್ನೆಚ್ಚೆರಿಕಾ ಕ್ರಮವಾಗಿ ಮಂಗಳವಾರ ಸ್ಥಗಿತಗೊಳಿಸಲಾಗಿದ್ದ ಇಂದಿರಾ ಕ್ಯಾಂಟೀನ್ ಅನ್ನು ಇಂದು ತೆರೆಯಲು ಸರ್ಕಾರ ಮುಂದಾಗಿದೆ.

ಬೆಂಗಳೂರು: ಕೊರೊನಾ ಹಾವಳಿ ತಡೆಗಟ್ಟಲು ಇಂದಿರಾ ಕ್ಯಾಂಟೀನ್​ನಲ್ಲಿ ಉಚಿತವಾಗಿ ಊಟೋಪಹಾರ ನೀಡಲು ಆರಂಭಿಸಿದ ಸರ್ಕಾರ, ಜನದಟ್ಟಣೆ ನೋಡಿ ಮಂಗಳವಾರವೇ ಸ್ಥಗಿತಗೊಳಿಸಿತ್ತು. ಆದ್ರೆ, ಮತ್ತೆ ಇಂದು ಇಂದಿರಾ ಕ್ಯಾಂಟೀನ್ ತೆರಯಲು ಸರ್ಕಾರ ನಿರ್ಧರಿಸಿದೆ.

ಗುರುವಾರ ಮುಂಜಾನೆಯಿಂದಲೇ ಆಹಾರ ನೀಡಲು ಗುತ್ತಿಗೆದಾರರಿಗೆ ಸರ್ಕಾರ ತಿಳಿಸಿದೆ. ಇಂದು ಎಲ್ಲಾ ಇಂದಿರಾ ಕ್ಯಾಂಟೀನ್​ಗಳನ್ನು ತೆರೆಯಲಾಗುವುದಿಲ್ಲ. ಬದಲಾಗಿ ಅತ್ಯಗತ್ಯ ಇರುವೆಡೆ ಮಾತ್ರ ಆಹಾರ ಪೂರೈಕೆ ನಡೆಯಲಿದೆ.

ಈವರೆಗೆ 60 ಸಾವಿರ ಜನರಿಗೆ ಊಟ ಸಿದ್ಧಪಡಿಸುತ್ತಿದ್ದು, ಗುರುವಾರದಿಂದ 11 ಸಾವಿರ ಜನರಿಗೆ ಊಟ ನೀಡಲು ಅನುಮತಿಸಲಾಗಿದೆ ಎಂದು ಗುತ್ತಿಗೆದಾರ ಗೋವಿಂದ್ ಪೂಜಾರಿ ಈಟಿವಿ ಭಾರತ್​ಗೆ ತಿಳಿಸಿದರು.

ಸಾವಿರ ಪ್ಲೇಟ್ ರೈಸ್ ಬಾತ್ ಹಾಗೂ ಪುಲಾವ್ ಪೂರೈಕೆಗೆ ನಿರ್ಧರಿಸಲಾಗಿದ್ದು, ಬೆಂಗಳೂರಿನ 33 ವಾರ್ಡುಗಳಲ್ಲಿ ತಲಾ 200 ಪ್ಯಾಕೆಟ್ ಆಹಾರ ವಿತರಣೆ ಮಾಡಲಾಗುತ್ತದೆ. ಆದ್ರೆ, ಜನದಟ್ಟಣೆ ಆಗದಂತೆ, ಜನರು ಗುಂಪುಗೂಡದಂತೆ ವೇಗವಾಗಿ ಊಟ ವಿತರಿಸುವ ವ್ಯವಸ್ಥೆ ಮಾಡಲಾಗಿದೆ ಎಂದು ತಿಳಿಸಿದರು.