ಫೋನ್​ ಟ್ಯಾಪಿಂಗ್: ಸಿಬಿಐ ಎದುರು ಸಮಯಾವಕಾಶ ಕೇಳಿದ 40 ಇನ್ಸ್​ಪೆಕ್ಟರ್​ಗಳು

ರಾಜಕೀಯ ಹಾಗೂ ಪೊಲೀಸ್ ಇಲಾಖೆಯಲ್ಲಿ ಭಾರಿ ಸದ್ದು ಮಾಡಿದ ಫೋನ್ ಟ್ಯಾಪಿಂಗ್ ಪ್ರಕರಣದ ಬಗ್ಗೆ ಸಿಬಿಐ ಅಧಿಕಾರಿಗಳು ತನಿಖೆ ಚುರುಕುಗೊಳಿಸಿದ್ದಾರೆ.

ಬೆಂಗಳೂರು:ಫೋನ್​ ಟ್ಯಾಪಿಂಗ್​ ಆರೋಪ ಸುಳಿಯಲ್ಲಿ ಸಿಲುಕಿರುವ 40 ಇನ್ಸ್​ಪೆಕ್ಟರ್​ಗಳು ಇದೀಗ ಸಿಬಿಐ ಎದುರು ಕಾಲಾವಕಾಶ ಕೇಳಿದ್ದಾರೆ. ಮಾಜಿ ಕಮಿಷನರ್ ಒಬ್ಬರ ಸೂಚನೆಯಂತೆ ಕೊಲೆ ಕೇಸ್​​ನಲ್ಲಿ ಗಣ್ಯರ ಮೊಬೈಲ್, ಟ್ಯಾಪಿಂಗ್ ಮಾಡಿರುವುದು ಸಿಬಿಐ ತನಿಖೆಯಲ್ಲಿ ಬಯಲಾಗಿತ್ತು.

ಐಎಎಸ್​ ಅಧಿಕಾರಿಗಳು, ಸ್ವಾಮೀಜಿ ಹಾಗೂ ರಾಜಕಾರಣಿಗಳ ಫೋನ್​ ಟ್ಯಾಪ್​ ಮಾಡಿದ 40ಕ್ಕೂ ಹೆಚ್ಚು ಇನ್ಸ್​ಪೆಕ್ಟರ್​​ಗಳಿಗೆ ಸಿಸಿಬಿ ಅಧಿಕಾರಿಗಳು ನೋಟಿಸ್ ನೀಡಿ ವಿಚಾರಣೆಗೆ ಕರೆದಿದ್ದರು.‌ ಹಾಗೆ ಸದ್ಯ ವಿಚಾರಣೆಗೆ ಹಾಜರಾದ 40 ಇನ್ಸ್​ಪೆಕ್ಟರ್​​ಗಳನ್ನು ಐದೈದು ಬಾರಿ ಸಿಬಿಐ ಸುಮಾರು 22 ಪ್ರಶ್ನೆಗಳ ಪಟ್ಟಿ ಮಾಡಿಕೊಂಡು ಡ್ರಿಲ್​ ಮಾಡಿ ವಿಚಾರಣೆ ನಡೆಸಿದಾಗ‌ ಸರಿಯಾದ ದಾಖಲೆ ಒದಗಿಸಲು ಸಮಯಾವಕಾಶ ಬೇಕೆಂದು ಇನ್ಸ್​​ಪೆಕ್ಟರ್​ಗಳು ಸಿಬಿಐ ಎದುರು ಮನವಿ ಮಾಡಿದ್ದಾರೆ.

ಹೀಗಾಗಿ ಪ್ರಕರಣದಲ್ಲಿ ಕೇಳಿ ಬಂದ 40 ಇನ್ಸ್​ಪೆಕ್ಟರ್​ಗಳಿಗೆ ಸಿಬಿಐ ಸಮಯಾವಕಾಶ ನೀಡಿದ್ದು ಸರಿಯಾದ ದಾಖಲೆ ನೀಡುವಂತೆ ಸೂಚಿಸಿದೆ. ಇನ್ಸ್​ಪೆಕ್ಟರ್​ಗಳು ಸರಿಯಾದ ದಾಖಲೆಗಳನ್ನು ಒದಗಿಸದರೆ ಪ್ರಕರಣದಲ್ಲಿ ಹಿರಿಯ ಅಧಿಕಾರಿಯೊಬ್ಬರಿಗೆ ಸಂಕಷ್ಟ ಕಟ್ಟಿಟ್ಟ ಬುತ್ತಿ ಅನ್ನೋ ಮಾತು ಕೇಳಿ ಬಂದಿದೆ.