ಅಸಂಘಟಿತ ಕಾರ್ಮಿಕರಿಗೆ ಹೊರೆಯಾಯ್ತು ಲಾಕ್​ಡೌನ್, ಸರ್ಕಾರದ ನೆರವಿಗೆ ಮನವಿ

ಕೊರೊನಾ ವೈರಸ್ ಹಿನ್ನೆಲೆಯಲ್ಲಿ ದೇಶಾದ್ಯಂತ ಲಾಕ್​​​ಡೌನ್ ಘೋಷಣೆಯಾಗಿದೆ. ಲಾಕ್​​​ಡೌನ್‌ನಿಂದ ತೀವ್ರ ಸಂಕಷ್ಟಕ್ಕೊಳಗಾಗಿರುವ ಅಸಂಘಟಿತ ಕಾರ್ಮಿಕರು ಸರ್ಕಾರದಿಂದ ನೆರವಿನ ನಿರೀಕ್ಷೆಯಲ್ಲಿದ್ದಾರೆ.

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಅಸಂಘಟಿತ ಕಾರ್ಮಿಕರ ಸಂಖ್ಯೆ ದೊಡ್ಡದಿದೆ. ಪ್ರತಿದಿನದ ದುಡಿಮೆಯಿಂದ ಜೀವನ ಸಾಗಿಸುವ ಕಟ್ಟಡ ನಿರ್ಮಾಣ ಕಾರ್ಮಿಕರು, ಮನೆಗೆಲಸ, ಹಮಾಲಿ, ಟೈಲರ್, ಬೀಡಿ ಕಟ್ಟುವ ಕಾರ್ಮಿಕರು, ಬೀದಿಬದಿ ವ್ಯಾಪಾರಿಗಳು ಹೀಗೆ ಒಂದೊಂದು ವಿಭಾಗ ಒಂದೊಂದು ರೀತಿಯ ಸಮಸ್ಯೆ ಎದುರಿಸುತ್ತಿದೆ. ಜೀವನ ನಿರ್ವಹಣೆಗೆ ಲಾಕ್​ಡೌನ್​ ಪೆಟ್ಟು ನೀಡಿದೆ.

ಜಿಲ್ಲೆಯಲ್ಲಿ ಅಂದಾಜು 2 ಲಕ್ಷ ಮಂದಿ ಬೀಡಿ ಕಟ್ಟುವ ಕಾರ್ಮಿಕರಿದ್ದಾರೆ. ಇದರಲ್ಲಿ ಮಹಿಳೆಯರೇ ಹೆಚ್ಚು. ಮನೆ ನಿರ್ವಹಣೆ ಮಾಡುತ್ತಲೆ ಬೀಡಿ ಕಟ್ಟಿ ಜೀವನ ಸಾಗಿಸುತ್ತಿದ್ದ ಇವರು ಸಂಕಷ್ಟದಲ್ಲಿ ಜೀವನ ಸಾಗಿಸುತ್ತಿದ್ದರು. ಈಗ ಲಾಕ್​ಡೌನ್​ ಘೋಷಣೆಯಾಗಿದ್ದು, ಉದ್ಯಮ ಸಂಪೂರ್ಣವಾಗಿ ನಿಂತಿದೆ. ದಿನಕ್ಕೆ 150 ರಿಂದ 200 ವರೆಗೆ ದುಡಿಯುತ್ತಿದ್ದ ಇವರು ಕೆಲಸವಿಲ್ಲದೆ ಕಂಗಾಲಾಗಿದ್ದಾರೆ.

ಜಿಲ್ಲೆಯಲ್ಲಿ ಸುಮಾರು 5 ಲಕ್ಷ ಮಂದಿ ಕಟ್ಟಡ ನಿರ್ಮಾಣ ಕಾರ್ಮಿಕರಿದ್ದಾರೆ. ದಿನಕ್ಕೆ 700 ರಿಂದ 1000 ರೂಪಾಯಿ ದುಡಿಯುತ್ತಿದ್ದ ಇವರು ಲಾಕ್​ಡೌನ್​ನಿಂದ ಕೈಚೆಲ್ಲಿ ಕುಳಿತಿದ್ದಾರೆ. ದುಡಿದ ಹಣದಲ್ಲಿ ಜೀವನ ನಿರ್ವಹಣೆ ಮಾಡುತ್ತಿದ್ದ ಇವರು ಬದುಕೀಗ ದುರ್ಬರವಾಗಿದೆ.

ಇದರ ಜೊತೆಗೆ ಬೀದಿ ಬದಿ ಕಾರ್ಮಿಕರು, ಹಮಾಲಿ ಕಾರ್ಮಿಕರು, ಮನೆಗೆಲಸದವರ ಬದುಕು ಲಾಕ್​ಡೌನ್​​​​​ನಿಂದ ಸಂಪೂರ್ಣ ಸ್ತಬ್ಧವಾಗಿದೆ. ಟೈಲರ್​ ವೃತ್ತಿಯಲ್ಲಿ ಇರುವವರು ಲಾಕ್​ಡೌನ್​ನಿಂದ ತೀವ್ರ ಸಂಕಷ್ಟಕ್ಕೊಳಗಾಗಿದ್ದಾರೆ. ಮದುವೆ ಸೇರಿದಂತೆ ಹಲವು ಶುಭ ಸಮಾರಂಭಗಳು ನಡೆಯಬೇಕಿದ್ದ ವೇಳೆಯಲ್ಲಿ ಲಾಕ್​ಡೌನ್​ ಇವರ ಜೀವನ ಬಹುದೊಡ್ಡ ಪೆಟ್ಟು ನೀಡಿದೆ.